Энэ жил эцэг эхчүүд цэцэрлэгийн гадаа хонох шаардлагагүй, гэхдээ

 

Манай улсад хүүхдээ цэцэрлэгт оруулах нь их дээд сургуульд оруулахаас хэцүү
гэж хэлж болно. Жил бүрийн есөн сард цэцэрлэгийн орон тоо дутаж эцэг эхчүүд
хүүхдээ цэцэрлэгт оруулахын тулд хонон өнжин оочер, дараалал болж цэцэрлэгийн
үүд манаж суух нь энүүхэнд.

Улсын хэмжээнд өнөөдрийн байдлаар
нийт 216 цэцэрлэг үйл ажиллагаа явуулдаг. Энэ нь цэцэрлэгийн насны
хүүхдүүдийнхээ хаана нь хүрдэггүй. Нэг анги хэтэрхий олон хүүхэдтэй гээд олон
асуудал бий. Гэхдээ эцэг эхчүүд хүүхдээ гэрт байлгаснаас цэцэрлэг бараадуулсан
нь дээр гэж цаг зав, мөнгө төгрөгөө баран ийнхүү оочерлодог.

 

Харин энэ жилээс оочер дараалалд зогсдог асуудлыг шийдэж хүүхдүүдийг
цахимаар бүртгэх шийдвэр гарчээ. Эцэг эхчүүд хонож өнжин оочерлох шаардлагагүй,
хүүхдийнхээ регистерийн дугаарыг www.tsetserleg.ulaanbaatar.mnхаягт оруулаад л таны хүүхдийн аль дүүргийн ямар
цэцэрлэгт бүртгүүлэх боломжтой нь гараад ирэх аж.

 

Энэ шийвдэр асуудлыг шууд шийдэх нь юу л бол гэсэн хүмүүс цөөнгүй байна.
Мэдээж давуу тал болон сул тал байгаа. Давуу тал нь гэвэл эцэг эхчүүдийн цагийг
хэмнэнэ, хонож өнжих шаардлага байхгүй, ямар ч маргаан, үл ойлголцол гарахгүй
аль аль талдаа амар болж байгаа юм. Мөн танил талынхаа хүүхдийг оруулдаг, мөнгө
хахууль авдаг гэсэн асуудал гарахгүй байж магадгүй.

 

Харин нөгөө талаараа Улаанбаатар хотын 70 хувийг гэр хорооллын айл өрхүүд
эзэлдэг. Ихэвчлэн гэр хорооллын хүүхдүүд улсын цэцэрлэг барааддаг. Тэд бүгд
интернэтээр хүүхдээ бүртгүүлж, хүүхэд нь цэцэрлэгтээ үлдэж чадах уу гэдэг бас
нэг асуудал. Өөрсдөө хонож өнжөөд ч оруулж чадахгүй бүртгэлээс нь хоцордог эцэг
эхчүүд онлайнаар бүртгүүлээд найдаад сууж байх уу? Энэ жил улсын хэмжээнд 24
мянга орчим хүүхэд цэцэрлэгт орно.

Нэг ангид хамгийн ихдээ 35 хүүхэд байна гэж тооцвол манайд байгаа 216
цэцэрлэг хаанаа ч хүрэхгүй. Долдугаар сарын 25-наас наймдугаар сарын 25 хүртэл
онлайн бүртгэл явагдана. Хотын захын дүүрэг, интернэт мэддэг мэддэггүй,
интернэттэй интернэтгүй хамаагүй сарыг хугацаанд үлгэн салган бүртгүүллээ гэж
бодьё. Цэцэрлэгтээ багтахгүй олон хүүхдийг бүртгээд 50, 60-аар нь нэг ангид
оруулах уу эсвэл есөн сар гэхэд нэмж цэцэрлэг барих уу.

 

Жишээ нь Хан-Уул дүүргийн 10 дугаар хорооны 49 дүгээр цэцэрлэгт тэр хороонд
харьяалалтай 210 хүүхэд бүртгүүллээ гэхэд цэцэрлэг нь өөрөө гурван ангийн
хүүхэд л хүлээн авах орон тоотой. 210 хүүхэд бүгд цахимаар бүртгүүлсэн бол хэдэн
хүүхдийг нь авах вэ гэдэг асуудал гарч ирж байгаа биз. Өмнө нь бол оочерлож,
хонож өнжсөн байгаад хүүхдээ өгнө. Хоцорвол хохь нь болоод л үлдэнэ. Миний
буруу гээд л үлдэнэ гэсэн үг л дээ. Гэтэл энэ удаад олон хүүхэд бүртгүүлэхийн
хэрээр асуудал үүсэх болчихоод байна. Мэдээж сугалааны зарчимаа баримталж
таарах биз. Юутай ч наймдугаар сарын
25-наас өмнө www.tsetserleg.ulaanbaatar.mn хаягаар хүүхдээ бүртгүүлж тусгай дугаараа аваарай.
Тусгай дугаараа бариад очиход таны хүүхдийг цэцэрлэг хүлээж авахаар
төлөвлөгджээ.