Зүрх сэтгэлийн боловсрол бол хамгийн дээд боловсрол. Хүн байхын утга учир мэдлэгт бус сэтгэлд оршдог.
Нэг нь мэдлэгтэй, хүмүүжилтэй сурагч байхын төлөө, нөгөө нь хүмүүжилтэй, мэдлэгтэй, сайн хүнийг би болгохын төлөө зорьж зүтгэж яваа багш сурагч хоёрыг салгаж ойлгох ямар ч боломжгүй. Багшаас эхлэх ёстой үлгэр дууриал хүүхдэд маш чухал. Бие биендээ туслах, найрсаг хандах, мэндлэх, хүндлэхээс өгсүүлээд олон зүйлийг багшаасаа үлгэрлэдэг. Багшийн зан чанар, биеэ авч явах байдал, харилцаа хандлагыг сайжруулж байж бид хүүхдүүддээ ирээдүйн Хүмүүнлэг хүний тухай ярьж болно.
Өнгөрсөн намар Хүмүүнлэгийн боловсролын тухай хуулийг УИХ-ын гишүүн Б.Бат-Эрдэнийн хамт өргөн барьж хэлэлцүүлсэн. Энэ хууль тухайн үед батлагдаагүй ч бид Боловсролын ерөнхий хуулийнхаа төсөлд заалт болгон оруулаад явж байгаа. Хүмүүнлэг байх, энэрэнгүй байх, багаар ажиллах чадамжтай байх, хүнийг үл ялган тусладаг тэр сайхан чанар бидний эцэг өвгөдөөс олгосон суурь хүмүүжилд оршиж байдаг. Энэ бол дархлаа. Үүнийг бид Монгол чигээр нь авч үлдэх, хойч үеийнхээ сэтгэлгээнд суулгах эрхэм зорилго, үүрэг бидэнд оногдсон.
Энэ чиглэлээр тэргүүлэх хөгжилтэй орнууд маш олон талын судалгаа хийсэн байдаг. Наад зах нь өндөр мэдлэгтэй байлаа ч багаар ажиллах чадваргүй, бусдадаа тусалж чаддаггүй бол ажилд авахгүй байх, дараа дараагийн өсөн дэвжих боломж хаагддаг зарчим үйлчилдэг болжээ. Түүний нэг нь АНУ-ын Эмори Их сургуулийн боловсруулсан ерөнхий боловсролын сургалтын хөтөлбөр болох нийгмийн харилцаа, сэтгэл хөдлөл, ёс зүйн СИИ сургалт юм.
Олон улсын боловсролын системд өргөн хэрэглэгддэг нийгмийн харилцаа, сэтгэл хөдлөлийн СИИ сургалт нийслэлийн 113 дугаар сургуулийн багш нарт анх удаа хийгджээ. Анхаарал төвлөрлийн дасгал, энэрэх сэтгэл, системийн сэтгэлгээ, сэтгэлийн хат суулгах, сэтгэлийн гэмтлийг тооцоолсон дасгал хичээлүүдээр баяжуулсан байна.
Сурагч багшаараа дамжуулан өөрийгөө болон бусдыг ойлгож мэдрэх, энэрэнгүй сэтгэл, ёс зүйн хэм хэмжээг хөгжүүлэх ойлголт, чадварт суралцана. Нийгмийн дотор оршин тогтнож буй бие хүн, хүн бүрийн эрх тэгш байдал, хүний бүтээсэн сайн сайхан зүйл бага гэлтгүй бусдад хэрхэн нөлөөлдөг тухай мөн нийгэмд эерэг өөрчлөлт хийх боломжийн талаар багш нарт мэдээлэл, мэдлэг өгснөөр багш шавийн харилцаа илүү эерэг болно.
Эцэг эх хүүхдийнхээ эерэг өөрчлөлтийн талаар мэдээлэлтэй болохын сацуу өөрсдөө гар бие оролцох боломжтой болно. Хүүхдийнхээ зан авирын эерэг өөрчлөлтийн үр дүнг мэдэрнэ гэдэг бол зөв хүн бүтээхийг зорьж бидэнд маш том давуу талыг авчирна.
Бидний эцэг өвгөдийн сургааль, философи гадны өндөр хөгжилтэй орнуудад хөтөлбөр болчихсон байна. Сургалтын гарын авлага номуудыг маш энгийн зохиох, хүмүүнлэгийн боловсролын заах арга сургалтыг биеийн тамир спорт, урлагаар илүү баяжуулах нь бүр ч илүү үр дүн авчрах боломжийг багш, эцэг эхчүүд бидэнд олгох учиртай.
Сэтгэл зүрхний боловсрол бол хүнээр хүн хийхийн ухаан бөгөөд энэ ухааныг багш бүхэн эзэмших ёстой
}
Шинэ мэдээ
