Монгол улсын эдийн засаг өсөх хандлагатай байна

Зүүн Ази, Номхон далайн бүс нутгийн эдийн засгийн өсөлт 2018 онд 6.3 хувь байсан бол 2019-20 онуудад 6 хувь болж бага зэрэг саарах төлөвтэй байгаа нь гадаад эрсдэл болон БНХАУ-ын эдийн засгийн өсөлт алгуур саарч байгаагаар голлон тайлбарлагдаж байгаа юм. Гэсэн хэдий ч үр дүнтэй бодлого, эдийн засгийн гол үзүүлэлтүүд өндөр байсан ялангуяа эдийн засгийн төрөлжилт, ханшийн уян хатан байдал, бодлогын орон зай сайн байсны нөлөөгөөр нь тус бүс нутгийн орнууд 2018 оны санхүүгийн зах зээлийн хэлбэлзлийг амжилттай даван туулсан гэдгийг онцлох нь зүйтэй.
Худалдааны тодорхой бус байдал харьцангуй намжмал байгаа ч дэлхийн худалдаа цаашид ч бага зэрэг саарах төлөвтэй байна гэж Дэлхийн банкны тайланд онцолжээ. Бүс нутгийн ихэнх орнуудын дотоод эрэлт сайн байсан нь экспортын сааралтын эдийн засагт үзүүлэх нөлөөг зөөлрүүлсэн болохыг тайланд мөн дурдсан байна.
БНХАУ-ын эдийн засгийн өсөлтийн бодлогод суурилсан сааралтын үр дүнд 2018 онд 6.6 хувь байсан өсөлтийн түвшин 2019-20 онд 6.2 хувь болон буурахаар байна. Харин Зүүн Ази, Номхон далайн бүс нутгийн жижиг орнуудын эдийн засгийн өсөлтийн төлөв эерэг хэвээр байх бөгөөд дэд бүтцийн бүтээн байгуулалтын төслүүд Монгол Улсын эдийн засгийн өсөлтийг хурдасгах төлөвтэй байна гэж үзсэн байна. Тус тайланд Монгол улсын эдийн засгийн өсөлт 2018 онд 6.9% байсан бол энэ онд 7.2% болж өсөх төлөвтэй байна гэж дурджээ.