АНУ-ын томоохон 28 хот жилээс жилд суулт өгч, барилга байгууламж, зам, далан болон бусад дэд бүтцийн бүрэн бүтэн байдалд аюул заналхийлээд байна.
Эдгээр хотод нийлээд 34 сая орчим хүн амьдардаг.
“Nature Cities” сэтгүүлд нийтлэгдсэн судалгаанд дурдсанаар эдгээр хотын газрын гүний хөдөлгөөнийг зураглахын тулд хиймэл дагуулын радарын хэмжилтийг ашиглажээ. Уг хэмжилтийн үр дүнд хотууд “живж” байгаа нь гүний усны олборлолттой холбоотой гэж үзсэн байна. Мөн 28 хотын нийт 29 мянга гаруй барилга байгууламж эвдрэлийн өндөр болон маш өндөр эрсдэлтэй бүсэд байрлаж буйг тогтоожээ.
Газрын гадарга бага зэрэг доошлоход л барилга, зам, гүүр, далан зэргийн бүрэн бүтэн байдлыг алдагдуулдаг. Цаг хугацааны явцад энэ нь хуримтлагдсаар үерийн эрсдэл үүснэ.
Хамгийн өндөр эрсдэлтэй байгаа хотууд нь Чикаго, Даллас, Колумбус, Детройт, Форт Уорт, Денвер, Нью-Йорк, Индианаполис, Хьюстон, Шарлотт зэрэг юм. Эдгээр хотын газар нутгийн 98 орчим хувь нь “живж” байна.
Судалгаанд хамрагдсан хотуудаас хамгийн хурдан “живж” буй нь Хьюстон байсан бөгөөд газар нутгийн 42 хувь нь жилд таван мм, 12 хувь нь 10 мм-ээс илүү суулт өгч байгаа аж. Харин Нью-Йорк хотын 10-аас доошгүй хувь нь “живж” байна.
Тэр дундаа хотын гурван томоохон нисэх онгоцны буудлын нэг болох ЛаГуардиа нисэх онгоцны буудалд жилд таван мм-ээс их хэмжээний суулт илэрчээ.
Гэтэл ЛаГуардиа нисэх буудал нь саяхан найман тэрбум ам.долларын засвар хийж, 2024 онд АНУ-ын шилдэг нисэх онгоцны буудлаар хүртэл шалгарсан байна.
