Нийслэлийн Засаг Даргын Тамгын Газраас Төв цэнгэлдэх хүрээлэн компанийн эзэмшлийн асуудлаар өнөөдөр Авлигатай Тэмцэх Газарт хандаж, хэвлэлийн хурал зохион байгуулсан юм. Энэ үеэр Нийслэлийн Засаг даргын орлогч О.Номинчимэг сэтгүүлчдийн асуултад хариулав.
-Төв цэнгэлдэх хүрээлэн компанийн олон Нямдаваа ямар учиртай вэ?
-Ах дүү хоёр адил овог, нэртэй хүмүүс гэж ойлгож байгаа. Яагаад ийм нэртэй байгааг мэдсэн зүйл алга. Хүмүүс хоёр Нямдавааг том, жижгээр нь ялгадаг юм билээ. Энэ нь төөрөгдөл учруулж байгаа.
Жижиг буюу дүү Нямдаваа нь гүйцэтгэх захирал гэж бичиг баримт дээр гарын үсэг зураад байдаг. Улсын бүртгэлийн байгууллагаас ирсэн баримт бичгийг үзэхээр тэр хүнийг гүйцэтгэх захирлаар томилсон шийдвэр байхгүй.
Харин ах буюу том Нямдаваа нь гүйцэтгэх захирал юм шиг бичиг баримт байгаа. Хоёр Нямдаваагийн нэрийн талаар лавлагаа гаргаж өгөх асуудлаар УБЕГ-т хандсан. Адил нэртэй болохоор төөрөгдүүлж, албан тушаалаа хоёулаа хэрэглээд явж байсан дүр зураг харагдаж байгаа.
-Нийслэлийн өмч алдагдаад олон жил болсон байна. Ажлын хэсэг шалгаж байхад ямар нөхцөл байдал тогтоогдсон вэ?
-2006 онд Төв цэнгэлдэх хүрээлэн компани хувийн өмч давамгайлсан буюу 51%, нийслэлийн эзэмшил 49% болсон. Энэ нь ТУЗ-өөр шийдсэн асуудал. Тухайн үеийн ИТХ-ын дарга Болормаа уг шийдвэрийг хууль бус гэж үзэж, хөөцөлдөж шүүхээр явсан юм билээ. 2006 онд эхэлсэн уг асуудал 2008 онд Дээд шүүх дээр унасан. Манай хуулийн баг уг шийдвэр зөв эсэхэд дүн шинжилгээ хийж байгаа.
Шүүхийн маргаантай гээд 2010 он хүртэл Төв цэнгэлдэх хүрээлэн компанийн ТУЗ болон хувьцаа эзэмшигчдийн хурлаа хийгээгүй.
2020 онд уг асуудлыг шалгахаар НИТХ-ын төлөөлөгч Ганзориг ажиллаж байсан ч тодорхой дүгнэлт хийлгүйгээр ажлын хэсгийн хугацаа дууссан байсан.
-АТГ-т хандсан асуудал хэр удаан хугацаанд шалгагдах бол?
-Мэдээлэл хүсвэл хуулийн буюу 30 хоногийн хугацаанд ирнэ. Бид Төв цэнгэлдэх хүрээлэн компанийн санхүүгийн баримт дээр ажиллаж байгаа. Энэ нь хувийн өмчид халдсан зүйл биш. Төв цэнгэлдэх хүрээлэн компанийн зүгээс санхүүгийн баримт бичгээ ирүүлэхгүй удаж байгаа. Тус компанийн 49%-ийг эзэмшдэг нийслэлээс нэлээд хөрөнгө оруулалт хийсэн ч балансад бүртгээгүй, хувь эзэмшилдээ тооцоогүй байна. Үүнийг нягталж, хувь эзэмшлээ хохиролд тооцож авах байр суурьтай байгаа.
Стадионыг засварлах зэрэгт нийслэлээс 4.7 тэрбум төгрөгийн хөрөнгө оруулалт хийсэн.
Төв цэнгэлдэхийн 29 газрын хүнд зүгээр өгнө гэж байхгүй байх.
