Монгол эрчүүд эмэгтэйчүүдээсээ 10 жилээр бага насалдаг

\”Эрүүл Эр хүн , Аз жаргалтай гэр бүл\” сэдэвтэй Ази, Номхон далайн орнуудын Эрэгтэйчүүдийн эрүүл мэнд, насжилт VIII 8-р чуулган боллоо. Дэлхийн ямар ч улс оронд, тэр тусмаа Монгол улсад чухал сэдэв, тулгамдсан асуудал болоод байгаа эрэгтэйчүүдийн эрүүл мэндийн асуудлаар олон орны эрдэмтэн, эмч судлаачид уулзан ярилцаж, мэдээлэл, тушлагаа солилцсон юм.

ДЭМБ-ын Хөтөлбөрийн ахлал зохицуулагч Др Вүүжин Лью чуулганы нээлт дээр хэлсэн үгэндээ \”Ямар ч оронд эмэгтэйчүүд эрэгтэйчүүдээс илүү насалдгийг бид мэднэ. Наслалтын энэ зөрүү дэлхийн дунджаар 3-6 жил байдаг нь тогтоогдсон. Харин Монголд 2014 онд хийсэн судалгаагаар Монгол эрэгтэй хүн Монгол эмэгтэй хүнээс бараг 10 жилээр бага насалдаг байна. Энэ бол том зөрүү бөгөөд шийдвэрлэх ёстой асуудал\” гэлээ.

Монгол эрчүүд эмэгтэйчүүдээсээ 10 жилээр бага насалдгийн учир шалтгаан энгийн аж.  Монгол эрэгтэй хүн үхэлд хүргэж болохуйц эрсдлүүдэд эмэгтэйчүүдээсээ хавьгүй их өртөмтгий байдаг. Тухайлбал, Монгол эрчүүдийн бараг тэн хагас нь тогтмол тамхи татдаг мөн судалгаанд оролцсон эрэгтэйчүүдийн тэн хагас нь архи хэрэглэдэг гэж хариулсан байна. Зам тээврийн гурван ослын нэг нь хурд хэтрүүлсэн, согтуугаар тээврийн хэрэгсэл жолоодсоны улмаас гарч байна. Ийм зан үйлтэй хүмүүс нь голдуу эрэгтэйчүүд юм.

Үүнээс гадна монгол эрэгтэйчүүд зүрх судасны өвчин, хавдар, осол гэмтлээс болж зуурдаар нас барах нь их байдаг. Мөн халдварт сүрьеэгийн тохиолдлууд Монгол эрэгтэй хүнд эмэгтэй хүнтэй харьцуулвал тав дахин их байна, Энэ байдлыг өөрчлөх шийдэл, арга зам нь ердөө л амьдралынхаа хэв маягаа өөрчилж, хорт зуршлаасаа татгалзах гэдгийг судлаачид зөвлөж байна. Үүнд тамхи татахгүй байх, татдаг бол бүр мөсөн хаях, архийг хэмжээтэй хэрэглэх, хүнсэндээ тогтмол жимс ногоо хэрэглэж байх, өдөртөө багадаа 30 минут дасгал хийж байх, согтуугаар жолоо барихгүй байх, машинд суухдаа аюулгүйн бүсийг заавал зүүж байх гэсэн энгийн мэдлэгийг хүн болгоны дадал болгохыг ДЭМБ зөвлөж байна.

 Эх сурвалж: ДЭМБ