Хөгжлийн банкны ТУЗ-ийн сонирхлын зөрчилтэй тогтоол

Та Монгол Улсын Хөгжлийн банкны Төлөөлөн удирдах зөвлөлийн 2015 оны 06
дугаар сарын 16-ны өдрийн 52 тоот тогтоолтой танилцсан байлгүй. Харин танилцаж
амжаагүй хүмүүст ерөнхий агуулгыг нь товхон хүргэе.

Тус тогтоолд Монгол Улсын Хөгжлийн банкны ажлын байранд тавигдах стандарт
шаардлагад нийцсэн Сүхбаатар дүүргийн нэгдүгээр хороо, Энхтайвны өргөн чөлөө 19
тоот хаягт орших Худалдаа хөгжлийн банкны төв байрны 3294 м.кв талбайтай үл
хөдлөх хөрөнгийг тус байрны ажлын байрны зориулалтаар 28.5 тэрбум төгрөгөөр
худалдан авч, гэрээ байгуулахыг Гүйцэтгэх захирал Н.Мөнхбатард үүрэгдсэн тухай дурьджээ.

Өөрөөр хэлбэл Хөгжлийн банкны ТУЗ хуралдаж, шинэ оффисын байр худалдаж
авсан гэсэн үг юм. Гэхдээ бүтэн барилга бус харин Худалдаа хөгжлийн банкны төв
байранд 3000 гаруй м.кв-тай талбайг л худалдан авсан юм. Абдул Карим өвөө
Төрийн ордны хажуудах Хэвлэх үйлдвэрийг газартай нь 24 тэрбумаар үнэ цохиж авч
байсныг санаж байгаа байх. Гэтэл манай Хөгжлийн банк түүнээс ч өндөр өртгөөр
оффисын талбай худалдаж авчээ. За энэ чухал биш. Харин оффис худалдаж авах шийдвэр, тогтоол гаргасан ТУЗ-д
асуудал байна. Тодруулбал, ашиг сонирхлын зөрчил байна.

Хөгжлийн банкны ТУЗ-ийг Б.Шинэбаатар даргалж байлаа. Одоо Хөгжлийн банкны
ТУЗ-өөс чөлөөлөгдсөн ч \”Эрдэнэт” үйлдвэрийн 49 хувийг төлөөлж, бас л ТУЗ-д ажиллаж
байна.

Тэгвэл \”Эрдэнэт” үйлдвэрийн 49 хувийг Худалдаа хөгжлийн банк худалдан авсан
байдаг. Харин Монгол Улсын Хөгжлийн банк мөн л Худалдаа хөгжлийн банкнаас оффис
худалдан авчээ. Эндээс Б.Шинэбаатар гэх хүн Худалдаа хөгжлийн банктай
холбоотой, бүр тус банкны төлөөлөл мөн гэдэг нь тодорхойлогдож байгаа биз. Тэгвэл ийм л ашиг сонирхлын зөрчилтэй хүн Монгол Улсаа өрсөлдөх чадвартай
сайтай, өндөр хөгжилтэй, хүчтэй эдийн засагтай улс болгох зорилго бүхий банкыг
удирдаж байсан байх юм.

Удирдах ч гэж дээ. Зүгээр л ТУЗ-ийн дарга гэх албан тушаалаа ашиглаж, бонд
болон төсвийн хөрөнгөөр өөрийн бизнесийг л дэмжсээр ирсэн байх юм. Ашиг
сонирхлын зөрчлийг Авлигатай тэмцэх газар шалгадаг. Тэгвэл ийм ойлгомжтой
зөрчил олон нийтэд нээлттэйгээр ил боллоо. Үүнийг яагаад шалгаж болохгүй гэж.

 

Үндэстэн агентлаг