Засгийн газраас хэрэгжүүлж буй шүүр ажиллагааны талаар ЗГХЭГ-ын дарга Д.Амарбаясгалан мэдээлэл өгөв.
Засгийн газраас “5Ш” ажиллагааг гүйцэтгэж, 2023 оныг авлигатай тэмцэх жил болгон зарласан. Төрийн алба хуулиа ягштал биелүүлж, төрийн албыг сулруулж буй зарим үйлдлийг таслан зогсоох нь шүүр ажиллагааны үндсэн зорилго юм. Өнөөдөр төсвөөс цалинжиж, төрд ажиллаж байгаа 225,000 гаруй албан хаагч байна. Мөн төрийн болон орон нутгийн өмчийн компаниудад 75,000 орчим хүн ажиллаж байгааг тэрбээр хэлэв.
- Нэгдүгээрт, иргэдийн зүгээс төрийн албан хаагчдын чадвар, чансаатай холбоотой асуудалд шүүмжлэлтэй ханддаг.
- Хоёрдугаарт, хандлага, ёс зүйтэй холбоотой асуудал яригдсаар ирсэн.
- Гуравдугаарт, төрийн албанд шаардлага хангаагүй, төрийн албанаас шимэгчилж ажиллаж байгаа хэсгийг шүүмжилдэг.
- Дөрөвдүгээрт, өөрт болон бусдад давуу байдал бий болгох замаар томилох асуудал бий.
Монгол Улсын Засгийн газраас эдгээр хууль бус байдлаар томилогдсон хэсгийг төрийн байгууллагаас чөлөөлөх, төрийн албыг цэвэрлэх үйл ажиллагааг явуулахыг урьтал болгож байгаа юм.
Аль нэг нам, улс төрчдийн харьяанд байгаагаас хамаарч төрийн алба хаадаг, хашдаг, төрийн өмчит үйлдвэрийн газруудад ажилладаг явдлыг таслан зогсоох ёстой. Ямар дарга ирж манай байгууллагыг удирдах бол гэдгээс айж бэмбэгнэж, ажилд илүү оролцохгүй байх тусам өөрт нь халгүй мэтээр бодож ажилладаг байдлыг таслан зогсооё. Үүнийг засъя” хэмээн ярилаа.
Мөн “Шүүр ажиллагаатай холбоотойгоор 6,000-8,000 албан хаагчийн асуудал хөндөгдөж байна. Өнгөрсөн хугацаанд КОВИД-ын хууль хэрэгжиж, энэ оны нэгдүгээр сараас хэрэгжилт нь зогссон. Үүний үр дүнд нийт 2,000 орчим төрийн албан хаагч чөлөөлөгдсөн.
2023 оны улсын төсвийг Засгийн газраас өргөн барьж, батлуулахдаа чухал заалт оруулсан. Тодруулбал, энэ оноос эхлэн тэтгэвэр авч байгаа хүн төсвөөс цалинжихгүй байх зохицуулалтыг хуулиар хийж өгсөн. Өнөөдрийн байдлаар 5,000 гаруй хүн тэтгэвэр аваад давхар төрийн албанд ажиллаж цалинжиж байгаа. Гэхдээ хүн ам багатай хөдөө орон нутагт боловсон хүчний дутагдал байхыг үгүйсгэхгүй. Аргагүй эрхэнд ингэж ажиллаж байгаа хэсэг байна. Тэтгэвэртээ гарсан нарийн мэргэжилтэй хүмүүсийг яалт ч үгүй урьж ажиллуулж байгаа тохиолдлууд байгаа гэсэн үг.
Өнөөдрийн байдлаар шүүр ажиллагаа амжилттай хэрэгжиж байгаа мэдээлэл ирсэн. Төрийн байгууллагууд, шийдвэр гаргах түвшний удирдах албан тушаалтнууд өнөөдөртөө багтаж бүх мэдээллээ нэгтгээд дөрөвдүгээр сарын 10-ны дотор ЗГХЭГ-т албан бичгээр мэдээллээ өгөх ёстой.
Төрийн албаны хуулиар төрийн албанд ажиллаж байгаа хүнийг чөлөөлөхдөө нэг сарын өмнө мэдэгдэл өгч, чөлөөлөх хуулийн зохицуулалттай. Гэтэл өнөөдөр ЗГХЭГ-ын даргын гарын үсэгтэй албан бичгийг үндэслэж, шууд ажлаас чөлөөлж, зориудаар Төрийн албаны хуульд зөрчил үүсгэж, шүүх хяналтын байгууллага дээр очиж асуудлыг шийдвэрлүүлэх сонирхлыг бий болгож байгаа зүйл ажиглагдаж байна.
Бидний өгсөн үүрэг чиглэл бол дөрөвдүгээр сарын 6-нд багтаад ямар арга хэмжээ авах талаар мэдээлэл ирүүлэх үүрэг өгсөн. Нэг ёсондоо энэ хугацаанд багтаж төрийн албанаас чөлөөлж буй хүмүүст мэдэгдлийг нь өгсөн байх ёстой.
Эдгээр ажлыг бид хүн хэлмэгдүүлж эсвэл Засгийн газар хэт харгис бодлого шийдвэр гаргаж байгаад оршоогүй. Өөрсдөө хуулиа ягштал барьдаг болсны үндсэнд бусдаас хууль хэрэгжүүлэхийг шаардах эрх төрд нээгдэх учиртай” гэв.
