Авлигын хэргээр ял шийтгүүлж байсан хүмүүс албан тушаалд томилогдож эхэллээ

 

Тодруулбал, Гаалийн Х.Баатарыг
Хөдөө аж ахуйн биржийн захирлаар томилсон бол Увсын Засаг дарга асан
Э.Цасчихэрийг \”Шивээ-Овоо\” ХК-ийн
Техникийн асуудал эрхэлсэн дэд захирлаар томилогдсон тухай эх сурвалжууд мэдээлж байна.

Тэгвэл төрийн хангамж эдэлж, өндөр суудалд суусан энэ хоёр эрхэм шүүхээс
ямар хэргээр ял сонсож байсныг эргэн сануулья.

Авлига авсан гаалийн дарга найман
жилийн ял сонсов

Гаалийн Ерөнхий газрын дарга асан Х.Баатар 2005 оны 4 дүгээр сард н.Даваажавтай
тохиролцон гурван удаагийн үйлдлээр 64 сая төгрөг авсан. Мөн энэ оны долдугаар
сард хоёр удаагийн үйлдлээр 3.3 сая төгрөг авсан. Үүнээс хоёр сарын дараа буюу есдүгээр сард
Өмнөговь аймгийн орлогч даргын албан тушаалд дэвшүүлнэ гэж хэлээд 400.0
ам.доллар авсан. 10 дугаар сард н.Эрдэнэтбатаас шил виски, 500 мянган төгрөг
авсан. 11 дүгээр сард н.Банзрагчаас хоёр сая төгрөг авсан гээд нийт найман
удаагийн үйлдлээр 74.8 сая төгрөгийн авлига авсан. Мөн ЗГ-ын ХЭГ-ын дарга
Ө.Энхтүвшинд /одоо УИХ-ын гишүүн/ 40 сая төгрөгийн үнэ бүхий орон сууц авч
өгсөн.

 

Энэ бүх авлигын асуудлыг нэгтгэж, Эрүүгийн хуулийн 268-ын хоёрт заасны
дагуу түүний 5 сая төгрөгийн эд хөрөнгийг хураан авч улсын орлого болгож,
жирийн дэглэмтэй ангид найман жил хорих ял шийтгэсэн байдаг. Үнэндээ албан тушаалаа ашиглаж маш олон удаагийн үйлдлээр авлига авсан хүнд
Монголын шүүх дэндүү зөөлөн хандаж, ердөө таван сая төгрөгийн торгууль
ноогдуулж, хорих ял шийтгэсэн байгааг харж болно.

 

Увсын Засаг дарга тендер \”завшив”

Э.Цасчихэр Увс аймгийн Засаг даргаар ажиллаж байхдаа төсвийн хөрөнгийг
үргүй зарж, хувьдаа завшсан гэх хэргээр буруутгагдаж, шүүхээс ял сонсож байлаа.

Тодруулбал, Увс аймаг улсын төсвийн хөрөнгөөр барихаар болсон Нарийны голын
325 км, Тээлийн голын 75.3 км, гүүрийн барилгын ажлын гээд тендерүүдэд өөрийн \”Мөнхжим”
компанийг ялуулж, 710 сая, төрийн албан хаагчдын таван давхар орон сууц
барихаар төсөвлөсөн ч дөрвөн давхар байр барьж үлдсэн хөрөнгийг хувьдаа завшсан
, мөн төрийн албан хаагчдын цалинг барьцаалж, хувьдаа зээл авсан гэх хэргүүдийг
Авлигатай тэмцэх газар шалгалтаар тогтоож шүүхэд шилжүүлсэн байдаг. Шүүх түүний
тендер завшсан хэрэгт гурван жилийн ял, төрийн албан хаагчдын орон сууцны нэг
давхрыг завшсан хэрэгт 10 сая төгрөгийн торгууль ноогдуулсан байдаг.

Эдгээр хоёр хүний ялтайд тооцох хугацаа дууссан. Тиймээс ямар ч албан
тушаалд томилогдоход хууль зөрчөөд байх зүйлгүй. Гэвч өмнө нь албан тушаалаа
ашиглаж, улсын хөрөнгийг өөрийн юм шиг үрэн таран хийж, эрх мэдлээ урвуулж,
бусдаас авлига хээл хахууль авч байсан хүмүүсийг дахин албан тушаалд томилж
байгаа нь хэр ёс зүйтэй вэ.

Эсвэл Монгол Ардын нам эрүүгийн гэмт хэрэгтнүүдээ албан тушаалд томилох
хүртлээ доройтож, боловсон хүчний хямралд өртчихсөн хэрэг үү. Үнэндээ
тэтгэврийн нас нь болчихсон Х.Баатарын оронд ажиллах чадвартай, мэргэшсэн
залуус улсад олон бий. Мөн \”Шивээ-Овоо\”
ХК-д удирдах албан тушаал эрхлээд
явчих нэр цэвэр, мэдлэг өндөр залуус ч олон байгаа. Гэвч намын гишүүнчлэлгүй
гэх шалтгаанаар тэд \”лааз өшиглөж”, шүүхээс авлига, албан тушаалын хэргээр ял
сонсож байсан хүмүүс эрх ямба эдэлж сууна. Энэ л манай нийгмийн ариун явдал юм
даа.

 

Х.Баатар, Э.Цасчихэр нарын араас \”мөрийтэй тоглоомчин\” Д.Загджав, нийслэлийн өмчийг хууль бусаар хувьчилсан хотын дарга асан Ц.Батбаяр нар бялуунаас хувь хүртэхээр дугаарлан зогсож байна.  

А.Аюуш

Үндэстэн агентлаг