Өмнөд Солонгосын Ерөнхийлөгч Мун жэ Ин умард хөршдөө анхны айлчлалаа хийж байгаа бөгөөд энэ нь хоёр солонгосын тэргүүн нарын гурав дахь уулзалт болж байна. Түүнийг өнөөдөр Пхеньян хотын нисэх онгоцны буудал дээр хүндэт харуул жагсаж, Умард Солонгосын лидер Ким Чен Ун өөрийн биеэр угтан авсан бөгөөд тэд гар барин, тэврэлдэн уулзлаа. Харин энэ гар барилтыг онцлон хөндсөн нэгэн мэдээлэл олон нийтийн сүлжээнд нэлээд анхаарлын төвд орсон байна.
Солонгосын шилдэг сэтгүүлчийн судалгаа бүхий тайлбарт мэдээ нь сонирхолтой болохын зэрэгцээ энэ өдрийн хамгийн их хүн үзсэн мэдээ болжээ. Уг мэдээнд Монголын соёлыг эш татаж сэтгүүлч хөтлөгч Сун Сог Хи мэдээгээ ингэж эхлүүлсэн байна:
“Монголчууд хүний хөлөн дээр гишгэсэн бол гар барих хэрэгтэй. Монголд хүний хөлөн дээр гишгэнэ гэдэг маш бүдүүлэг хэрэг бөгөөд заримдаа маргалдах шалтгаан ч болж болдог. Нүүдэлчин ард түмэн нь хөлийг толгой ба зүрхнээс илүү үздэг. Хэрвээ хэн нэгний хөл дээр гишгэсэн бол “УУЧЛААРАЙ” хэмээн уучлал гуйн баруун гараа өгдөг.
Ингэснээр нөгөө хүн нь ч гэсэн уучлан эв нэгдлийг бэлгэдэн гар баридаг байна…….
Маргааш Хойд ба Өмнөд солонгос дахин гар барина” гэжээ.
Зарим хүмүүсийн тайлбараас харахад Солонгост гишгүүлсэн тал нь уучлалт гуйдаг гэнэ. Яагаад гэвэл хүний замд өөрөө саад болсон учраас гишгүүлчихлээ гэж үздэг байна. Хамгийн гол нь энэ мэдээний дараагаас “хэн нь хэнийгээ гишгээд байна. Хэн нь хэнээсээ уучлалт гүйх хэрэгтэй байна” гэдэг байдлаар асуудал үүсч солонгос иргэд дургүйцлээ илэрхийлж эхэлжээ. Түүгээр ч зогсохгүй энэ мэдээг бэлтгэсэн сэтгүүлчийг ард иргэдээсээ уучлалт гуйхыг хүртэл шаардсан гэж албан бус эх сурвалжууд хэлж байна. Харин монголчуудын хувьд хоёр байр суурьтай байна. Нэг хэсэг нь Монгол соёлоор оршил хийсэн нь сайхан сонсогдож байна гэж бахдаж байгаа бол нөгөө хэсэг нь доог тохуу болно гэж сэтгэгдлээ илэрхийлцгээж байна.
Ямартай ч ийнхүү хоёр Солонгосын эв нэгдлийг Монгол соёлоор тайлбарласан солонгосын номер нэг сэтгүүлчийн мэдээ олны анхаарлын төвд оржээ. Солонгосыг зорих монголчуудын цуваа уртаас урт үргэлжилж байгаагийн хэрээр тухайн улс оронд монгол ахуй, соёл хэдийнэ танил болдог биз ээ. 
