ДЭМБ болон НҮБ-ын Хүний эрхийн дээд комиссоос дэлхийн улс орнуудын эрх баригчдад хандан цар тахлын үед хорих ангиудын ачааллыг бууруулж, хорихоос өөр арга хэмжээ авах хүчин чармайлтаа нэмэгдүүлэхийг уриалсан байна. Үүнд, “COVID-19”-ийн халдвар авах өндөр эрсдэлтэй буюу ахмад настай, архаг хууч өвчтэй, нийгэмд ноцтой хор хохирол учруулаагүй буюу хүчирхийллээс бусад хөнгөн хэргээр шийтгэгдсэн, мөн эмэгтэй болон насанд хүрээгүй хоригдлуудыг суллах механизмыг хэрэгжүүлэх шаардлагатай гэж зөвлөжээ.
Манай улсад архаг хууч өвчтэй болон 60-аас дээш настай, мөн эмэгтэйчүүд гээд 790 иргэн хоригдож байгаа судалгааг холбогдох албанаас гаргажээ. Энэ талаар Хууль зүй дотоод хэргийн сайд Х.Нямбаатар хэлэхдээ “Ковид-19 гарсантай холбоотойгоор шоронд ял эдэлж байгаа архаг хууч өвчтэй болон мөн эмэгтэйчүүд, 60-аас дээш настай хүмүүсийн судалгааг авсан. Хэрвээ эдгээр хүмүүсийг суллана гэвэл УИХ Өршөөлийн хууль батлах ёстой. Эсвэл шүүхийн шийдвэрээр л суллагдана. Түүнээс биш ДЭМБ-ын зөвлөмжөөр ял эдэлж байгаа хүмүүсийг суллах боломжгүй” гэсэн юм. Гэхдээ архаг хууч өвчтэй болон 60-аас дээш настай хүмүүсийн хэдэн хувь нь хөнгөн ялтай болон Өршөөлд хамрагдах боломжтой судалгааг ч Хууль зүй дотоод хэргийн яамнаас хийжээ.
Дэлхий дахинд цар тахал гарсантай холбоотойгоор улс орнууд шоронд ял эдэлж байгаа хоригдлуудаа сууллах, зариманд нь электрон гав зүүлгэх арга хэмжээ авч байгаа аж. Олон улсын “Human Rights Watch” байгууллагын судалгаанд дурдсанаар 2019 оны байдлаар дэлхийн хэмжээнд 11 сая хүн шоронд хоригдож, ял эдэлж байжээ. ДЭМБ-ын зөвлөмж гарсны дараа буюу өнгөрсөн тавдугаар сарын байдлаар дэлхийн 80 гаруй улс хөнгөн ялтай ихэвчлэн эмэгтэй, насанд хүрээгүй болон ахмад настай 580 мянга гаруй хоригдлыг сулласан байна. Мөн дэлхийн олон улс орны хорих ангиудад коронавирусийн халдвар тарахаж, олон хүн нас барсан байна. Тухайлбал, АНУ-ын Охайо мужид долдугаар сарын байдлаар 4230 хоригдол халдвар авсан. Калифорни мужид 1483, Техаст 1390, Теннесид 1379 хоригдол тус бүр коронавирусийн халдвар авчээ. Бүгд Найрамдах Ирланд улсад өнгөрөгч зургадугаар сарын байдлаар 3705 хоригдол коронавируийн халдвар авчээ.
Манай улс түүхэн тэгш ойгоор Өршөөлийн хууль баталж, өршөөл үзүүлдэг. Парламент Өршөөл үзүүлэх тухай хууль батлах судалгаа хийж байгаа талаар УИХ-ын дарга Г.Занданшатар хэлж байсан. Тэрээр “Дэлхий олон оронд цар тахлын үед хамгийн эрсдэлтэй нөхцөлд шоронгийн нөхцөлийг тооцож байгаа. Тийм ч учраас ялаас чөлөөлөх, өршөөл үзүүлэх асуудал яригдаж байгаа. Хөнгөн ялтай хоригдлуудаар ажил хийлгэж, чөлөөнд гаргах ч асуудал яригдаж байгаа. Энэ асуудлыг Монгол Улсын Ерөнхийлөгч ҮАБЗ-ийн төвшинд судалж үзэхийг чиглэл болгосон. Энэ хүрээнд цар тахлын үед хууль эрх зүйн орчныг бүрдүүлж, өршөөл уучлал үзүүлэх нэг удаагийн хуулийн боломжийг судалж байна” гэж хэлсэн юм. Үүнээс үзвэл шинэ парламент ковидтой холбоотойгоор, эсвэл Ардын хувьсгалын 100 жилийн ойн аль нэгтэй холбогдуулан Өршөөлийн хууль батлах бололтой.
