УИХ-ын Аюулгүй байдал, гадаад бодлогын байнгын хороо, Нийгмийн бодлогын байнгын хороодын хамтарсан хуралдааны үеэр манай улс дотооддоо халдвар гарсан тохиолдолд бэлэн байдал хэрхэн хангагдсан талаар УИХ-ын гишүүн Ж.Чинбүрэн тодрууллаа.
Эрүүл мэндийн сайд Т.Мөнхсайхан “Эрчимт эмчилгээний орны асуудал маш чухал. Хүн амын 1 хувьд халдвар тархлаа гэж тооцоолоход бидэнд эрчимт эмчилгээний 1500 орчим ор шаардлагатай. Одоогийн байдлаар эрчимт эмчилгээний 400-450 ор байгаа бөгөөд нэмээд дор хаяж 1000 ор бэлтгэх шаардлагатай.
Эрчимт эмчилгээний ор гэдгийг тодруулж хэлбэл, эрчимт эмчилгээнд хэрэглэгдэх төхөөрөмжүүд буюу амьсгалын аппарат, хяналтын монитор гэх мэтийг иж бүрнээр нь 600-г хангахаар Азийн хөгжлийн банк, Дэлхийн банкны зээл авч, захиалгаа хийчихсэн. Ирэх саруудад тэдгээр тоног төхөөрөмж ирнэ. Бэлтгэл ажлыг хангаж байгаа хэдий ч ямар ч тохиолдолд бэлэн байхын тулд бүх шатны эмнэлгүүдийн чадавхыг сайжруулах нь чухал. Ирэх онуудад эмнэлгийн тоног төхөөрөмжийн хангалтыг хийснээр ямар ч тохиолдолд бэлэн байх болно гэсэн бодолтой байна” гэсэн хариултыг өгсөн юм.
Мөн манай улсын хувьд ECMO буюу амьсгал, зүрх судас орлуулагч аппарат өмнө нь байгаагүй. Харин сая уг аппараатаас нэгийг авч Улсын Нэгдүгээр төв эмнэлэгт байршуулж, хэрхэн ашиглах талаар сургалтуудыг нь явуулсан байна. Уг аппаратыг маш хүнд тохиолдолд хэрэглэдэг бөгөөд энэ аппаратны нэг удаагийн хэрэгслүүд их өндөр өртөгтэй. ECMO аппаратыг зөвхөн коронавирусийн үед гэлтгүй амьсгал, зүрх судас орлуулах шаардлагатай бусад тохиолдолд ашиглах бөгөөд ахин нэг аппарат авахаар захиалсан нь арваннэгдүгээр сард ирэх юм байна
