Нэг Мандарин, хоёр алим, атга чихэр, банкя, шоколад зэрэг өвлийн өвгөний бэлэг

Хүүхэд байхад шинэ жилийн баяр болохыг
цас орсон өдрөөс л хүлээж тоолж эхэлдэг байж билээ. Оны хагас хичээлийн жилд
онц сурсан сурагчдад өвлийн өвгөн бэлэг гардуулдаг сургуулийн уламжлалтай. Сургуулийн
сурагчид заал дүүргээд эцэг эхчүүд багш нарынхаа дундуур гүйж хариагаад л. Анги
ангиар нь жагсаан зогсоож хамгийн олон онц гарсан сурагчидтай анги нь
тэргүүндээ зогсдог байв.

Ингэж жагсаад өвлийн өвгөн, цасан охин нарыг орж ирэхийг хүлээнэ. Өвлийн
өвгөн чанга цээл дуугаар

\”Цас мөсний орноос

Цан хөврөг татуулсаар

Цасан охиноо дагуулсаар

Та бүхэнтэй уулзахаар ирлээ”
гэсээр орж ирнэ. Тэр үед сүрлэг өндөр биетэй, цагаан сахал ихтэй, нөмрөг хормой
нь чирэгдсэн, дуу хоолой нь цээлхэн, хацар нь улайгаад даарсан тийм л нэг
сүрдэм өвгөн байдаг байж билээ. Харин цасан охин уртаа цайвар сүлжсэн гэзэгтэй,
өвгөнтэй өнгө дагуу цайвар цэнхэр даашинзтай, даашинзныхаа ханцуй, хормой
хээсэгт хөвөн дулаалгатай байдагсан. Тэд ийнхүү орж ирлээ л бол баяр эхлэж
байгаа нь тэр.

Онц сурсан сурагчдыг өвлийн өвгөн
нэг нэгээр нь дуудаж гарын бэлгээ гардуулна. Өвгөн аавын бэлгэ нь \”С Новым
Годом” гэсэн бичигтэй гялгар ууттай, дотор нь мандарин, алим, хэсэг чихэр, банкя,
өвлийн өвгөний хэлбэртэй шоколад эсвэл зоосон хэлбэртэй шоколад багтана. Хэмжээлшгүй
их бэлэг авсан мэт ангийнхантайгаа хуваан идэх хүүхдүүд олон.

Энэ бол зөвхөн сургууль дээр
болдог арга хэмжээ. Гэртээ бол шал өөр. Гацуур модоо засах гэж гэр бүлийн бүх
гишүүд оролцсон хэдэн цагийн үйл ажиллагаа болно. Гацуур модны гол төмрийг ах
барин зогсож, ээж дүү нар мөчир бүрээр нь эвлүүлэн угсарна. Энэ үед аав
далийсан мөчрийг тэгшилж, гол төмөр зэргийг угсарна. Угсархад бас учиртай
бүдүүн урт мөчирнөөс нь нарийн жижиг мөчир болтол нь өгсгөж өрж хийх ёстой. Ингээд
сууринд нь хөвөн, саа зэргээр чимэглэж хөлийг нь харагдахгүй болгоно. Модоо
босгосон бол дараагийн хүүхдүүд ойртож болохгүй чимэглэлийн ажил эхэлнэ. Нэг бүрчлэн
хөвөнд ороосон \”эмзэг” тоглоомнуудыг мөчир бүрт шахуу зүүнэ. Хамгийн оройд
байдаг босоо олон талсттай тоглоомыг зүүхэд л ёстой төгс гацуур болсон байна. Ээжээ
одоо тэнд зүүе, ааваа наадах чинь муухай байна хэмээн орон дээр хүүхдүүд \”үсэрч
буун” хөөрцөглөнө.

 

Тоглоом өлгөгдсөний дараа аавын
гаргаж ирэх алдарт орооцолдсон урт гэрэл гарч ирнэ. Маш сонин гэрэл. Мөчир
дээрээ хавчин тогтооно. Модоо тойрон ороох гэрлүүдийнх нь нэг нь л асахгүй бол
цуваагаараа асахгүй. Муухан инженер ч ойлгохооргүй өнгө өнгийн гэрэлнүүд. Ингээд
гацуур мод бэлэн болж асахад бүтэн оройжин хөөрцөглөсөн хүүхдүүд нүд салгалгүй
баясана. Бас болоогүй гацуурныхаа урдуур нарийн урт утас татна. Тэрхүү утсан
дээр нямбайлан хайчилсан цасан ширхэг, усан будгаар зурсан 12 жилийн амьтад
өлгөгдөнө. Магадгүй ирж буй шинэ оны жил нь түрүүнд нь байдаг байсан байх. Ингээд
гэрийн хойморь хэсэгт шинэ жилийн уур амьсгал оруулсан гацууртай болж байх зуур
цонхон дээр Орос хэлээр шинэ жилийн мөнд хүргэж зураг зурна. Гацуур мод, өвлийн
өвгөн, цасан ширхэг, саа, ирж буй шинэ оны бэлэгдэл амьтны дүрс зэрэг
зурагдана.

Ээж аавуудын зурсан зургийг харж
байхад гадаа коток дээр гулгах хүүхдүүд мөн ч сайхан харагддагсан. Мандарин
хувааж идчихээд хальсыг нь хаянаа нэг үгүй. Паар, зуух зэрэгт тавьж үнэрийг нь
гэрээрээ нэг дүүргэнэ. Аав ээжийнхээ хувцасны халаасанд мандариныхаа хальсыг
хийнэ. Тэднийгээ үнэртэй ус шиг гоё үнэртэй болгож байгаа нь тэр. Ингээд л шинэ
жилийн дурсамжууд хөвөрдөгсөн. Өвөө эмээ нараасаа бэлэг авах гэж очно. Бэлэг
бүр ижилхэн шахуу. Хоёр алим, нэг мандарин, атга чихэр, банкя, зоосон шоколад.
Тэр бүгд нь хачин гоё амттай гээч. Бидний шинэ жил ийм л байдагсан.

Үндэстэн агентлаг