Б.Нармандах : Агаарын бохирдол томуу томуу төст өвчинд шууд нөлөөлж байна

Томуу,
томуу төст өвчнөөр бага насны хүүхдүүд яагаад ихээр өвчилж байна вэ? Үүнд,
утаа, хүйтний улирал хэр нөлөөлж байна вэ? 

 Ханиад томуу гэдэг нь вирусээр
үүсгэгддэг өвчин, өөр юунаас ч шалтгаалахгүй
өвчин юм. Үүнийг иргэд зөв ойлгох
учиртай. Одоо томуугийн вирус алаг цоог дэгдэлттэй явж байна. Тухайлбал, хэн
нэгэн хүн тэр өвчнийг зориудаар бусдад халдааж байгаа зүйл яавч биш. Энэ
өвчний дэгдэлт өнгөрсөн 12 сард нэлээд их хэмжээтэй байсан ч одоогоор буурах
хандлагатай байна. Мэдээж утаа болон хүйтний улирал маш их нөлөөлж байгаа.  

Одоогоор танай эмнэлгийн ачаалал хэр байна вэ? 

 Одоогоор манай эмнэлэг дээр тийм их ачаалал алга. Эмнэлгийн
нөхцөл байдал хэвийн үргэлжилж байна. Гэхдээ
энэ өвчний тархалтыг бууруулхын тулд манай эмнэлэг гаднаас орж ирж байгаа бүх хүмүүсийн гадуур хувцасыг тайлуулж оруулах журам гарган түүнийгээ мөрдөн ажиллаж байна. Яагаад гэвэл гадуур хувцсанд болон тухайн
хүний гарт их хэмжээний томуугийн болон өөр бусад төрлийн халдварт нянгууд явж
байдаг. Тийм учраас тэр бүх халдвараас хамгаалж
байгаа юм.  

 Томуу,
томуу төст өвчнөөс урьдчилан сэргийлэх талаар та эцэг, эхчүүдэд ямар зөвлөгөө
өгөх вэ? 

-Эцэг, эхчүүд юуны урьд хүүхдээ
дулаан хувцаслаж байх хэрэгтэй байна. Энэ нь ханиад, томуугаас сэргийлэхэд
чухал ач холбогдолтой. Мөн хүүхдэд амны
хаалт зүүлгэж хэвшүүлэх хэрэгтэй. Бас
давхар дулаан ороолтоор амыг нь ороох нь чухал. Яагаад гэвэл хүүхэд
амьсгалаараа агаарыг цэвэрлэж, дулаацуулж чаддаггүй. Түүнчлэн хүүхдүүдээ олон
нийтийн газар авч явмааргүй байна. Томуу, томуу төст өвчнөөс хамгаалах хамгийн
сайн арга бол шингэн зүйл хүүхдэдээ сайн уулгаж байх хэрэгтэй. Халуун зүйл
уулга гэхээр манайхан аарц, чацарганын шүүсийг учиргүй их өгдөг. Энэ нь сайн ч
ус уулгаж байх нь үүнээс ч илүү тустай. Өөрөөр хэлбэл, томуугаас хамгаалах
хамгийн сайн хамгаалалт ус гэдгийг онцолмоор байна. Тиймээс хүүхдийнхээ биеийн
жинд тааруулж ус сайн уулгаарай. Энэ дашрамд хэлэхэд, хүүхэд гэлтгүй бүх
насныхан амны хаалт зүүж хэвшвэл томуу, томуу төст өвчнөөс урьдчилан сэргийлэх
бүрэн боломжтой.Мөн цэгчилсэн иллэг хийж өгөх хэрэгтэй
байна.

 Эмнэлэгт
хэвтэж олон хоног эмчлүүлээд гарсан ч дахиад өвдлөө гэх олон эцэг, эхтэй
таарлаа. Энэ ямар учиртай юм бэ? 

-Томуугаар жилдээ хэдэн ч удаа
өвчилж болно. Нэг долоо хоногт хоёр ч удаа
өвдөж болно. Тэгэхээр өвлийн улиралд арван ч удаа өвдөх магадлал бий гэсэн үг. Ер нь энэ өвчинд насан туршийн дархлаа тогтдоггүй юм. Олон  эцэг эхчүүд ярьдаг. \”Манай хүүхэд эмнэлэгт хэвтэж эмчлүүлээд дөнгөж сая гарсан.
Гэтэл дахиад л ханиад хүрчихлээ” гэдэг. Үүний гол шалтгаан нь дархлаа сул байх
үед нь олон нийтийн газраар авч яваад  шинэээр томуугийн халдвар авсанд л хамаг учир байгаа юм. Үүнээс
үүдэж дахин хэлэхэд бага насны хүүхдийг өвлийн улиралд олон нийтийн газраар авч
яваад баймааргүй байна. Одоогоор сургууль
амарсан байгаа болохоор өнгөрсөн 12 сарын үеийг бодвол томуу томуу төст өвчний
дэгдэлт арай буурсан гэж хэлж болно.  

Хүмүүс ханиад томуу тусчихлаа гээд эмийн сан орж янз
бүрийн эм аван өөрсдийгөө дураараа эмчлээд байдаг. Энэ талаар та юу гэж
зөвлөмөөр байна.  

Тэр бол огт
болохгүй зүйл. Томуу томуу төст өвчин туссан ямар ч хүн эхлээд эмнэлэгт очин
оношоо зөв тогтоолгох ёстой. Тэгснийх нь дараа эмч тухайн өвчтөнд нь өвчнийх нь
дагуу эм бичиж өгнө. Түүнээс биш тэгж дураараа өөрсдийгөө эмчлээд яваад байвал
өвчин нь улам хүндэрнэ гэсэн үг. Тийм учраас иргэддээ хандаж хэлэхэд энэ
өвчнийг туссан үед тэр дор нь эмчид хандаарай гэж зөвлөе. 

Сүүлийн уед агаарын бохирдол утаа томуу томуу төст
өвчинд их нөлөөлж байна гэж ярих боллоо. Энэ хэр үнэний ортой вэ? 

Тэр бол мэдээж
ойлгомжтой. Агаарын бохирдол утаа зэрэг нь хүүхдийн уушгинд шууд нөлөөлнө.
Ханиад туссан хүүхдийн гуурсан хоолой, цагаан мөгөөрсөн хоолой, амны салст,
хоолойн хөөмийн салстууд үрэвсэж улайссан байдаг. Гэтэл утаатай агаар харшлыг
нь цочироогч болж өгдөг. Эмнэлзүйн хувьд үрэвслийг улам идэвхижүүлж өгдөг
учраас утаа хүүхдэд улам л хортойгоор нөлөөлнө. Нэг үгээр хэлбэл агаарын бохирдол болон утаа ханиад томуу өвчинд шууд нөлөөлж байна.  

Байнга бөгшүүлж ханиалгаад байгаа хүн ойр
хавийнхаа хүмүүст томуу томуу төст өвчин халдаах эрсдэл хэр их байдаг вэ? 

Байнга ханиаж байгаа хүн янз бүрийн шалтгаантай
байж болно. Хамгийн гол нь тухайн хүн эхлээд шууд эмчид хандах хэрэгтэй. Түүнийхээ дараа карантинд орж бусдад өвчнөө
халдаахгүйн тулд чөлөө аван эмнэлэгт хэвтэж эмчлүүлэх ёстой байдаг. Тэгэхгүй өөрийгөө
дураараа эмчлэн янз бүрийн эм тан уугаад байж болохгүй. Хэрвээ тухайн хүн эмнэлэгт
очин эмчид хандахгүй удаад байвал ойр хавийнхаа хүмүүст өөрийнхөө өвчнийг халдаах эрсдэл
маш өндөр байдаг.     

Ярилцсанд баярлалаа