БИД ЦАГААН ЗЭЭРГҮЙ БОЛ БЭЛЧЭЭРГҮЙ БОЛНО.
ЦАГААН ЗЭЭР БАЙГАА БОЛОХООР ДОРНОД МОНГОЛД БЭЛЧЭЭР ГАЙГҮЙ БАЙГААГ УХААРЧ ОЙЛГООСОЙ.
ЦАГААН ЗЭЭРИЙН БАЙГАЛЬД ГҮЙЦЭТГЭДЭГ ҮҮРЭГ, ЭКОЛОГИЙН АЧ ХОЛБОГДОЛ :
1. Цагаан зээрийн сүрэг бэлчээрлэн явах замдаа газрын хөрсөн дээрх өвсний уганд үүрлэсэн хорхой, шавьж, авгалдайг гишгэж устган тэдний тоо толгойг тэнцвэржүүлэн бэлчээрийг эрүүлжүүлдэг.
2. Ургамлын үрийг биедээ наалдуулан авч явж алс хол тээвэрлэн тарааж, газрыг хөлөөрөө гишгэж хонхойлон үрийг суулгаж салхинд хийсэхээс хамгаалж, ус тогтох нөхцөлийг бүрдүүлж өгдөг.
3. Өвөл, хаврын улиралд хагд өвсийг идснээр, нарны гэрэл тусах боломжийг сайжруулж ургамал ургах таатай орчныг бий болгодог.
4. Цагаан зээрийн сүрэг олон зуугаараа бэлчээрлэн нүүдэллэж явахдаа өвсний шүүдрийг газарт буулгаж (бороо оруулж), жилдээ тал хээрийн экосистемд 50 мм хүртэл (нийт тундасны ¼) хур тунадсаар усалдаг.
5. Экосистемийн идэш тэжээлийн хэлхээнд оролцож хүн, чоно, үнэг, хярс, дорго, үмхий хүрэн, зараа, бүргэд, шонхор, тас зэрэг олон амьтдын идэш, хоол болдог. Цагаан зээр ховордож, устах аюул тулгарвал тал хээрийн зэрлэг амьтдын идэш тэжээлийн гинжин хэлхээ тасарч, тал хээрийн экосистемийн төлөв байдал алдагдах, бэлчээрийн ургамлын зүйлийн бүрдэл цөөрөх, доройтох нэг гол нөхцөл болж чоно, үнэг, хярс, шонхор, cap болон бусад олон амьтад (өвсөн тэжээлтнүүд) ч үгүй болж болзошгүй юм.
6. Цагаан зээрийн сэг зэм, баас, шээс нь газарт шингэж задран байгалийн бордоо болж өвс ногоо ургахад таатай нөлөө үзүүлдэг.
7. Цагаан зээр өөрийн зөн совин, байгалийн араншингаараа байгаль, цаг агаарын өөрчлөлтийг урьдчилан мэдэж бусад амьтдад дамжуулдаг цаг уурч юм. Манай ард түмнийг олон зуун жилийн турш байгалийн гамшигаас урьдчилан сэргийлэхэд үнэтэй хувь нэмэр оруулж иржээ. / Цаг уурч – гамшигаас хамгаалагч /
8. Цагаан зээр маш өгөөмөр зан араншинтай амьтан бөгөөд шаргачин нь хүний өөрийн гэхгүй тааралдсан янзагаа хөхүүлдэг.
9. Цагаан зээрийн сүрэг нь олон зуу, мянгаараа бэлчээрлэн явж газар хөдөлж байгаа юм шиг харагдаж аялагч, жуулчдын сонирхолыг татаж, хүмүүст сэтгэлийн таашаал өгч, бахархах сэтгэгдэл төрүүлж, алжаал ядаргааг тайлах зэрэг олон чухал үнэлж баршгүй ач холбогдолтой.
10. Цагаан зээр, сүргийн бүтцээ сэлгэдэг тогтолцоотой учраас цус ойртдоггүй байх магадлалтай. (Янзаган хүрээ)
11. Ийм олон үүргийг биелүүлж тал хээрийн бусад амьтдын амьдрах таатай орчныг бүрдүүлдэг.
МОНГОЛЫН БОЛОН ГАДНЫ ЦАГААН ЗЭЭР СУДЛААЧИД, ЭРДЭМТЭДИЙН НОМ БҮТЭЭЛЭЭС ТҮҮВЭРЛЭН АВАВ.
Г.БАТ-ЭРДЭНЭ
