“Хүний эрүүл мэнд, байгаль орчинд сөрөг нөлөө үзүүлж байгаа, зөвшөөрөгдөх дээд хэмжээнээс их утаатай авто тээврийн хэрэгслийг Баянгол дүүргийн нутаг дэвсгэрт зорчихыг 2018 оны наймдугаар сарын 1-нээс хориглолоо.” гэсэн постер БГД-ийн цахим хуудсанд долдугаар сарын 25-наас хойш үзэгдэж, хугацаандаа ч хэрэгжиж эхэлж байгаа юм байх. Энэ нь үзлэг оношилгоо ямар байдалтай хийгддэг вэ гэдгийг илчилж буй тодоос тод жишээ болно. Угаас гуравхан хоног хэрэгждэг хууль, журамтай манай оронд хэчнээн хүн БГД-ийн авто замаар зорчих боломжгүй болохыг таашгүй. Тэр хэрээр БГД “соц”-ын үе шиг хөдөлгөөн багатай, сийрэг дүүрэг болох нь ээ.
Хичээлийн шинэ жил эхлэх үеэр Улаанбаатар хотын замын хөдөлгөөний эрчим эрс нэмэгддэг. Орон нутгаас ч иргэд хотыг зорьж, хичээлийн болон намар, өвлийн бэлтгэлээ базааж эхэлдэг. Тэгвэл яг энэ үеэр БГД зарим бас бус хүмүүст хаалттай бүс болж байгаа нь энэ. Харин харсаар байж яаж ч чаддаггүй тэр хэдэн нийтийн тээврийг нээрээ яах юм бол?
Өнгөрсөн оны долдугаар сараас эхэлж хийсэн хяналт шалгалтаар жишээ авахад, 381 тээврийн хэрэгслийг шалгахад 219 нь утааны үзүүлэлтээр тэнцээгүй байна. Тэгэхээр энэ шийдвэрээс болж бангадуулах жолооч нарын тоо эрс нэмэгдэж, багагүй хэмжээний торгууль төсөв рүү цутгах биз ээ. Хэрэв шийтгэлээс бултъя гэвэл тэдэнд дүүргийн дээгүүр нисэх нэг зам байгааг дахин сануулъя. Учир нь БГД бол Улаанбаатар хотын төвийн дүүрэгт тооцогддог гээд бодохоор ямар нэгэн байдлаар заавал энэ дүүргээр зорчих шаардлага гарах гээд байдаг юм. Тиймээс ядаж дүүргийн хилийн зурвасуудыг мэдээд авчихад утаа нь дэндсэн машинтангуудад хэрэгтэй л байх болов уу.
Ямартай ч ард иргэдийн эрүүл мэндийг бодолцсон гэх энэ шийдвэр ад үзэгдэх нь үү, ахиад өргөжин тэлэх нь үү гэдгийг ажиглацгаая.
