Чех улсад 56 дахь удаагаа зохион байгуулагдсан “Virtuosi per musica di pianoforte” төгөлдөр хуурын олон улсын уралдаанд Монгол Улсын Консерваторын сурагчид амжилттай оролцлоо. Тодруулбал, Монгол Улсаа төлөөлөн долоон сурагч, гурван багшийн хамт /Т.Нямсүрэн, Н.Ганчимэг, Г.Оюун-Эрдэнэ/ оролцжээ.
Т.Нямсүрэн багшийн шавь Б.Очир-Эрдэнэ гуравдугаар байр, Б.Энхсаруул тусгай шагнал, Н.Ганчимэг багшийн шавь Н.Саруул, Т.Оюу нар тусгай шагналаар шагнагджээ. Харин энэхүү уралдаанаас хамгийн том шагналыг Монгол Улсын консерваторийн дөрөвдүгээр ангийн сурагч, Г.Оюун-Эрдэнэ багшийн шавь Б.Гүен хүртсэн байна. Тэрээр уралдааны нэгдүгээр ангилалд нэгдүгээр байр эзэлж, Усти над Лабем хотын захирагчийн нэрэмжит шагнал хүртсэн юм. Энэхүү тэмцээнд 13 орны төгөлдөр хуурчид ур чадвараа сорьсон бөгөөд нийт дөрвөн ангилалтай уг уралдааны гранпри шагналыг Монголоос анх удаа ийнхүү хүртсэн байна. Уралдааныг долоон өөр улсын шүүгч нар шүүн явуулжээ.
Г.Оюун-Эрдэнэ: Б.Гүен миний анхны сонгож авсан шавь
Б.Гүенгийн мэргэжлийн багш нь Монгол Улсын консерваторийн Мэргэжлийн төгөлдөр хуурын тэнхимийн багш Г.Оюун-Эрдэнэ “56 дахь удаагаа зохион байгуулагдаж буй энэ уралдаан чансаа өндөртэй, суралцах зүйлс ихтэй, зохион байгуулалт сайтай маш сайхан уралдаан болж өнгөрлөө” хэмээсэн юм.
Мөн тэрээр “Б.Гүен миний анхны сонгож авсан шавь. Монголын төгөлдөр хуурч хүүхдүүдээ дэлхийн тайзан дээр харах, авьяас чадвар, хөгжмийн мэдрэмжийг нь сонсуулах юмсан гэсэн эртийн хүсэл зорилго маань бага багаар биеллээ олж байна. Том конкурсны ачаалал даах даац, тайзны айдасгүй, бүрэн гүйцэтгэлтэй бэлтгэлтэй болгох гэж жил бүр соло концерт хийж хоёр концертын ард гарсан. Хийсэн, хөдөлмөрлөсөн, зориулсан бүхний үр дүн өнөөдөр гарч байна.Их баярлаж байна. Анх удаа олон улсын уралдаанд ороод ийм том амжилт гаргана гэж зүүдэлсэнгүй. Догдлол, сандрал, бүх мэдрэмж зэрэгцэн нүдэндээ нулимстай бүх агшинг сонсож суулаа. Энэ сайхан мэргэжлийг эзэмшүүлж, зааж сурган, чиглүүлж, амьдрал насан туршид минь хөгжимчний хувьд хүний хувьд ч хүмүүжүүлж, сайн боловсрол олгосон хүндэт багш нартаа чин сэтгэлийн гүнээс талархаж байна. Сайн багш нартай учирч, эрдэм мэдлэгээс нь бага ч болов суралцсандаа үргэлж талархаж явдаг. Энэ бол хүн бүрт олдодгүй том аз хувь заяа юм. Б.Гүенг өдийг хүртэл нь дэмжиж тусалж, үргэлж хүүхдээ анхаардаг ээж аав, эмээ өвөө нарт давхар баяр хүргэе. Үнэхээр авьяастай, ухаантай, мэдрэмжтэй, хүмүүжилтэй, соёлтой, хөдөлмөрч сайн хүүтэй шүү хүмүүс та нар” хэмээжээ.
Б.Гүенгийн хувьд тун удахгүй Чехийн Брно хотноо болох В.А.Моцартын нэрэмжит олон улсын төгөлдөр хуурчдын тэмцээнд мөн оролцох юм.
