АТГ-ын даргын ээлжит сунгаа эхлээд буй. Хэвлэл мэдээллийн хэрэгслүүд ч олон удаа нэр нь гарч, яригдаж байгаа хүмүүсээр санал авч, судалгаа хийж, хэрэндээ л нийгмийн чиг хандлагыг тодорхойлохыг оролдож байна.
Харин Ерөнхийлөгч Х.Баттулга энэ албан тушаалын сэнтийд залах эрхмийн эрэлд гарч ард түмэндээ зориулж санал асуулгын хуудас нээсэн. Санаа нь зөв ч арга нь буруутав. Ард иргэд энд санал өгөхийн тулд заавал Ерөнхийлөгчийн сайтад хандаж, түүн дотроо “Санал асуулга” буланд орох ёстой болно. Ингээд тухайн иргэн өөрийн анкетыг бөглөж байж санал болгох хүнийхээ тухай бичиж оруулна. Хэрэв өөрийн анкетаа худал, буруу бөглөсөн бол саналыг хүлээн авах боломжгүй болно гэж байгаа.
Энэ нь иргэдэд төвөгтэйн дээр бас ямар ч итгэл үнэмшилгүй гэсэн шүүмжлэл дагуулж байна. Тухайлбал, хэчнээн хүн оролцсон нь тодорхойгүй. Санал асуулгын дүн гарлаа гэхэд үнэхээр тухайн хүн олонхоор сонгогдсон эсэх нь эргэлзээтэй. Хамгийн цаад ноцтой асуудал бол санал өгч байгаа иргэний мэдээлэл, улс төрийн хандлагыг судлах таатай нөхцөл бүрдэж байгааг үгүйсгэхгүй. Нэг ёсондоо энэ баг иргэний бас нэг төрлийн нууцад халдсанаас өөрцгүй юм. Энэ санал асуулга энүүхэндээ өрнөөд дуусдаг юм байж.
Гэтэл маапаан дундаас гарч ирсэн, Ерөнхийлөгчийн нэр дэвшүүлэх тэр хүнийг УИХ томилох уу? гэсэн асуулт араас нь урган гарна. Ард түмний сонголт гэж төрийн тэргүүн хэчнээн зүтгүүлсэн ч олонхоороо эрх баригчид саналыг нь унагах магадлал хангалттай харагдаад байгаа юм. Ингээд Ерөнхийлөгч дахин ээлжит хүнийхээ эрэлд гарна.
Тийм учраас олон түмний саналыг авсан нэр зүүж “поп”-орч байгаад буруугаа УИХ-д нялзаагаад өнгөрөх дүр зургийг эндээс харж болохоор байна. Нэгэнт УИХ томилохгүй нь тодорхой ийм л жүжгийн тавилт өнөөдөр үргэлжилж байна.
Энэ хугацаанд одоогийн Х.Энхжаргал дарга “За яахав ээ, яахав. Мэдэхгүй ээ, мэдэхгүй” гэдгээ хэлээд л, инээгээд л сууна. Түүнд хуулийн хугацаа дууссан байна уу, үгүй юу пад байхгүй. Учир нь орны хүн нь олдохгүй, олдсоныг нь томилохгүй шүү дээ.
Бас манай улсын авлигын индекс ч ухарч, тоогоо дорвитойхон ахиулсаар л байна. Олон Улсын “Транспэрэнси интернэшнл” байгууллагаас гаргадаг дүгнэлтээр манай улс 2016 онд 176 улсаас 87 дугаарт, 2017 онд 180 улсаас 103 дугаар байранд орсон байна билээ.
Үнэн сэтгэлийн угаас авлигатай тэмцэж, шударга байхыг хүсвэл арай өөр арга сэдээсэй. Эгэл ардын хэнд нь ч хэрэггүй, Ерөнхийлөгч нь “поп”-орч, эрх баригчид нь эсэргүүцэх ийм тавилттай жүжиг энэ төрийнхөнд л зугаатай биз. Манай улс төрийн увайгүй жүжигчдийн санаа ийм л учигтай буй за.
