2019 онд л бид түгжрэлээс ямар нэг хэжмээгээр гарахгүй бол нийслэлчүүдийн тухайд мөн л ихээхэн хэмжээний алдагдал хүлээсээр байх болно. Зам өргөсгөөд, гүүр бариад яаж байна вэ? Болохгүй л байгаа биз дээ. Түгжрэлийг багасгах ажлын хэсэг л гэнэ үнэндээ өчнөөн жил хуралдсан байх, түгжрэл буурсангүй.
Хотоо нүүлгэ, оюутнуудыг гарга, метрогоо барь гэж хүн болгон л хэлдэг.
Одоо тэгээд яах юм бэ. Автомашины тоо сардаа л 6000 аар нэмэгдэж байна. Жилдээ 70.000-80.000 машин нэмэгдэж байна гэсэн үг. Гэтэл бидэнд авсан арга хэмжээ байдаггүй. Нөхдүүд 2025 онд Улаанбаатар хотын автомашины тоо нэг саяд хүрнэ гэсэн тооцоо яриад байгаа.
Өнгөрсөн 5 дугаар сард НИТХ ын тэргүүлэгчдийн хурлаас Замын хөдөлгөөний хэт ачааллыг багасгах тухай 70 тоот тогтоол гарсан.
НИТХ-ын даргын хувьд энэ тогтоол замын ачааллыг бууруулахад үр дүнгээ өгнө гэж тооцож байсан ч хэрэгжүүлэх ёстой агентлагууд нь, түгжрэлийг бууруулах ажлын хэсэг нь хангалттай ажиллаж чадсангүй.
Нөхцөл байдлыг тодорхой болгох зорилгоор НИТХ-ын даргын зүгээс хоёр ч удаа тогтоолын хэрэгжилтийн ажлын явцыг сонсох хурал болсон боловч өнөө л гүүр, ийм ч зам, тийм ч хаалтыг авсан гээд л тайлагнаад байдаг. Яг сонсонгуут хот түгжрэлгүй болчихсон юм шиг санагдана, үнэндээ тийм биш, зүгээр л үр дүнгүй баахан ажил, зардал гаргасан байдаг. Яг хэдэн хувиар яаж буурсан бэ гэдэг тооцоолол байдаггүй, байлаа ч буурсан нь иргэдэд мэдрэгдэхгүй л бол тэгээд л үр дүнгүй гэсэн үг юм.
“Нийгмийн хэрэгцээ шаардлагад нийцүүлсэн хийх ёстой ажлыг дорвитой хийж чадахгүй байгаа тул ажлын хэсгийг хуралдуулж өмнөх хурал, зөвлөгөөний үеэр хөндөгдсөн асуудал, өгсөн үүрэг даалгаврын биелэлтийг сонслоо. Биелэлт хангалтгүй, дутагдалтай асуудал цөөнгүй байна. Үр дүн шаардахаар хөрөнгө, мөнгө нэхэхээ болих хэрэгтэй. Авто зогсоолыг иргэдэд нээлттэй болгоход хөрөнгө шаардлагагүй. Энэ мэтээр хэрэгжүүлж болох арга хэмжээ олон бий” гэж НИТХ -ын дарга ажлын хэсгийнхэнд хандаж хэлсэн.
“Шар дөрвөлжин яасан бэ” дутуу эхлүүлсэнээс хэрэгжихээ больсон. Төрийн байгууллага, худалдаа үйлчилгээний байгууллагын авто зогсоолыг иргэдэд чөлөөлөх ажил хийгдсэнгүй. Хорооллын доторх хөдөлгөөний түгжрэлгүй болгож нэг чигийн болгох ажил ч мөн хийгдсэнгүй … гэх мэт олон ажлууд таг зогсов.
Тэгээд одоо яах юм бэ гэж үү?
Түгжрэлийг шийдвэрлэх биеэ даасан бүтэц, хот төлөвлөлт, тээврийн болон замын зохион байгуулалтын чиглэлийн мэргэжилтэн, судлаач, эрдэмтдийн баг ажиллах хэрэгтэй нь харагдаж байна. Автомашины тоон огцом өсөлт дээр хязгаар тавихаас өөр замгүй болж байна. НИТХ-ын 70-р тогтоол дээр заагдсан ажлууд болон энэ тогтоолд багтаагүй маш олон ажлууд байгааг нэг бүрчлэн хэрэгжүүлэх л шаардлагатай байна.
