ЭМЯ-ны ээлжит хэвлэлийн хурлын үеэр албаныхан сэтгүүлчдийн асуултад хариуллаа.
– “Өргөө” амаржих газарт төрсөн халдвартай ээжийг тус амаржих газарт тусгаарлаж байгаа гэсэн мэдээлэл байна. Өмнө төрсөн ээжийг шилжүүлж байсан. Энэ удаад яах вэ?
А.Амбасэлмаа: Амаржсан эх болон хүүхдийн биеийн байдал сайн байгаа. Төрөх эмнэлэгт халдвартай хүнийг удаан байлгаад байж болохгүй. Халдварын эрсдэлийг тооцоод төрсөн ээжийг ХӨСҮТ-рүү шилжүүлсэн.
– ЭМЯ-наас хөл хорио тогтоох талаар ямар санал гаргасан бэ, хатуу хөл хорио тогтоохгүй бол гуравдугаар сараас эмнэлгүүд ачааллаа дийлэхгүй болно гэсэн мэдээлэл гарсан байна. Энэ талаар албан ёсны мэдээлэл өгнө үү?
Д.Нарангэрэл: Эрдэмтэн судлаачдын дүгнэлт, 16 байгууллагын хамтран гаргасан эрсдэлийн үнэлгээ, ХӨСҮТ-ийн тархвар зүйн судалгаан дээр үндэслээд Цагаан сарын үеэр хөл хорио тогтоох саналыг УОК-т хүргүүлсэн.
Эрдэмтэн судлаачид арванхоёрдугаар сард хөл хориог сулруулснаас хойших халдварын нөхцөл байдалд үндэслээд гуравдугаар сард эмнэлгийн орны ачаалал нэмэгдэж магадгүй гэж дүгнэсэн. Тиймээс урьдчилан сэргийлэх үүднээс саналаа УОК-т хүргүүлсэн. Судалгааг маргааш дэлгэрэнгүй танилцуулна.
А.Амбасэлмаа: Анх гарсан 13 том голомтыг бид хатуу хөл хориотой, бүх нийтийн бэлэн байдал зарлаж байж хязгаарлаж чадсан. Халдварын тархалттай тэмцэх, сэргийлэх хариу арга хэмжээ нь урт. Өвчнийг илрүүлж, барьж авах 14 хоног, хяналтын 14 хоног гэхээр нэг голомтын хувьд сарын ажил байдаг. Гэтэл нэгдүгээр сарын 25-наас хойш цөөн хоногт 20 орчим голомт үүсэж, өвчилсөн хүний тоо өмнөх голомтуудтай харьцуулахад цөөн ч таруу, олон хорооллыг хамарч байна. Тиймээс хөл хорио халдварын тархалтыг барьж авах хамгийн гол арга хэмжээ. Одоо ч өндөржүүлсэн бэлэн байдалд байгаа тул иргэд хөдөлгөөнөө хязгаарлаж, бидний зөвлөмжийг хэрэгжүүлэх хэрэгтэй.
– Батлан хамгаалахын их сургууль дээр өвчлөл гарсан талаар мэдээлэл байна. Нөхцөл байдлын талаар мэдээлэл өгнө үү?
А.Амбасэлмаа: Батлан хамгаалахын их сургууль дээр өвчлөл гарсан. Тус сургуулийн хоёр ажилтан өвчилсөн. Нэг хүнийх нь гэр бүлийн таван хүн мөн өвчлөөд байгаа. Хавьтлуудыг тусгаарласан, шинжилгээ хийгдэж байна. Энэ өвчлөл БЗД-ийн 5 дугаар хороонд хамаарагдана.
-Халдвар авч байгаа хүмүүс амны хаалттай байхдаа халдвар авч байна уу, эсвэл гэртээ амны хаалтгүй байхдаа халдвар авч байгаа эсэх талаар судалсан бол танилцуулахгүй юу?
Д.Нарангэрэл: -Манай улсад дотоодын халдвар гарснаас хойших байдлыг харвал гэр бүл болон хамт олны дунд халдварлуулах индекс өндөр байна. Энэ нь хүмүүсийн амьдралын хэвшил, найрсаг, зочломтгой гэгчлэн ахуйтай холбоотой. Хамт олны дунд л гэхэд ширээ сандал ойр, олноороо нэг өрөөнд суудаг, агааржуулалт, гараа угаах байдал муу зэргээс шалтгаалж байгаа. Иймээс халдвар хамгааллын дэглэмээ барьж, зөвлөмжүүдийг дагах хэрэгтэй байна.
А.Амбасэлмаа: –Халдварт өртөж байгаа тохиолдлууд гэр бүл, ажлын газрын хүний ойрын хавьтлууд бөгөөд зай барьж, амны хаалт зүүгээгүй байгаа. Нэг хүн халдвар авахад тухай гэр бүлийн гишүүдээс хүн үлдэхгүйгээр өвчилж байна. Тиймээс халдвараас хамгаалах гол арга хэмжээ бол маск зүүх, зай барих, ариун цэвэр сахих.
