“Эхчүүдэд” зориулсан буландаа энэ удаад эмэгтэйчүүдэд тохиолддог умайн хүзүүний хавдар, түүнээс хэрхэн сэргийлэх талаар Сүхбаатар дүүргийн Эрүүл мэндийн төвийн эх барих, эмэгтэйчүүдийн их эмч П.Одгэрэлтэй ярилцлаа.
-Эмэгтэйчүүдийн хувьд анхаарах зүйлийн нэг бол умайн хүзүүний хавдар юм. Үүнээс эмэгтэйчүүд яаж урьдчилан сэргийлэх ёстой вэ. Энэ талаар зөвлөгөө мэдээл өгөхгүй юу?
-Умайн хүзүүний хавдраас урьдчилан сэргийлэхийн тулд нэгдүгээрт эрт бэлгийн харьцаанд орохгүй байх, бие биеэндээ үнэнч буюу бэлгийн нэг хавьтагчтай байх. Хэрэв тохиолдлын бэлгийн харилцаанд орохоор бол зайлшгүй бэлгэвч хэрэглэж занших хэрэгтэй. Хоёрдугаарт умайн хүзүүний эсийн шинжилгээндээ товлолт насандаа хамрагдаж байвал умайн хүзүүний хавдрыг урьдчилан оношилж, эмчилгээнд хугацаа алдалгүй хамруулж, бүрэн эмчилнэ.
-Энэ шинжилгээг хаана өгөх боломжтой вэ?
-30-60 насны эмэгтэйчүүд өөрийн харьяа ӨЭМТ-үүдэд умайн хүзүүний эсийн шинжилгээнд хамрагдах боломжтой. Энэхүү шинжилгээг үнэ төлбөргүй хийдэг.
–Умайн хүзүүний хавдраас урьдчилан сэргийлэх шинжилгээнд эмэгтэйчүүд хэр идэвхтэй хамрагддаг вэ?
-Ер нь манай эмэгтэйчүүд энэ төрлийн шинжилгээнд идэвх муутай хамрагдаж байгаа гэж хэлж болно. Учир нь умайн хүзүүний хавдрын урьдал үед тухайн эмэгтэйд ямар нэгэн зовиур илэрдэггүй тул эмэгтэйчүүд тэр болгон үзүүлж, шинжилгээнд хамрагддаггүй.
-Эсийн шинжилгээний хариу өөрчлөлттэй гарсан тохиолдолд яах ёстой вэ?
Хамгийн түрүүнд эсийн шинжилгээнд өөрчлөлт гарсан тохиолдолд харьяа дүүргийн эмэгтэйчүүдийн их эмчид хандан давтан шинжилгээ өгөх хэрэгтэй. Давтан шинжилгээ 6 сарын дотор өгөх ёстой. Энэ шинжилгээний хариу нь эцсийн онош биш буюу умайн хүзүүний хавдар гэж ойлгож болохгүй. Умайн хүзүүний эмгэг өөрчлөлт байж болно.
-Тэгэхээр умайн хүзүүний хавдрыг эмчлэх боломжтой гэсэн үг үү?
-Хавдар гэдэг нь эсийн төвшинд яригддаг учир умайн хүзүүний эд эсүүд хэвийн бус болох бөгөөд анатомын бүтцийн өөрчлөлтөнд орно. Нэг үгээр хэлбэл умайн хүзүүний эсийн шинжилгээнд өөрчлөлт гарсныг шууд хавдар гэж ойлгож болохгүй. Хавдрыг үүсгэж байгаа вирус бол хүний хөхөнцөр вирус /16,18-р тип/ юм. Энэ вирус хүнээс хүнд халварладаг учраас бэлгийн харицаан дээр залуус маань анхаарах хэрэгтэй.
-Умайн хүзүүний хавдар нь ямар шинж тэмдгээр илэрдэг вэ?
-Бусад өвчнийг бодвол хавдрын урьдал үед шинж тэмдэг илэрч мэдэгддэггүй. Харин умайн хүзүүний урьдлын хожуу үед үтрээнээс усархаг ялгадас болон өвөрмөц үнэртэй ялгадас их хэмжээгээр гарна, мөн аарцгийн өвдөлт болон бэлгийн харицаанд ороход өвдөлт илэрнэ.
-Тэгэхээр энэ өвчинд хамгийн их өртөмтгий хүмүүс нь 30-60 насныхан гэж ойлгож болох уу?
-Хүний хөхөнцөр вирус бэлгийн замаар дамжин ороод умайн хүзүүний өөрчлөлттэй хэсгээр дамжин эд эсийг өөрчлөлтөнд оруулах хугацаа нь 5-10 жил байдаг учир бэлгийн харицаанд орсноос хойш эмэгтэйчүүдэд илрэх боломжит нас нь 30 юм.
-Энэ шинжилгээнд хамрагдаж байгаа эмэгтэйчүүд юун дээр анхаарах хэрэгтэй вэ?
Дараах бэлтгэл нь эсийн шинжилгээний хариу зөв гарахад нөлөөлнө. Сарын тэмдэг ирээгүй үедээ шинжилгээ өгөх Шинжилгээ өгөхөөс өмнөх 48-72 цагийн өмнө үтрээний угаалга хийгээгүй байх, бэлгийн харьцаанд ороогүй байх, үтрээний тампон, лаа, тос, эм зэргийг хэрэглээгүй байна.
-Шинжилгээний хариу хэдий хугацаанд гардаг вэ?
-Ажлын 14 хоногт гардаг.
Цаг зав гаргаж ярилцсан танд баярлалаа
