01. Манай улс Уханьд байгаа иргэдээ маргааш тусгай нислэгийн онгоцоор авчрахаар болжээ. Үүнийг зарчмын хувьд эсэргүүцэх хүн бараг байхгүй болов уу? Гол нь ариун цэвэр халдвар судлалын үүднээс ямар урьдчилан сэргийлэх арга хэмжээ авах тал дээр санаа зовнигсод олон байгаа байх аа.
02. Анагаахын салбар өндөр хөгжсөн Япон улсын Уханиас буцаан авчирсан иргэдийн дунд байсан гурван хүн халдвартай болох нь илэрсэн тухай мэдээллийг та бүхэн уншсан уу? Солонгост ч бас тийм жишээ гарсан тухай мэдээ чих дэлслээ.
03. Франц улс өөрсдийн иргэдийг хятадын өөр халдвар багатай нутаг орон руу нүүлгэн шилжүүлж сэжигтэй үеийг өнгөрөөгөөд эх орон руугаа авчрах тухай хувилбар яригдаж байсан. Австрали улс ойролцоох хүн ам цөөтэй зэлүүд аралд өөрсдийн Уханиас авчирсан иргэдийг 14 хоног байлгах тухай шийдвэр гаргаад ажиллаж байна.
04. Монгол улс 3-хан сая хүн амтай. Хүн амын тал шахам хувь нь ганц УБ- хотод амьдардаг онцгой нөхцлийг харгалзан үзээд халдварын голомтоос ирсэн онгоц болон зорчигсдыг хотоос зайдуу хүн ам цөөнтэй сууринд байршуулж халдвар авсан байх сэжигтэй хугацааг өнгөрөөж болох хувилбарыг би нэг бичлэгтээ дэвшүүлж байсныг та бүхэн санаж байгаа байх аа.
05. Цөөнгүй уншигчид, тэр дундаа албаны байрын хүмүүс тэр бичлэгийн дараа ихэд дайрч давшилсан байдалтай үг яриа, өнгө аяс цухалзуулж байсан. Угтаа бол бүр өнгөрсөн оны 12 дугаар сарын 08-ны өдөр Ухань хотын найман иргэн нэг эмч энэ айхтар өвчний талаарх мэдээллийг хятадын сүлжээнүүдээр анх тараасан юм шүү дээ. Тэр үед л Хятадын удирдлага болон Ухань хотын засаг захиргаа зөв зүйтэй сануулгыг нь нааштай хүлээн аваад одоо хэрэгжүүлж байгаа шиг шуурхай арга хэмжээ авчихсан бол байдал ингэтлээ даамжрах байсан нь юу л бол?
06. Харин ч тэр бодит байдлыг олон түмэнд шуурхай зөв зүйтэй мэдээлсэн есөн нөхрийг орон нутгийн амрыг хамгаалах газрын ажилтнууд баривчлан хорьж байсан нь одоо нэгэнт нийтэд ил болжээ. Төв орон нутгийн удирдлагын хөндий хөшүүн хандлага, хүчний байгууллагын муйхар арга барилын уршгаар бүтэн нэг сар гаруй хугацааг алдсан төдийгүй өвчний голомт болох Ухань хотоос 5 сая гаруй хүн Хятад болон дэлхийн олон улс оронд чөлөөтэй зорчих үүд хаалга нээгдсэний горыг одоо дэлхий нийтээрээ амсаж байна. Чухам ийм санаа сэдлийн үүднээс “Нью Йорк таймс” сонинд “Хятадын авторитар дэглэмийн хор уршгийг дэлхий даяараа амсаж байна” гэсэн утгатай нийтлэл саяхан хэвлэгдсэнийг гадаад хэлтэй нөхөд олж уншсан байх аа.
07. “Хятад улсад сүүлийн 3 жил хэрэглэсэн цементийн хэмжээ АНУ-ын хорь гаруй жилийн нийт хэрэглээтэй тэнцэж байна. Ерөнхийлөгч Трамп Хятадын төрийн тэргүүн Си Зинь Пинг “Гайхамшигтай удирдагч” хэмээн бахаддаг бол Нью Йорк дарга асан ноён Блүүмбэрг түүнийг “дарангуйлагч” биш болохыг батладаг. Бээжин хотод төрсөн хүүхдийн амьд байх баталгаа Вашингтон хотод төрсөн хүүхдээс илүү. АНУ-ын зарим ядуусын дүүрэгт төрж байгаа нялх хүүхдийн амьдрах баталгаа Кампучи, Бангладешаас доогуур байгаа нөхцөлд бид бусад улс орны эрүүл ахуйн салбарын дотоод хэрэгт хөндлөнгөөс оролцон зааж зураад байх утгагүй юм. Гэхдээ л энэ удаа дэлхий дахинаараа Хятадын авторитар дэглэмээс үүдэлтэй хор уршгийг амсаж байгаа тал дээр дуугүй байж болшгүй.” хэмээн уг нийтлэлд бичжээ.
08. Дээр дурдсан жишээнээс өрнөдийн сэтгүүлзүйн бичлэгийн хурц, тод өнгө аясын зах зухаас та бүхэн бага сага зүйл ойлгосон байх аа. Өнөөдөр хуралдаж байгаа ҮАБЗ-ийн хуралдаанаас иргэдийн санаа зовниод байгаа асуудлыг тусган нааштай шийдвэр гаргана хэмээн найдах л үлдлээ. Иргэд Ухань хотоос ирэх Монголчуудаасаа жийрхэн сэжиглэх гэхээс илүүтэй мэргэжлийн бус удирдлагатай холбогдох салбарын үйл ажиллагааны хариуцлагагүй, назгай байдлаас илүү их болгоомжилж байж мэдэх юм шүү.
