Оюутолгой ордыг ашиглах, Хөрөнгө оруулалтын гэрээний хэрэгжилтийг шалгах, санал, дүгнэлт гаргах үүрэг бүхий Ажлын хэсгийн байгууллагдсан. Энэхүү ажлын хэсгийн ахлагч УИХ-ын гишүүн Д.Тэрбишдагва ажиллаж байгаа билээ.
Ажлын хэсгийн ахлагч, УИХ-ын гишүүн Д.Тэрбишдагва “УИХ-ын Ажлын хэсгийн гишүүд Оюутолгой компаний удирдлагатай ажлын байранд нь уулзалт хийж, шалгалт, чиглэл, шаардлагатай холбогдох дутуу материалыг шуурхай гаргаж өгөх, ажиллах боломжоор хангах, үйлдвэрлэлийн үйл явцтай газар дээр нь танилцах зэргээр хамтран ажиллалаа.
ЗГХЭГ, Эрдэнэс Монгол ХХК-иас Оюутолгойтой холбоотой мэдээллийг танилцуулсан. Иргэдийн санал хүсэлт мэдээллийг хүлээн авч, иргэдийн хүлээлтэд бодит хариу өгөхийг зорьж байна. Дэд ажлын хэсгээс 1,500 хуудас бүхий танилцуулга, судалгааны материалыг хүлээж авсан. Эдгээр материалтай УИХ-ын Ажлын хэсэг танилцаж байна.
Бид нэгдсэн санал дүгнэлт гаргаж УИХ-ын удирдлага, Эдийн засгийн байнгын хороонд танилцуулна. АТГ-ын шалгаж байгаа материалтай танилцахаар хүлээж байна. Аудитаас хийж байгаа шалгалтын материалтай мөн танилцах ёстой. Хараахан дуусаагүй тул хүлээж байна.
Засгийн газраас шалгалт хийсэн. 10 хоногийн өмнө бичиг явуулсан ч хариу нь хараахан ирээгүй байна. Тэгж байж ажлын хэсгийн дүгнэлтийг гарна. Өнөөдөр эдийн засгийн байнгын хороо болж өгвөл УИХ-ыг энэ долоо хоногт завсарлуулахгүй эсвэл ээлжит хурал зарлаж, энэ асуудлыг танилцуулмаар байгаа.Татварын акт дээр болон ажлын хэсгийн материал дээр татвар зөрчилтэй гарч байна лээ. 150 сая доллар байтугай юмнууд гарах учраас эцсийн дүнг хэлсэн нь дээр байх.
Оюутолгойд 14,000 хүн ажиллаж байгаа гэсэн хэрнээ хэд нь гэрээт, хэд нь үндсэн ажилтан нь ойлгомжгүй байна
УИХ-ын гишүүн Н.Оюунчимэг “Хөдөлмөрийн харилцаа нийгмийн асуудлыг хариуцсан Ажлын хэсэгт орж ажилласан. Газар дээр нь очиж үзлээ. Өмнө нь ч хэд хэд очсон. Нүүдлийн шувуу шиг сүүлийн 10 гаруй жил ажилласан. Оюутолгойд 14,000 хүн ажиллаж байгаа гэсэн хэрнээ хэд нь гэрээт, хэд нь үндсэн ажилтан нь ойлгомжгүй, цалин нь хүртэл нэлээд зөрүүтэй байсан. Гэрээгээр ажил гүйцэтгэгчдийг 14 мянган ажилтны тоонд оруулсан байдал харагдсан. Энэ мэт зүйлийг тодорхой болгох хэрэгтэй. Арван жил болж байхад Монгол ажилчид нь гэрт амьдарч байна. Үүнийг бид болиох хэрэгтэй гэдэг шаардлага тавьсан. Ирэх 11 дүгээр сараас гэрийг халж, хоёр барилга барьж байгаа. Үүнд үндсэн ажилчдаа оруулахаар ажиллаж байгаа гээд хоёр орон сууц үзүүлсэн. Мөн Оюутолгойн цахиилгаан станцыг барих шийдвэрийг Засгийн газар яаралтай гаргах хэрэгтэй
Засгийн газар шийдвэрээ яаралтай гаргах хэрэгтэй
Ажлын хэсгийн ахлагч, УИХ-ын гишүүн Д.Тэрбишдагва “Өмнийн говийн зөвлөлийг Засгийн газар байгуулсан. Гэхдээ зөвлөлөө ерөөсөө шахаж ажиллуулаагүй, шахаж шаардаагүй, нутаг орны ард иргэдийн сайн сайхны төлөө ажиллуулаагүй.
2006-2016 он хүртэл судлахад Цагаан сар, Шинэ жил, Наадмын өмнө 200 орчим хуульд ашиг сонирхлыг зөрчилтэйгөөр хуульд өөрчлөлт оруулсан байдаг.
2009.07.16-д Оюутолгойтой холбоотой Татварын хууль, Ашигт малтмалын тухай хуульд өөрчлөлт оруулж ирсэн.
Томоохон ордуудын татварыг 20 хувь байсныг 5 хувь болгоно гэснийг хэвээр үлдээхээр байр сууриа илэрхийлсэн. Татварын багц хуульд яаран өөрчлөлт оруулахгүй гэсэн байр суурьтай байгаа.
Шинэ ирсэн удирдлагатай ярьсан. Цахилгаан станцыг хамгийн түрүүнд хийх ёстой ажил гэж хэлж байсан. Бид энэ асуудлыг хурц тавьсан. Дэлхийн хамгийн том нүүрсний орд Өмнийн говьд байна. Хамгийн чухал хэрэглэгч Оюутолгой байна. Яагаад цахилгаан станцаа барихгүй байгаа юм бэ гэхээр бид бэлэн байна, сонирхол ч байна, та нар дэмжиж өг гэсэн. Засгийн газар шийдвэрээ яаралтай гаргах хэрэгтэй. Хөрөнгө мөнгөө ч босгосон байгаа гэж шинэ захирал нь хэлсэн” гэв.
Үр ашгийг хүртэх хугацааг 2037 он болгож, Дубайн гэрээгээр хойшлуулсан
УИХ-ын гишүүн Б.Бат-Эрдэнэ ” Монгол улсад үр ашиг ямар байх вэ гэдгийг тогтоох хэрэгтэй. Ажлын хэсэг нарийн шалгалт хийхэд бүх зөрчил тодорхой болж байна. Өөрсдийнхөө зүйлийг өөрсдөө хүүтэй мөнгөөр худалдалж авч байна. Ажлын хэсгээс нэг шийдвэр гаргах байх. Бодит дүгнэлт гаргах хэрэгтэй. Үр ашгийг хүртэх хугацааг 2037 он болгож, Дубайн гэрээгээр хойшлуулсан. Тэнд 40 сая долларын хэмнэлт гаргаж байхад энд хэдэн тэрбум төгрөгийн өрөнд орж байгаа нь анхны гэрээг хийсэн нөхдийн хариуцлагагүйгээс болж байна.
Ажлын хэсэг гараад шалгалт хийж байхад том аж ахуйн нэгжүүдийн татварыг хөнгөлөх хуулийг яагаад Засгийн газар оруулж ирдэг юм бэ гэж эсэргүүцэж байж хуулийн төслийг буцаасан. Харин Засгийн газар 20 хувийн татвар авах тэр заалтаа хэвээр үлдээж байх шиг байна”.
