Хуулийн төслийг санаачлагч УИХ-ын гишүүн Т.Аюурсайхан “Монгол Улсад бүртгэлтэй Жолоочийн хариуцлагын албан журмын даатгалд хамрагдвал зохих авто тээврийн хэрэгслийн тоо 2020 оны эцсийн байдлаар 900 мянга орчим байгаагаас 650 мянга нь жолоочийн хариуцлагын албан журмын даатгалд хамрагджээ. Зам тээврийн осол гаргасан жолоочийн тоо 2020 оны байдлаар 27983 байгаа ба ослын тоо сүүлийн есөн жилийн хугацаанд энэ түвшинд байна. Энэ хууль хэрэгжиж, хохирогчид нөхөн төлбөр олгож эхэлсэн 2012-2020 оны хооронд 231201 хүнд 121 сая төгрөгийн нөхөн төлбөрийг даатгуулагчдын төлсөн хураамжийн орлогоос олгосон байна. Энэхүү хохирлыг ямар аргачлалаар хэрхэн үнэлгээ хийх нэгдсэн журам ч батлагдаагүй байна. Зам тээврийн осол гаргасан этгээд нийт даатгуулагчдын 4-5 хувийг эзэлж байна.
Үүнээс харахад Жолоочийн даатгалын тухай хууль хэрэгжиж эхэлснээс хойш зам тээврийн осол, зөрчлийн тоо буураагүй байгаа нь уг хууль тээврийн хэрэгсэл эзэмшигчийн хариуцлагыг сайжруулах, зам тээврийн ослоос урьдчилан сэргийлэх талаар дорвитой нөлөөлөл үзүүлээгүй болох нь харагдаж байна. Иймд жолоочийн даатгалын одоогийн тогтолцоог өөрчилж, замын хөдөлгөөний аюулгүй байдлыг хангах цогц арга хэмжээ авах, жолооч нарыг хариуцлагажуулах, соён гэгээрүүлэх, авто жолооны сургалтын системд чанарыг анхаарах, давтан сургалтыг дадлагажуулахад анхаарч даатгалтай холбох, ослоос урьдчилан сэргийлэх ажлыг эрчимжүүлэх, осол гаргасан жолоочтой тооцох хариуцлагыг нэмэгдүүлэх, осол гаргаагүй жолоочийг урамшуулах шаардлагатай.
2011 онд батлагдсан Жолоочийн даатгалын тухай хуулийн зорилго бол хохирогчийн эрх ашгийг хамгаалахад чиглэсэн боловч хариуцлагын даатгалыг хэрэгжүүлэхдээ ашгийн төлөө арилжааны даатгалын хэт олон компанид зөвшөөрөл өгч ажиллуулсан нь нийтийн эрх ашгийг хамгаалах, нэгдсэн ажил, арга хэмжээ зохион байгуулах боломжгүй болгосон байна.
Жолоочийн хариуцлагын албан журмын даатгалын үйл ажиллагааг Зам тээврийн салбарт баримтлах төрийн бодлоготой уялдуулж тээврийн хэрэгсэл эзэмшигчдийг хариуцлагажуулах, хохирогчийн эрх ашгийг хамгаалж, төр иргэнд учирч болзошгүй санхүүгийн дарамтыг хөнгөвчлөхөд энэ хуулийн зорилго орших ёстой гэж үзэж, хуулийг шинэчилсэн найруулгын түвшинд боловсруулж баталж мөрдөх нь зүйтэй гэж үзсэн.
сайжруулах юм байгаа байх гэхдээ төрийн мэдэлд аваад иргэдийг урамшуулаад сүрхий юм болно гэж үлгэр л болох. Урьд нь нийгмийн даатгалын 300 тэрбум төгрөгийг Капитал банкаар дамжуулж цөлмөсөн жинхэнэ эзэд нь та нар шүү дээ .Эхлээд тэр мөнгийг төлж барагдуул Аюурсайхан гуай.