Коронавирусийн халдварын тархалт зургаадугаар сарын 15-наас буурна гэсэн тооцооллыг УОК-ын дэргэдэх Эрдэмтдийн зөвлөлөөс гаргасан ч 10-наас хойш халдварын тархалт эрс нэмэгдсэн. Тархалт тооцоолсноос нэмэгдсэн шалтгааныг УОК-ын дэргэдэх эрдэмтдийн багийн гишүүн О.Батбаяр Аса станцын ярилцлагад орж тайлбар өгөв.
Тэрбээр, Зургаадугаар сарын 10-наас хойш орон нутаг руу хөдөлгөөн нээсэн, 16 мянга гаруй хүн шагнал авлаа. Шагналыг дагасан найр наадам боллоо. Дээр нь вирус мутацид орсон байж болзошгүй. Вирусийн нарийвчилсан судалгааг хийж байна. Монголд хийсэн судалгааны үр дүн өнөө маргаашгүй гарна. Гадаадад хийсэн шинжилгээнүүдийн үр дүн удахгүй ирнэ. Вакцинд бүрэн хамрагдаагүй, халдвар хамгааллын дэглэм алдсан хүмүүс халдвар авч байна.
-Эрдэмтдийн багаас хатуу хөл хорио тавих санал гаргасан уу?
-Хөл хорих шалгуур үзүүлэлт бий. Нэгдүгээрт,Халдварын тоог харна. Манай улс нэг сая хүнд ногдох халдварын тоогоороо дэлхийд хамгийн өндөр орны тоонд орлоо. Хоёрдугаарт, Орны ачааллыг хардаг. Орны ачаалал мөн хамгийн өндөр түвшиндээ хүрсэн. Гуравдугаарт, Лабораторийн ачааллыг хардаг. Ачаалал мөн оргилдоо хүрсэн. Дөрөвдүгээрт, Нас баралтыг хардаг. Манай улс тохиолдлын тоо хамгийн өндөр боловч нас баралтаар хамгийн бага орны тоонд орж байна. Энэ нь вакцины үр дүн болон эрүүл мэндийн салбарын тусламж үйлчилгээ сайн байгаагийн гэрч.
Хэдийгээр нас баралт бага байгаа ч ирэх сард халдварын тоо, нас баралт эрс ихсэх прогноз байна. Зургаадугаар сарын хагас, долоодугаар сард халдварын тоо 120 мянгыг давах эрсдэлтэй. Үүнийг дагаад өндөр настан, жирэмсэн эхчүүд, хүүхдүүд, вакцин хийлгээгүй хүмүүс, вакцины бүрэн тунд хамрагдсан хүмүүсийн 20 хувь нь халдвар авах эрсдэлтэй учир хөл хорихоос өөр аргагүй гэж үзэж байна. Иргэдийн хөл хөдөлгөөн эрс нэмэгдлээ. Манайд тархсан вирусийн халдварлах чадвар маш өндөр боллоо. Энэ бол хөл хорио тогтоох нэг шалгуур гэж хэлж болно гэлээ.
