Байгаль орчин, аялал жуулчлалын яамнаас цаг үеийн асуудлаар өнөөдөр мэдээлэл өглөө.
Газартай холбоотой асуудлаар БОАЖЯ-ны Тусгай хамгаалалттай газар нутгийн бодлого зохицуулалтын газрын дарга Н.Баатарцогт хэлэхдээ “Тусгай хамгаалалтын газар нутгийн тухай хууль, Газрын тухай хуулийн 39,40 дүгээр заалтыг үндэслээд газраа хоёр жил дараалан ашиглаагүй, газрын төлбөрөө заасан хугацаанд нь төлөөгүй, газар ашиглах гэрээний нөхцөл болзлыг зөрчсөн, ойн болон усан сан бүхий газар инженерийн шугам сүлжээний хамгаалалтын бүсэд орсон. Мөн тэмдэгтийн хураамж төлөөгүй иргэн, хуулийн этгээдүүдийн газар эзэмших эрхийг цуцлах хүчингүй болгох ажлуудыг хийж байна.
Сүүлийн үед усан сан бүхий газартай холбоотой асуудал бий. Өмнө нь олгогдсон газар ашиглах эрх дээр нь усан сан бүхий газар давхцалтай хэсгийн эрхийг нь цуцлах, хүчингүй болгож яваа. Засгийн газар болон БОАЖ-ын сайдын бодлого үүнд чиглэж ажиллаж байгаа. Аж ахуйн нэгж, байгууллагуудын хувьд усан сан, ойн сан бүхий газар давхцалтай газрыг цуцлах асуудалд нээлттэй хандаж, хамтран ажиллаж байгаа. Гомдол санал бага гарч байна.
2023 он гарснаас хойш Богдхан уулын дархан цаазат газар, Горхи тэрэлжийн байгалийн цогцолбор газар болон Хөвсгөлийн улсын тусгай хамгаалалтын газар нийт 90 иргэн, хуулийн этгээдийн ашиглаж байсан газрыг цуцлах, хүчингүй болгох ажлыг хийсэн.
Мөн иргэд хуулийн этгээдүүдийн хувьд гомдол санал гаргахад нээлттэй. Цаашид хууль хэрэгжүүлэх ажлыг шат дараатайгаар, тогтмол хийнэ.
Монгол Улс 2030 он гэхэд нийт газрын нутгийн 30 хувийг тусгай хамгаалалтад авах зорилт тавьсан” гэлээ.
