Цахим орчинд иргэдийн мөнгийг залилах тохиолдол ихэсч байгаа талаар албаныхан сэрэмжлүүлэг өгч байна. Энэ төрлийн хэрэг 2018 он гарсаар Эрүүгийн цагдаагийн албаны Цахим гэмт хэрэгтэй тэмцэх хэлтэст 50 орчим бүртгэгдэж, шалгаж байгаа аж.
“Таны эртний нэр, индиан нэр” гэсэн аппликейшнийг дэлгэрэх үед энэ талаарх анхааруулгыг цагдаагийн албаны хүн өгч байсан ч иргэд өнөөдрийг хүртэл ийм төрлийн аппликейшнийг өргөн хэрэглэж байна. Сонирхол татахуйц, сонжоо хэлбэрийн элдэв янзын аппликейшнд лайк дарах, түгээх, дагах зэргээр ямар нэгэн үйлдэл хийсэн тохиолдолд хэрэглэгч өөрийн фэйсбүүкийнхээ нууцлалыг алдах, хакердуулах нөхцөл үүсэх эрсдэлтэй байдаг аж. Ийм аргаар иргэдийг залилсан гэмт хэргийн хохирол ч их хэмжээгээр гарах болжээ.
Эрүүгийн цагдаагийн албаны Кибер гэмт хэрэгтэй тэмцэх хэлтэс өнгөрсөн нэгдүгээр сарын 15-нд 10 этгээдийг энэ төрлийн хэрэгт холбогдуулан шалгаж байгаа юм байна. Тэднийг фэйсбүүк хэрэглэгчдийн хаягийг олзолж, тэдгээрийн дотны гэх хүмүүсээс хэрэглэгчийн өмнөөс мөнгө гуйх, мөнгө нэхэж шаардах зэрэг үйлдлийг хийдэг гэсэн мэдээллийн дагуу шалгаж эхэлсэн байна. Хэрэгт холбогдогч Ш, Т, Н, Д, Э нар нь 2017 оны дөрөвдүгээр сараас хойш нийт 40 орчим удаагийн цахим халдлага үйлдэж, бусдад маш их хэмжээний мөнгөн хохирол учруулсан гэдгийг шалгалтын явцад тогтоожээ. Тэд 9911, 9910, 9909, 8811, 9191 зэрэг үүрэн холбооны дугаар эзэмшдэг иргэдийн фэйсбүүк хаягийг нь олж, нэвтрэх нэр, нууц үгийг утасны дугаараар нь тааруулж ороод чатыг нь уншиж судалсны дараа хэрэг үйлддэг гэдгийг урьдчилсан байдлаар тогоогоод байна.
Мөн фэйсбүүк, зарын сайтуудаар болон мэдээллийн сайтуудын коммент хэсэг гэх мэт орон зайг ашиглан “Их хэмжээний мөнгийг бага хүүтэй зээлүүлнэ” гэсэн хуурамч зар нэлээд түгэх болсон. Энэ нь ихэвчлэн хуурамч хаяг үүсгэн өөрийгөө санхүүгийн байгууллагад өндөр албан тушаал хашдаг гэх мэтээр хууран мэхэлж, зээлийн бичиг баримт, орчуулгын төлбөр, хураамж зэргээр мөнгө шилжүүлэхийг шаардаж залилангийн гэмт хэрэг үйлдэх болсон байна. Гэмт этгээдүүд хохирогчдын итгэлийг олохын тулд google.translate ашиглан монголоор бичих, монгол хүний нэр зураг ашиглан хуурамч фэйсбүүк хаяг нээн “Зээл өгсөнд баярлалаа” гэх мэт худал мэдээлэл тараах, хуурамч бичиг баримт, зургийг засварлан өөрчилж илгээх зэргээр янз бүрийн арга ашигладаг байна. Тиймээс иргэдийг энэ төрлийн гэмт хэрэгт өртөхөөс урьдчилан сэргийлэхийг цагдаагийн байгууллагаас анхааруулж байна.
Цахим гэмт хэргээс сэргийлэхийн тулд иргэд дээр дурдсанчлан элдэв аппликейшнд хандахгүй байх, хандсан тохиолдолд өөрийн нууц үгээ сольж байх, ямар нэгэн төхөөрөмжөөр нэвтэрсэн тохиолдолд дараа нь фэйсүүк, и-мэйлээ бүрэн хаах, бүрэн хаагдсан эсэхийг шалгах, нууц үгээ найдвартай эсэхийг шалгах, passwordmetter.com how secure is my password.net гэсэн хаягаар нягталж шалгаж байхыг сануулж байна.
