ЭМЯ-ны Эмнэлгийн тусламжийн бодлого хэрэгжилтийг зохицуулах газрын дарга Б.Буянтогтох мэдээлэл өглөө.
-Гэрээр эмчлэгдэж байгаа хүмүүс их байна. Эдгээр бүх хүмүүст эмчилгээний багцыг олгож байгаа юу?
-Гэрээр эмчлэгдэж байгаа эрсдэлт бүлгийн эмнэлэгт хэвтээгүй хүмүүст дархлаа сайжруулах бэлдмэл, вирусийн эсрэг бэлдмэлийг өрхийн эмнэлгээр дамжуулан олгож байна. Гол нь хэнд өгөхийг өрхийн эмнэлэг, өрхийн эмч үзээд үнэлээд шийдвэрээ гаргана. Тэгэхээр хүн болгонд өгч байгаа гэсэн үг биш юм. Түүнчлэн ДЭМБ-ын зөвлөмж болон манай ЭМЯ-ны зүгээс хөнгөн хэлбэр дээр вирусийн эмчилгээ шаардлагагүй гэж үзэж байна. Шаардлагатай, хэрэгцээтэй хүний үнэлгээг өрхийн эрүүл мэндийн төв өөрөө үзээд тэр дагуу олгож байна.
-Хөнгөн хэлбэрийн хүмүүс ямар эмчилгээг голлож авч байна вэ?
-Хөнгөн хэлбэрийн эмчилгээний заавар журмууд зөндөө явж байна. Витамин C, витамин Д, шингэн зүйл сайн уух, амрах гэх мэт ердийн дэглэмээр явахад 10-14 хоногийн дотор бүрэн эдгэрэх боломжтой байна. Гэхдээ явцын хяналтыг өрхийн эрүүл мэндийн төвөөр дамжуулан үзүүлж явах нь зөв. Яагаад гэвэл сүүлийн үед эмнэлзүйн хөнгөн шинж тэмдэгтэй эхлээд аажимдаа хүндрэх хандлага ч мэр сэр байна.
-Тодорхой хэмжээний эм аваад өөрийн эмчилгээнд хэрэглэх боломжтой хүмүүс шууд дур мэдээд авах боломжтой эсвэл эмчийн зааврын дагуу авах боломж байгаа юу?
-Боломж бол байгаа. Эмийг хэрвээ өрхийн вирусийн эсрэг эмчилгээ хийх шаардлагатай гэж үзээд ЭМЯ-аас олгогдож байгаа эм уух тэр ангилалд орохгүй бол та өргөн хүрээний үйлчилгээтэй вирусийн эсрэг эм байдаг тэднээс хэрэглэж явахад болохгүй зүйл байхгүй. Гэхдээ дур мэдэн хэрэглэж болохгүй эмчийн заавраар хэрэглэх юм.
-Эмчийн хяналтад байдаг архаг хууч өвчтэй хүмүүс ямар вакцин хийлгэх хэрэгтэй вэ?
-Анх КОВАКС хөтөлбөрөөр Фпайзер, АстраЗенека вакцин орж ирсэн. Тухайн үед бид Эрүүл мэндийн яам болон Засгийн газрын барьсан бодлогод ковидоор өвдвөл илүү хүндрэх эрсдэлтэй хүмүүсийг сонгосон. Ингээд бид Фпайзерыг хавдрын онош тавигдсан, бөөрний деализид ордог гэх архаг хууч өвчтэй хүмүүст илүү чиглүүлж хийж өгсөн. Үүнээс хойш хүмүүс Фпайзерыг хийх ёстой гэсэн ойлголттой болчих шиг болсон. Гэхдээ Засгийн газар Эрүүл мэндийн яамны бодлого нь эрсдэлээс тэр хүмүүсийг хамгаалах зорилгоор тухайн хүмүүст хүмүүст хийсэн юм. Одоо бол та заавал Фпайзер, АстраЗенека вакцин хийлгэх гээд байх шаардлага байхгүй. Бидэнд Вероселл вакцины хангалт сайн байна. Байгаа вакциндаа идэвхтэй хамрагдах нь хамгийн зөв юм. Түүнчлэн Эрүүл мэндийн яам, Засгийн газраас хувийн хэвшлүүдэд вакцин оруулж ирэх зөвшөөрлийг олгосон. Энэ хүрээнд хувийн хэвшлийнхэн тодорхой тооны “Спутник V” вакцин оруулж ирээд иргэдийг дархлаажуулж байгаа. Сүүлд ОХУ-аас манайд 40,000 тун “Спутник V” вакцин орж ирсэн. Үүнээс 20,000 тун нь улсын мэдлийн вакцин юм. Тухайн 20,000 тун “Cпутник V” вакцин одоогоор хэрэглээнд ороогүй бөгөөд ямар иргэдэд хэрэглэх талаар бид удахгүй мэдээлнэ. Гол нь коронавирусийн эсрэг вакцин заавал давтан тун хэрэглэдэг. Тиймээс бид хэзээ ОХУ-аас давтан тунг авах бололцоотой болно, түүний дараа хэрэглээнд оруулахгүй бол вакцины тун хоорондын зайд асуудал гарах юм.
