АТГ-аас сар бүр зохион байгуулдаг хэвлэлийн хурлаа өнөөдөр хийлээ. Энэхүү хурлаар төрийн алба хаагчид их хэмжээний бэлэн мөнгийг авлигад авсан төрийн алба хаагчдын бичлэгийг ил болгосон юм.
Бичлэгт Авто тээврийн үндэсний төвийн хэлтсийн дарга Д.Батбаяр болон МХЕГ-ын Экспорт, импорт, хилийн хорио цээрийн хэлтсийн дарга А.Аззаяа, Баярсайхан нарын албан өрөөнд хийж буй шалгалтыг харуулжээ. Шалгалтын үеэр тэдний албан өрөө, гэрээс их хэмжээний бэлэн мөнгө гарчээ.
АТГ-ын Урьдчилан сэргийлэх, соён гэгээрүүлэх хэлтсийн дарга Т.Баярхүү “Зарим хэргийг шүүхээс эцэслэн шийдээгүй байхад олон нийтэд улс төржүүлсэн мэдээлэл тарааж байна. Зарим улс төрч худал мэдээллийг зориуд түгээн, олон нийтийг төөрөгдүүлж байна. Энэ үйлдлээ ил цагаан хийх боллоо. Мөрдөн шалгалтад саад учруулах, АТГ бусдын нөлөөн дор ажилладаг гэх ойлголтыг өгөх гэсэн оролдлого юм. Энэ мэтээр худал мэдээлэл түгээх нь иргэдийн итгэлийг алдагдуулах зорилготой.
Салхитын мөнгөний ордтой холбоотой хэргийг мөрдөн шалгах явцад илэрсэн зарим баримтыг ҮАБЗ-д танилцуулсан. Үүний дараа нэр бүхий 17 шүүгчийг түдгэлзүүлсэн” гэлээ.
Авто тээврийн үндэсний төвийн Тээвэр зохицуулалтын хэлтсийн дарга Д.Батбаяр олон улсын ачаа тээврийн зуучийн эрх олгох тусгай зөвшөөрлийг “Эрдэнэс тээвэр” компанийн ачааны машинуудад олгох замаар 2017 оны 8-11 сарын хооронд тус компаниас 57.5 сая төгрөг авчээ. Түүний албан өрөөг нэгжихэд дугтуйнд их хэмжээний бэлэн мөнгө байсныг илрүүлсэн юм.
Түүнийг шүүх хурал 2018 оны зургаадугаар сард болж, нийтийн албанд томилох эрхийг 3 жилээр хасжээ. Мөн 6500 нэгж буюу 6.5 сая төгрөгийн торгох ялаар шийтгэн, хууль бус орлого болох 62.5 сая төгрөгийг улсын орлого болгосон байна.
МХЕГ-ын Экспорт, импорт хилийн хорио цээрийн хяналтын хэлтсийн дарга Н.Баяртсайхан албаны чиг үүргээ хэрэгжүүлсний хариуд эсхүл хэрэгжүүлэхийн тулд бусдаар дамжуулан хахууль авсан байж болзошгүй гэсэн үндэслэлээр түүний өрөөнд ийнхүү нэгжлэг хийсэн байна.
Мөрдөн шалгах ажиллагааны хүрээнд МХЕГ-ын албан тушаалтнууд болох Н.Баярсайхан, Э.Аззаяа, Б.Элдэв-Очир, С.Бүрэнтөгс, Ш.Тэгвандан нар нь Монгол улсын хилээр хүнсний бүтээгдэхүүн экспортлох, импортлох зөвшөөрөл олгох чиг үүргээ биелүүлэхдээ түргэн муудах болон хүнсний бүтээгдэхүүн экспортлох, импортлох зөвшөөрөл хүссэн аж ахуйн нэгжүүдийн зөвшөөрлийг олгохгүй удааж, хясан боогдуулах замаар нийт 1 тэрбум орчим төгрөгийг хахуульд авсан нь тогтоогджээ.
