Монгол Улсын Засгийн газрын 2017 оны 320 дугаар тогтоолоор өгөгдсөн үүргийн дагуу нүүрс тээвэрлэлтийг Тавантолгойн уурхайгаас Цагаан хадны гаалийн хяналтын бүс хүртэл, мөн тус цэгээс Гашуунсухайт-Ганц мод боомт гэсэн чиглэлээр зохион байгуулж ирсэн. Тавантолгой уурхайгаас задгай тэвшин дээр ачсан нүүрсийг Цагаан хад гаалийн хяналтын бүсэд ачиж, буулгах явцад 70-80 тонн тутамд 80-85 килограмм нүүрс хорогддог байна.
Тэгвэл энэхүү чингэлэг тээврийг эхлүүлснээр нурмаг ачааг аль нэг цэгт буулгахгүйгээр чингэлэгтэй нь өөр тээврийн хэрэгсэлд шилжүүлэн ачиж эцсийн хэрэглэгчид хүргэх боломж бүрдэж байгаа юм. Мөн нүүрсний жингийн хорогдол болон чанарын алдагдал багасч, ачилт, буулгалтаас шалтгаалсан байгаль орчинд үзүүлж буй сөрөг нөлөөлөл буурч, хил нэвтрэх хурд нэмэгдэх зэрэг олон давуу тал үүсч байгаа аж.
Монгол Улсын Засгийн газраас өгөгдсөн үүргийн дагуу Зам, Тээврийн Хөгжлийн Яам, “Автотээврийн Үндэсний Төв” ТӨҮГ-аас өнгөрөгч зургаадугаар сараас “Чингэлэгт нүүрс тээвэрлэлт”-ийг эхлүүлэх чиглэлийг харъяа төр, хувийн хэвшлийн байгууллагуудад өгсөн аж. Энэхүү ажлын хүрээнд хэд хэдэн аж ахуй нэгжүүд чингэлэг тээвэрлэлт гүйцэтгэж эхлээд байгаа бөгөөд “Монгол Тээвэр Нэгдэл” ХХК-ийн зүгээс “Чингэлэгт нүүрс тээвэрлэлт”-ийн албан ёсны нээлтийн үйл ажиллагааг 2019 оны 10 дугаар сарын 04-ний өдөр Гашуунсухайт чиглэлийн автозамын 30 дахь км-т зохион байгуулжээ.
Нээлтийн үйл ажиллагаанд ЗТХЯ-ны Авто тээврийн бодлогын хэрэгжилт, зохицуулах газрын дарга Г.Гантулга, АТҮТ-ийн Тэргүүн дэд захирал Б.Мөнхгарьд, “Монгол Тээвэр Нэгдэл” ХХК-ийн Ерөнхийлөгч бөгөөд ТУЗ-ийн дарга С.Ганболд, Sinotruk group компанийн Орос, Монгол болон Азийн зах зээл хариуцсан захирал Zhao Hua, “АОДЭ” ХХК-ийн Гүйцэтгэх захирал Н.Начин нар оролцлоо.
