Ойрын хугацаанд шатахуун үнэ удаа дараа нэмэгдсэнтэй холбогдуулан Шудрага өрсөлдөөн, хэрэглэгчийн төлөө газраас шатахууны худалдаа эрхлэгч байгууллагуудад шалгалт хийсэн байна. Энэ удаагийн шалгалтад 17 аж ахуйн нэгж хамрагдсан бөгөөд эдгээр байгууллага нь үндэслэлгүйгээр шатахууны үнийг нэмсэн болохыг тогтоожээ.
Шалгалтыг өнгөрсөн 3-р сарын үнийг одоо байгаа үнэ болон ОХУ-ын үнэтэй харьцуулан гаргасан байна.
Монгол улсад худалдаалагдаж буй үнэ:
| Шатахуун | 2019.03.26 | 2019.05.28 | Зөрүү |
| А-80 | 1736төг/л | 1875төг/л | 139төг |
| АИ-92 | 1819төг/л | 1980төг/л | 161төг |
| Дизель түлш | 2348төг/л | 2445төг/л | 97төг |
Харин ОХУ-ын “Роснефть” компанийн хилийн үнэ:
| Шатахуун | 2019.04 сард | 2019.05 сард | Зөрүү |
| А-80 | 613ам.дол/тн | 665ам.дол/тн | 52ам.дол |
| АИ-92 | 643ам.дол/тн | 695ам.дол/тн | 52ам.дол |
| Дизель түлш | 623ам.дол/тн | 640ам.дол/тн | 17ам.дол |
Эндээс харахад шатахуун, түлшний үнэ тонн тутамдаа 17-52 ам.доллар-аар өсчээ.
Хэдийгээр гадаад хилийн үнэ өсөлттэй байгаа хэдий ч жижиглэн борлуулалтын үнийг 97-161 төгрөгөөр нэмэгдүүлэх нөхцөл үүсээгүй гэдэг нь харагдаж байна.
Мөн компаниудын үйл ажиллагааны зардлыг хянаж үзэхэд АИ-92 автобензин литр тутамдаа дунджаар 30-100төг, дизель түлш литр тутамдаа дунджаар 270-289 төгрөгийн ашигтай байхад жижиглэн борлуулалтын үнийг нэмэгдүүлсэн нь тогтоогдсон байна.
Одоогоор гзрын тосны бүтээгдэхүүний зах зээлд монополь байдалтай аж ахуй нэгж тогтоогдоогүй учир ШӨХТГ-аас шатахууны үнийг шууд хянах эрх үүсэхгүй байгаа юм. Өөрөөр хэлбэл, ШТС-ууд үнээ шалтгаангүйгээр нэмсэн нь тогтоосон ч түүнийг хэрхэн зохицуулах эрх нь ШӨХТГ-т байхгүй байгаа гэсэн үг юм.
Хуулийн дагуу бол ШӨХТГ нь зөвхөн зүй ёсны монополь байдалтай аж ахуй эрхлэгчийг судлан тогтоож, зах зээлд нийлүүлж байгаа бараа, бүтээгдэхүүний үнийг хянаж, зохицуулалт хийдэг байгууллага.
