“Улсын Их дэлгүүр” хувьцаат компани гэж бий. Энэ компани нь ерөнхий дөө түрээсийн үйл ажиллагаа л явуулдаг. Мөн тус компани нь Гүйцэтгэх захирал, нягтлан бодогч гэсэн хоёрхон ажилтантай.
Сонирхолтой байгаа биз. Энэ том компанид ердөө хоёр л хүн ажилладаг. Харин одоо үйл ажиллагаа явуулж буй “Номин Холдинг” ХХК, “Номин реалтор” ХХК, “Номин тав” ХХК-ууд нь “Улсын Их дэлгүүр”-т талбай түрээсэлж үйл ажиллагаа явуулдаг. Одоо бүр сонирхолтой мэдээлэл. Энэ юу вэ гэвэл “Улсын Их дэлгүүр” ХК-ийн хоёр ажилтан болох Гүйцэтгэх захирал С.Сайнбаяр нь “Номин Холдинг” ХХК-ийн Бизнес хөгжлийн газрын захирал, нягтлан бодогч Б.Ээжиймаа нь мөн л “Номин Холдонг” ХХК-ийн ахлах нягтлан бодогчоор давхар ажилладаг гэдгийг Санхүүгийн зохицуулах хорооны хоёр удаагийн шалгалтаар тогтоосон байна.
Өөрөөр хэлбэл түрээслэгч этгээд нь өөрөө түрээслүүлэгч байх нь. Тэгэхээр энд ашиг сонирхлын зөрчил байна гэж хардахаас аргагүй. Мөн Улсын Их дэлгүүр хувьцаат компани нь 100 төгрөгийн нэрлэсэн үнэ бүхий нийт 36.807.850 ширхэг энгийн хувьцаатай. Үүний 68.4 хувийг томоохон хувьцаа эзэмшигчид мөн л “номин”-гийнхон эзэмшдэг.
Харин үлдсэн 45.415 хувийг жижиг хувьцаа эзэмшигчид эзэмшдэг байна.Тэгвэл өнгөрөгч хугацаанд “Улсын Их дэлгүүр” ХК нь түрээсийн үйл ажиллагаа явуулж байсан ч алдагдалтай ажиллаж байна гэсэн шалтгаанаар жижиг хувьцаа эзэмшигчиддээ ноогдол ашиг хуваарилалгүйгээр ажиллаж ирсэн байна. Ердөө хоёр удаа ноогдол ашиг тараасан бөгөөд 2001 онд 30 мөнгө, 2007 онд 3 төгрөгийн ноогдол ашиг хуваарилжээ.
Гурван том компанид талбайгаа түрээслүүлдэг хэрнээ энэ бүх хугацаанд алдагдалтай ажилласаар байсан байх нь. Тэгээд ердөө хоёр хүнийг цалинжуулдаг, ашиглалтын зардлыг нь түрээслэгч төлдөг байхад л алдагдалтай ажилласаар байсан нь сонирхолтой. Энд “Номин” гэх том компанийн тухай огт дурьдаагүй. Харин өөрийн обьектыг түрээслүүлдэг “Улсын Их дэлгүүр” ХК-ийн тухай яригдаад байгаа юм. Тэгвэл чухам яагаад алдагдалтай ажиллаж байсан, түрээслэгчидтэй ямар гэрээ, хэлцэл байгуулж төлбөр тооцоогоо хэрхэн хийдэг байсныг Санхүүгийн зохицуулах хорооноос томилогдсон ажлын хэсгийн дүгнэлтэд тусгажээ.
Тухайлбал, 2008 оноос хойш хийгдсэн түрээслэгч, түрээслүүлэгчийн хороонд түрээсийн болон зээлийн 13 гэрээг хүчин төгөлдөр гэрээ, хэлцэл мөн эсэх нь эргэлзээтэй байгааг дүгнэлтэд дурьдсан байна.Тиймээс “Улсын Их дэлгүүр” ХК-ийн алдагдалтай ажиллах болсон шалтгаан нөхцлийг тодруулах, жижиг хувьцаа эзэмшигчдийн эрх ашгийг хамгаалах үүднээс Санхүүгийн зохицуулах хорооноос шүүхэд хандаад байгаа аж.
