Японы Эн-Эйч-Кэй телевиз бол танин мэдэхүйн талаар гайхалтай сайхан нэвтрүүлэг хийдэг телевиз билээ. Саяхан Эн-Эйч-Кэй телевизээр Японы эртний нийслэл Киотогийн Гион (祇園祭) баярын тухай баримтат кино гарч тус улсад уг баярынхаа үеэрээ Их Монгол улсын үеийн хивсийг хэрэглэдэг тухай ярив. Тус баярт эрчүүд чирдэг хөлөг онгоцноос зүүсэн эртний хос хивсийн уг гарлыг тогтоох, сонирхолтой судалгаа хийжээ. 200 жилийн тэртээ уг баярт хэрэглэх болсон эдгээр хивсний нэг нь голдоо чавганы модны зурган хээтэй тул хятадын соёлтой холбоотой хэмээн түүнийг үзэж, түүнтэй адил төстэй хивс Хятадын цуглуулгуудаар хайгаад олоогүй байна. Тэгээд тус хивсийг нэхсэн ноосыг мэргэжилтнүүд судалж үзээд, тэмээний ноос, сарлагийн хөөврөөр нэхсэн байх магадлалтай хэмээн таамагласан боловч хялгаснаас нь дээж авахад, тэмээний ноос, сарлагийн хөөвөртэй огт адилгүй байжээ. Үүний дараа тэр дээж хялгасанд генетикийн шинжилгээ хийхэд (монгол) үхрийн хөөвөр, Төвдийн чиру хэмээх бөхөнгийн хөөвөр байсан нь тодорхой болсон байна. Америкийн Метрополитан музейн мэргэжилтнүүд чавганы модыг XII-XIV зууны хятад хээнд тохиолддог гэж үзээд, хивсний эмжээрийн араб үсгэн хээг “Аллах” хэмээн уншиж, уг хивсийг Төвдийн өндөрлөгт ойрхон Хөхнуур орчмын хотон үндэсний дунд Их Монгол улсын үед урласан (Made in Great Mongolian State) гэж үзжээ. Мөн Төвдөөс олдсон, түүнтэй адил боловч баларч муудсан, нэгэн хуучин хивсний зураг Лондон дахь хивсний цуглуулгын музейд байдаг юм байна. Японд хадгалагдаж буй Их Монгол улсын үеийн тэдгээр хивс нь дэлхийн соёлын хосгүй өв болох бөгөөд Монголчууд бид ч гэсэн үүнийг тодорхой хэмжээнд судлан үзэж, соёлынхоо өвд бүртгэх хэрэгтэй гэсэн үүднээс үүнийг бичлээ.
