БНХАУ-ын эрх баригчид үндэсний соёл, уламжлалаа хамгаалах үүднээс сүүлийн жилүүдэд гаднын улсын соёлын импортод хүчтэй хяналт тавих болсон.
Тэгвэл Хятадын Хэвлэл мэдээллийн хяналтын байгууллага пүрэв гаригт телевизийн цэнгээнт хөтөлбөрүүд эмэгтэйлэг дүр төрх бүрдүүлсэн эрэгтэй алдартнуудыг нэвтрүүлэгтээ оролцуулахгүй байх, хязгаарлах тухай удирдамжийг танилцуулсан байна.
Дэлхий дахинд поп соёл болон Өмнөд Солонгосын “K-Pop” соёл тархсан нь Хятадын соёл, урлагийн салбарт ч мөн хүчтэй нөлөөг үзүүлсэн. Улмаар Бээжингийн эрх баригчид үндэсний соёлоо хамгаалах үүднээс хэт барууны болон поп соёлын зарим хэм хэмжээнд хатуу хяналт тогтоох болсон. Мөн сүүлийн жилүүдэд Хятадын иргэд гаднын соёл телевизийн цэнгээнт хөтөлбөрүүдээр дамжин залууст хүрч, үндэсний соёл, бахархалд нөлөөлж байна гэж шүүмжлэх болжээ. Тиймээс дээрх шийдвэр нь Хятадын эрх баригчдын хувьд барууны соёлыг хязгаарлах болон тус улсын соёл урлагийн салбарыг хянах дараагийн томоохон алхам болсон юм.
Хятадын соёл урлагийн салбарт зөөлөн зан ааштай, эмэгтэйлэг төрхтэй жүжигчид болон дуучид алдартай болж, залуусын дунд тренд дүр төрхийг бүрдүүлэх болсон. Тэдний шүтэн бишрэгчдийн дийлэнх нь өсвөр үеийн охид байдаг. Гэвч ахмад үеийн төлөөлөл Хятад эрчүүдийн уламжлалт дүр төрхөөс өөр шинэ үеийн залуусыг хурцаар шүүмжлэх болсон юм.
Хятадын уламжлалт соёлд эрэгтэй хүний эршүүд бус хандлагыг “Niang pao” буюу хулчгар гэж тодорхойлогддог. Харин БНХАУ-ын төрийн мэдлийн “Xinhua” агентлаг анх 2018 онд эмэгтэйлэг дүр төрхтэй, бариу өмд өмссөн эрчүүдийг тодорхойлохдоо “Niang pao” гэх нэршлийг ашиглаж, олон нийтийн хэвлэл мэдээллийн хэрэгслүүд болон интернэт орчинд эршүүд дүр төрхийг илүүд үзэх ёстой гэж байв. Улмаар Хятадын төрийн мэдлийн хэвлэлүүд залууст чиглэсэн хөтөлбөрүүддээ поп оддоос илүүтэй цэрэг арми, эх оронч үзэл, хүчирхэг эршүүд дүр төрхөд анхаарах болсон.
Түүнчлэн энэ оны эхээр Хятадын нөлөө бүхий улстөрчид эрчүүдийг хэт эмэгтэйлэг болгохоос урьдчилан сэргийлэх тухай санаачилгуудыг гаргасны хүрээнд тус улсын Боловсролын яам дунд болон ахлах сургуулиудад биен тамир, спорт, гоо зүйн боловсролыг илүү үр дүнтэй олгох хөтөлбөрийг эхлүүлсэн билээ.
Эх сурвалж: Vice
