Ковид тусаад эдгэсэн хүмүүсийн гуравны нэгд ямар нэгэн шинж тэмдэг удаан хугацаанд үргэлжилж байна. Тодруулбал халдвар авсан хүмүүсийн 37 хувьд нь дор хаяж нэг шинж тэмдэг 3-6 сарын хугацаанд илэрч байна гэв. Хамгийн нийтлэг шинж тэмдгүүд нь амьсгалын замын хүндрэл, хэвлийн хөндийн өвдөлт, ядрах, сульдах, сэтгэлийн хямрал, айдас түгшүүр юм.
Оксфордын Их Сургууль, Эрүүл Мэндийн Судалгааны Үндэсний Хүрээлэн (NIHR) Оксфордын Эрүүл мэндийн биоанагаахын судалгааны төв (BRC)-тэй хамтран хийсэн энэхүү шинэ судалгаагаар АНУ-д суурилсан эрүүл мэндийн бүртгэлийн сүлжээ бүхий TriNetX цахим мэдээллийн өгөгдлийг ашиглан ковидын халдвар аваад эдгэсэн 270 мянга гаруй хүнийг хамруулж удаан хугацааны турш судалжээ.
Мөн энэхүү судалгаагаар энгийн ханиад тусаад эдгэрч буй хүмүүстэй харьцуулбал ковидын дараа урт хугацаанд илрэх үндсэн есөн шинж тэмдэг байгааг тогтоожээ. Ковид-19 оношлогдсоноос хойш 90-180 хоногт илрэх есөн шинж тэмдэг нь:
Хэвийн бус амьсгалах- 8%
Хэвлийн хөндийн шинж тэмдэг – 8%
Сэтгэл түгших/сэтгэл гутралд орох – 15%
Цээж/хоолой өвдөх – 6%
Мартамхай болох (тархи ажиллахгүй байгаа мэт болох) – 4%
Ядаргаа – 6%
Толгой өвдөх – 5%
Булчин өвдөх – 1.5%
Дээрх шинж тэмдгүүдээс бусад – 37%
Тухайн хүн халдвар аваад хэр хүндэрсэн болон нас, хүйс нь шинж тэмдэг удаан хугацаанд үргэлжлэх эсэхэд нөлөөлж байна. Жишээ нь дээрх шинж тэмдгүүд нь хүндэрч эмнэлэгт хэвтсэн хүмүүст илүү их тохиолдож байгаа ба эмэгтэйчүүдэд арай илүү түгээмэл байна. Мөн хүйсээс шалтгаалж илрэх шинж тэмдэг харилцан адилгүй байгаа аж. Жишээлбэл, өндөр настай хүмүүс, эрчүүдэд амьсгал давчдах, мартамхай болох шинж тэмдэг давамгайлж байгаа бол залуучууд, эмэгтэйчүүдэд толгой өвдөх, хэвлийгээр өвдөх, сэтгэл түгших, сэтгэл гутралд орох зэрэг шинж тэмдэг илэрч байна. Мөн олон өвчтөнд нэгээс олон шинж тэмдэг удаан хугацаанд илэрч байсан бөгөөд заримд нь цаг хугацаа өнгөрөх тусам шинж тэмдгийн тоо улам бүр нэмэгдэж байна гэжээ.
skip-share
Урт хугацаанд илрэх шинж тэмдэг нь энгийн ханиадны дараахтай харьцуулахад 1.5 дахин их тохиолдож байгааг тогтоожээ.
Энэхүү судалгааг хийхдээ томуу тусаад эдгэсэн хүмүүсийн ижил шинж тэмдэгтэй харьцуулсан бөгөөд коронавируст халдварын урт хугацаанд илрэх дээрх шинж тэмдэг нь энгийн ханиадны дараахтай харьцуулахад 1.5 дахин их тохиолдож байгааг тогтоожээ.
Оксфордын Их Сургуулийн шинжилгээг удирдсан NIHR -ийн академик клиникийн ажилтан, доктор Макс Такует хэлэхдээ “Бүх насны хүмүүсийн нэлээд хэсэг нь өвчний дараа зургаан сарын хугацаанд янз бүрийн шинж тэмдэг, хүндрэлд өртөж байгааг судалгаагаар баталлаа. Ковид-19 халдварын одоогийн болон ирээдүйн эмнэлзүйн хэрэгцээг хангахын тулд бидэнд тохирсон эмчилгээ хэрэгтэй байна” гэжээ.
Мөн тус сургуулийн Сэтгэцийн эмгэг судлалын тэнхимийн профессор Пол Харрисон хэлэхдээ “Бид энэ төрлийн судалгааг яаралтай хийх шаардлагатай байна. Халдвар аваад эдгэсэн хүмүүст илэрч буй олон янзын шинж тэмдгүүдийн цаад учир шалтгааныг олж тогтоох хэрэгтэй. Ингэснээр халдварын дараах шинж тэмдгийн урт хугацааны үр дагавраас урьдчилан сэргийлэх болон үр дүнтэй эмчлэхэд чухал ач холбогдолтой болно” гэжээ.
