Коронавирусын тархалт иргэдийн дундах стресс, айдсын түвшинг нэмэгдүүлж байгаа хэдий ч энэ оны 4~р сарыг өнгөрсөн жилийнхтэй харьцуулахад Японд амиа хорлогсдын тоо 20% буурсан нь тогтоогдсон ба энэ нь сүүлийн 5 жил дэх хамгийн доод үзүүлэлт юм.
Тодруулж хэлбэл, энэ оны 4~р сард 1,455 хүн өөрсдийн амийг егүүтгэсэн нь 2019 оны 4~р сараас даруй 359~өөр цөөн байгаа юм. 2003 онд амиа хорлолт 34,000 болж оргилдоо хүрсэн ба түүнээс хойш энэхүү үзүүлэлт аажмаар буурч байна. Харин өнгөрсөн жилд гэхэд л ойролцоогоор 20,000 гаруй амиа хорложээ.
Халдварын тархац 4~р сарын дунд үест Японд оргил цэгтээ хүрч, улмаар 500 хүн өвчилсөн нь засгийн газрын зүгээс 16~ны өдөр онцгой байдал зарлахад хүргэсэн.
Орон даяар тогтоосон хөл хорио амиа хорлолтоос урьдчилан сэргийлэх байгууллагуудын үйл ажиллагаанд нөлөөлсөн бөгөөд тэдний 40% нь хаалгаа барьж, эсвэл богиносгосон цагаар ажиллаж эхэлсэн нь амиа хорлолтын түвшинг нэмэгдүүлнэ гэсэн айдсыг нийгэмд төрүүлээд байсан юм.
Хэдийгээр сүүлийн жилүүдэд амиа хорлолтын түвшин буурч байгаа хэдий ч хүүхдүүдийн дунд өсөх хандлага ажиглагдаж байгаа бөгөөд гол шалтгаан нь гадуурхагдаж, дээрэлхүүлэхээс эхлээд сургууль дээрх бусад асуудлууд орж байгаа юм. Японд хичээлийн шинэ жил 4~р сард эхэлдэг бөгөөд энэ нь хүүхдүүдийн дунд хамгийн ачаалалтай үеүүдийн нэг юм.
Японы амиа хорлолтоос сэргийлэх холбооны захирал асан Юкио Сайто хэлэхдээ, “Сургууль бол зарим хүүхдүүдийн хувьд дарамттай зүйл, харин энэ 4~р сард тэдэнд дарамтанд орох шаардлага гарсангүй. Насанд хүрэгчдийн хувьд бол гамшигт үйл явдлын үеэр амиа хорлох талаар төдийлөн боддоггүй,” гэж хэлээд Фукушима дахь атомын цахилгаан станцын осол болон цунамигийн гамшиг тохиосон 2011 онд амиа хорлолтын хэмжээ эрс буурч байсныг дурьдсан байна.
Түүнчлэн, амиа хорлосон насанд хүрэгчдийн ихэнхи нь оффист ажилладаг хүмүүс байсан бөгөөд олон цагаар ачаалалтай ажиллах нь тэднийг ийм алхам хийхэд хүргэдэг аж.
Мэдээний эх сурвалж: www.theguardian.com
