Улс даяар оршуулгын замбараагүй тэлэлт бий болж, зөвшөөрөлгүй газар бурхан болоочдоо нутаглуулах явдал нэмэгджээ. Ялангуяа хөдөө орон нутагт зөвшөөрөлгүй газар, малын бэлчээр, газар тариалангийн бүс нутагт дур дураараа энд тэнд оршуулгын зан үйл хийх нь нэмэгдсэн байна. Энэ нь агаар хөрсний бохирдол үүсгэж, иргэдийн эрүүл мэндэд сөрөг нөлөө үзүүлнэ.
Монгол Улсад жилдээ 17 мянга гаруй хүн нас бардаг бол үүнээс 7500 орчим нь Улаанбаатар хотод бурхан болдог гэсэн судалгаа бий.
Тиймээс Хууль зүй дотоод хэргийн яамнаас Эрүүгийн хуульд өөрчлөлт оруулах хуулийн төслийг боловсруулжээ. Тодруулбал, зөвшөөрөлгүй газар оршуулгын зан үйл хийвэл Эрүүгийн хариуцлага хүлээлгэдэг болох өөрчлөлтийг Эрүүгийн хуульд тусгах аж.
Энэ талаар Хууль зүй дотоод хэргийн яамны Төрийн нарийн бичгийн дарга П.Сайнзориг хэлэхдээ “Зөвшөөрөлгүй, хаа хамаагүй газар оршуулгын зан үйл хийж, бунхан янз бүрийн зүйл барьдаг тохиолдол их байна. Тиймээс үүнийг гэмт хэрэгт тооцож, ял хариуцлага оногдуулах өөрчлөлтийг Эрүүгийн хуульд хийсэн. Энэ төслөө намрын чуулганд өргөн барина. Өнгөрсөн жил өргөн барьсан Эрүүгийн хуулийн нэмэлт, өөрчлөлтийн төсөлтэйгөө хамт хэлэлцүүлэн батлуулахаар ажиллана.
Оршуулга бол Газрын тухай хуультайгаа уялдах ёстой. Тухайн орон нутгийн хот төлөвлөлт, газар зохион байгуулалттай уялдуулаад хаана оршуулга хийх үү, тэнд ямар байдлаар журамлах уу гэдэг л асуудал. Гэтэл энэ маш их замбараагүй болсон. Малын бэлчээр, хот суурин газрын ойролцоо тавьж байна. Энэ нь эргээд иргэдийн эрүүл мэнд, аюулгүй байдалд сөрөг үр дагавартай учраас цэгцлэхгүй бол болохгүй” гэлээ.
21 аймгийн 330 гаруй сум бүрд хамгийн багадаа 1-3 оршуулгын газар байдаг. Тэгэхээр энэ зөвхөн нийслэл биш улс орны хэмжээнд тулгамдсан асуудал болжээ. Гэхдээ үүнийг Эрүүгийн хуулиар бус Монгол Улс Оршуулгын тухай хуультай болж асуудлаа шийдэх шаардлагатай гэдгийг энэ салбарт үйл ажиллагаа явуулдаг компаниуд хэлдэг. Хэрвээ Эрүүгийн хуулийн энэ өөрчлөлтийг Их хурал баталбал зөвшөөрөлгүй газар оршуулга хийсэн иргэд эрүүгийн хуулиар ял шийтгэгдэг болно.
