Өнгөрсөн долоон хоногт болсон онцлох үйл явдлыг тоймлон хүргэж байна.
УИХ-ын намрын чуулган нээлтээ хийв
Энэ сарын эхний өдөр УИХ-ын намрын чуулган нээлтээ хийв. Чуулганы нээлтэд Монгол улсын Ерөнхийлөгч, Ерөнхий сайд, Засгийн газрын гишүүд, Үндсэн хуулийн цэцийн дарга, зарим гишүүд болоод Улсын Их Хурлаас удирдлагыг нь томилдог болон ажлаа тайлагнадаг төрийн байгууллагуудын дарга нар, Монгол Улсад суугаа гадаад орнуудын Дипломат төлөөлөгчдийн газрын тэргүүн, олон улсын байгууллагын төлөөллүүд оролцсон бөгөөд энэ удаагийн намрын чуулганаар Үндсэн хуульд оруулах нэмэлт өөрчлөлт болон татварын багц хууль, улс төрийн намуудын тухай хууль, сонгуулийн тухай хуулиудийг авч хэлэлцэх юм.
Үндсэн хуулийн цэцийн дүгнэлтийг хэлэлцэхийг хойшлууллаа
Намрын чуулган ирэх оны улсын нэгдсэн төсөв, Үндсэн хуулийн цэцийн дүгнэлт зэрэг маш олон асуудалтайгаар хуралдаанаа эхлүүлээд байгаа билээ. Удахгүй Хэнтий аймагт нөхөн сонгууль болно. Тэгвэл Үндсэн хуулийн цэцээс Хэнтийн нөхөн сонгуульд хориг тавиад байгаа бөгөөд цэцийн дүгнэлтийг байнгын хорооноос олонхийн саналаар хүлээж авахгүй гэсэн шийдвэр гаргаж, нэгдсэн хуралдаанаас уг асуудлыг ирэх долоо хоногийн пүрэв гараг хүртэл хойшлуулав.
ЗТХЯ-ны сайдаар Я.Содбаатарыг томиллоо
ЗТХЯ-н дээр хүний амь нас хохирсон гэмт хэрэг гарсны улмаас тус яамны сайд Ж.Бат-Эрдэнэ ажлаас чөлөөлөгдөх өргөдлөө наймдугаар сарын эхээр өгсөн билээ. Гэвч энэ асуудал эцэслэн шийдэгдэлгүй байсаар хууль журмынхаа дагуу намрын чуулганаар хэлэлцэгдлээ. Өнгөрсөн долоо хоногт болсон УИХ-ын нэгдсэн хуралдаанаар гишүүдийн 76,3 хувийн саналаар Ж.Бат-Эрдэнийг үүрэгт ажлаас нь чөлөөлөв. Харин тус яамны сайдад МАН-ын Удирдах зөвлөлөөс нэр дэвшсэн Я.Содбаатарыг олонхийн бүлэг дэмжсэнэээр УИХ-ын баасан гарагийн нэгдсэн хуралдааны 90,3 хувийн саналаар түүнийг ЗХТЯ-ны сайдаар дэмжиж баталлаа.
Ирэх оны төсвийг баталлаа
2019 оны Төсвийн тухай хуулийн төсөлд төсвийн хөрөнгө оруулалтын төсөл, арга хэмжээ, барилга байгууламжийн дүнг 1.2 их наяд гаруй төгрөг байхаар төлөвлөсөн байна. Энэ нь 2018 оны батлагдсан түвшнээс хоёр дахин их дүн болж байгаа бөгөөд мөн ирэх оны төсвийн хөрөнгө оруулалтаар 117 сургууль, 143 цэцэрлэгийн барилгын ажил, 62 анхан шатлалын эмнэлгийн өргөтгөл, 34 сургуулийн дотуур байр зэрэг хатуу дэд бүтцийг санхүүжүүлэх юм байна. Мөн барих шилжүүлэх нөхцөлтэй концессын гэрээ шинээр байгуулахгүй гэж онцолжээ. Төсвийн хөрөнгө оруулалтад төлөвлөгөөгүй төслийг багтаахгүй байх шаардлагатайг УИХ-ын зарим гишүүд анхааруулж байгаа юм. Мөн сөрөг хүчний зүгээс хөгжлийн гол баримт бичгүүдийн зорилттой уялдуулж төсвийн хөрөнгө оруулалтыг эрэмбэлэх шаардлагатай гэсэн байр суурийг илэрхийллээ.
АН-ын бүлэг төсвийн хэлэлцүүлгээр 5 хоногийн завсарлага авлаа
Өнгөрсөн долоо хоногийн УИХ-ын нэгдсэн хуралдаанаар 2019 оны улсын нэгдсэн төсвийн тухай хуулийг хэлэлцлээ. Хуулиараа бол төсвийг ирэх 11 дүгээр сарын 15 гэхэд батлах учиртай. Төсвийн хэлэлцүүлгийн явцад УИХ-ын гишүүн Б.Пүрэвдорж 5 хоногийн завсарлага авах санал гаргасныг хүлээж авлаа.
Ерөнхийлөгч Х.Баттулга Монгол улсыг засаглалын бүрэн хямралд орсон гэж дүгнэв
2018 оны УИХ-ын намрын чуулганы нээлт дээр Монгол улсын Ерөнхийлөгч Х.Баттулга оролцож үг хэлэхдээ Монголын улс төр засаглалын бүрэн хямралд орсон байна гэж дүгнэлээ. Тэрээр “Манай одоогийн төрийн тогтолцооны чадвар, боломж нэгэнт бүрмөсөн шавхагджээ. Бид тогтолцоогоо өөрчлөхгүйгээр юу ч өөрчлөгдөхгүй юм байна. Зүйрлэбэл, бидний хамтран босгосон өрх гэрийн минь суурь, тулгуур баганад алдаа гарч, нурах эрсдэл үүсчихээд байхад бид нурааж, шинээр суурь цутгах, бат бөх тулгуур хийхийн оронд ганц нэг нэмэлт бэхэлгээ хийх, эрсдэл арилсан мэт сэтгэгдэл төрүүлэх гэж өнгөц засвар, будаг түрхэх төдий байдлаар өнөөг хүртэл аргалж иржээ. Одоо аргалж, хуурч хүчрэхгүй хэмжээнд хямрал тулж иржээ. Өрх гэр маань хэдийнээ хазайж эхэлсэн байна” гэж чуулганы танхимд хэлэв. Энэ нь өнөөгийн манай улсын төрийн тогтолцоо нэгэнт буруу замаар явж байгаа тул үүнийг нэн даруй өөрчлөх хэрэгтэй гэсэн үг байлаа. Харамсалтай нь түүний хэлсэн энэ үгийг УИХ д суудалтай хоёр намын төлөөлөл огтхон ч дэмжээгүй бөгөөд гишүүдийн олонх нь Монгол улс Ерөнхийлөгчийн засаглалтай гэхээсээ илүүтэй сонгодог парламентын засаглалтай байх нь зөв гэж үзэж байгаагаа энэ үеэр илэрхийлсэн юм.
Тагнуулаар амьсгалсан “супер” долоо хоног
Өнгөрсөн долоо хоногийн нэгэн сүр дуулиантай үйл явдлын нэг нь монгол улс даяараа тагнуулаар амьсгалсан үйл явдал болж өнгөрсөн билээ. Өнгөрөгч мягмар гарагт тагнуулын ерөнхий газрын ажилтнууд олноо гадаадын иргэд олноор амьдардаг гэх “Голомт” хотхоны С блокын орон сууцны гадаа тусгай ажиллагаа явуулсан бөгөөд эх сурвалжийн мэдээлснээр энэхүү тагнуулын хэрэгт уг хотхоны С блокт амьдарч байсан БНХАУ-ын нэг иргэн, хоёр Монгол иргэнийг тагнуулын ажиллагаа явуулсан хэргээр баривчилсан юм. Хамгийн сүүлд авсан мэдээллээр өдгөө тэдгээр сэжигтнүүдийг Улаанбаатар болон Төв аймгийн хорих ангид саатуулсан гэх мэдээлэл байна.
Нэгдүгээр дунд сургуулийн захирал “авлига” авч байгаад газар дээрээ баригдав
Монгол улсад өдгөө авлигын асуудал наад захын жирийн асуудал болсныг дээрх энгийн жишээнээс харж болно. АТГ-ын албан ёсны эх сурвалжаас мэдээлснээр нийслэлийн нэгдүгээр сургуулийн захирал Г.Бум-Эрдэнийг өнгөрсөн пүрэв гарагийн орой авлига авсан гэсэн үндэслэлээр баривчилжээ. Түүнийг хүүхэд элсүүлж авахдаа мөн дунд ангид өөр сургуулиас хүүхэд шилжүүлэн авахдаа бусдаас авлига авдаг байсан үндэслэлээр саатуулсан байна. Тэрээр баривчлагдах үедээ бусдаас хээл хахууль авч байсан бөгөөд мөн авлига өгсөн хүнийг нь хамт баривчилсныг эх сурвалж мэдээллээ. Нийслэлийн нэгдүгээр сургуулийн захирал Г.Бум-Эрдэнэ нь урьд өмнө нь хээл хахууль авдаг байсан бөгөөд ийм үйлдэл удаа дараа гарч байсан аж.
АТГ-аас хийсэн хэвлэлийн бага хурлын үеэр “Нэгдүгээр сургуулийн хамран сургах тойргийн хаягийн бүртгэл дээр 2017 оны хагас жилээс хойш шилжиж ирсэн, хүүхэд дангаараа, эсхүл ээжтэйгээ шилжиж ирсэн, оршин суудаг гэдгээ нотолж чадахгүй зэрэг асуудалтай 58 хүн байна. Бүртгэл, элсэлтийн үйл ажиллагааг үргэлжлүүлэн шалгана” гэж мэдээлж байсан билээ.
