УИХ-ын гишүүн Ё.Баатарбилэг: Өнгөрсөн парламентын үед хэд хэдэн ноцтой асуудал гарсан. Бүрэн эрхээ хэрэгжүүлж байгаа УИХ-ын гишүүнийг хууль хяналтын байгууллага мөрдөн шалгах ажиллагаа явуулж, баривчлах, шүүхээр оруулж ял шийтгэл оногдуулах асуудал хоёр, гурван гишүүнд гарсан. Тухайн үед Халдашгүй байдлын дэд хороонд асуудал гаргаж тавьж байсан. Үүн дээр хууль хяналтын байгууллагаас ямар хариулт ирж байсан бэ. Хууль хяналтын байгууллага, шүүхийн хүмүүст ямар хариуцлага тооцох вэ.
УИХ-ын гишүүн Н.Энхболд: УИХ-ын гишүүн бүрэн эрхээ хэрэгжүүлээд халдашгүй байдал нь хуулиар хамгаалагдсан байгаа нөхцөлд шүүгч шийдвэр гаргаж баривчилж, саатуулсан явдал гарсан. Энэ асуудлаар асуудалд холбогдсон хүмүүсийн өмгөөлөгч Халдашгүй байдлын дэд хороонд хандсан. Манай байнгын хороо бол хуульд заасан байгууллага албан тушаалтнаас оруулж ирвэл хэлэлцэх хуулийн заалттай. Гишүүний эрхийг түдгэлзүүлэх асуудлыг Ерөнхий прокуророос УИХ-д оруулж ирвэл хэлэлцэнэ. Хуульд заасан байгууллагаас албан ёсоор бичиг ирээгүй учраас хэлэлцэх боломжгүй. Гэхдээ дэд хороо хуралдаад энэ хууль зөрчсөн үйлдэл гэдэг дээр санал нэгдэж Ерөнхий прокурор, шүүхийн байгууллагад энэ талаар тайлбарлах хүсэлт явуулсан. Эдгээр байгууллагаас өнгөрсөн арваннэгдүгээр сард бичиг ирсэн. Тус бичигт хэлэлцүүлгийн шатандаа явж байгаа учраас тодорхой хариулах боломжгүй гэсэн. Дээд шатны шүүх анхан шатны шүүхийн шийдвэр буруу гэж үзсэн. Хууль зөрчиж шийдвэр гаргасан шүүгч, прокурорт хариуцлага тооцох ёстой. Манай дэд хороо саналаа явуулж байна. Дэд хороо дүрэмгүй явж ирсэн юм байна. Анх удаа дүрмийн төсөл боловсруулж оруулж ирж байна. Дүрмэндээ ийм асуудал дахин гарвал яах вэ гэдгийг зохицуулсан.
УИХ-ын гишүүн Б.Тогтохсүрэн: Дүрэмгүй байсан бол дүрэм батлах нь зөв. Үндсэн хуулийн нэмэлт, өөрчлөлтөөр хоёр том асуудал тусгасан. Үндсэн хуулийн цэц УИХ-ын гишүүнийг эгүүлэн татахтай холбоотой асуудлаар дүгнэлт гаргах. Цэц эгүүлэн татах үндэслэл байна гэвэл дэд хороо хэлэлцэх үү. Ямар шийдвэр гаргах вэ. Цэц үндэслэлтэй байна гэж шийдвэр гаргасны дараа дэд хороо үндэслэлгүй гэж хэлэлцэх боломж бий юү. Сүүлийн 30 жилд ийм асуудал гарч ирж байгаагүй.
УИХ, УИХ-ын дэгийн тухай хууль болон ҮХЦ-ийн тухай гурван хуульд нэмэлт өөрчлөлт оруулах шаардлагатай. УИХ-ын гишүүнийг ямар тохиолдолд эгүүлэн татах, Цэц ямар суудлын хуралдаанаар хэлэлцэх гэдгийн нарийвчилж зааж өгмөөр байна. Цаана нь хүний эрхийн асуудал, сонгогчдын эрхийн асуудал байна. Тиймээс энэ асуудлыг авч үзээд энэ хаврын чуулганаар хэлэлцэж өгөөч хүсье. Цэц зөвхөн нэг суудлаараа биш гурван суудлаараа хэлэлцдэг байх ёстой.
УИХ-ын гишүүн Н.Энхболд: Дүрмэнд 3.1.3-т УИХ-ын гишүүнийг эгүүлэн татахтай холбоотой заалт оруулсан. Цэцэд хэн нэгэн хандаад дүгнэлт гаргавал дэд хороо хэлэлцэнэ. Санал дүгнэлт гаргаж, тогтоолын төсөл бэлдээд байнгын хороогоор хэлэлцүүлнэ. Байнгын хороо хэлэлцээд УИХ-ын чуулганд оруулна.
