Цахим орчин дахь залилан мэхлэх гэмт хэргийн талаар Хууль зүй, дотоод хэргийн Дэд сайд Б.Солонгоо мэдээлэл өгсөн юм.
Тэрбээр “Дэлхийд нэг секундэд 18 хүн цахим орчинд үйлдэгдэж буй гэмт хэргийн хохирогч болж байгаа гэсэн статистик бий. Орчин үеийн техник технологийн дэвшил шинэ боломжийг олгож, амьдралыг илүү хялбарчилж байгаа ч зарим сөрөг үр дагаврыг бий болгож байна” хэмээн хэлэв.
“Зөвхөн хот суурин газар гэлтгүй хөдөө орон нутагт ч цахим залилангийн хэрэг нэмэгдэж байна”
Энэ төрлийн гэмт хэргийн статистик мэдээллийг танилцуулахдаа “Цагдаагийн байгууллагад бүртгэгдсэн нийт гэмт хэргийн 25.7 хувийг Эрүүгийн хуулийн 17.3 дугаар зүйлийн залилах гэмт хэрэг эзэлж байна. Цаашид ч залилах гэмт хэргийн тоо өсөх хандлагатай байгаа. Тухайлбал, залилах гэмт хэрэг 2011 онд 688 бүртгэгдэж байсан бол өнгөрсөн онд 6,558 бүртгэгдсэн. Өөрөөр хэлбэл, гэмт хэргийн гаралт 10 дахин өссөн.
Зөвхөн хот суурин газар гэлтгүй хөдөө орон нутагт ч залилангийн гэмт хэргийн тоо нэмэгдэж байгаа. Цахим хэрэгсэл ашиглан бусдын эд хөрөнгийн өмчлөх эрхийг залилан авсан гэмт хэргийн тоон мэдээллийг танилцуулбал,
2015 онд 17 хэрэг
2020 онд 1,281хэрэг
2021 онд 3,858 хэргийг цагдаагийн байгууллага бүртгэн шалгасан байна.
Манай улсын 2.7 сая иргэд цахим сүлжээг өдөр тутамдаа идэвхтэй ашиглаж байна. Сошиал сүлжээг өргөн хүрээнд хэрэглэж байгаа нь энэ төрлийн гэмт хэргийн хохирогч болгох эрсдэлийг нэмэгдүүлэх юм” гэв.
“Залилангийн хэрэг нь нийт гэмт хэргийн 40-50 хувийг эзэлж байна”
Тэрбээр үргэлжлүүлэн “Улсын хэмжээнд өдөр тутам 50 мянга орчим онлайн гүйлгээг цахим банкаар дамжуулан хийж байна. Үүнтэй холбоотойгоор иргэд эд хөрөнгөө залилуулж, улмаар сэтгэл зүйгээр хохирох үзэгдэл цөөнгүй гарах болсон. Түүнчлэн 2022 онд криптовалют ашиглан үйлдсэн цахим орчин дахь гэмт хэргийн тоо улам өсөх хандлагатай болж байгаа. Криптовалютын гүйлгээний 70 орчим хувь нь гэмт хэрэгтэй холбоотой байж болзошгүй гэх судалгааг олон улсын эрдэмтэн, судлаачид гаргажээ.
Сүүлийн жилүүдэд манай улсад криптовалют, койн зэрэг цахим төлбөрийн хэрэгслүүд улам их гарч байгаа. Үүнтэй холбогдуулан хууль зүйн бодлогын хүрээнд Засгийн газраас санаачлан Виртуал хөрөнгийн үйлчилгээ үзүүлэгчийн тухай хуулийг 2021 оны арванхоёрдугаар сард баталсан байдаг” гэж ярилаа.
Хэрэглэгчдийн нэвтрэх нэр, нууц үг, дансны болон зээлийн картны мэдээллийг хулгайлах, хувийн мэдээлэлд халдах, бусдад зарж борлуулах хууль бус үйлдэл улам газар авч байгааг тэрбээр нэмж хэлсэн юм. Мөн залилан мэхлэх гэмт хэрэг нь нийт гэмт хэргийн 40-50 хувийг эзэлж байгаа гэдгийг мэдээллээ.
