БСШУСЯ, Засгийн газрын хэрэгжүүлэгч агентлаг Биеийн тамир, спортын газар болон Допингийн эсрэг үндэсний төвөөс хамтран хэрэгжүүлж байгаа “Допингийн эсрэг үндэсний хяналт” төслийн хүрээнд 31 бөхөөс 2017 оны арван хоёрдугаар сард шинжилгээ авсан. Энэхүү шинжилгээгээр Үндэсний бөхчүүд допинг хэрэглэсэн тогтоогдсон. Харин допинг илэрсэн бөхчүүд өөрийн цахим хуудсаар гэмтэл бэртлээ эмчлэх гэж эм бэлдмэл хэрэглэсэн гэдгээ мэдэгдсэн. Харин эдгээр допиг илэрсэн бөхчүүдэд хэн ямар хариуцлага тооцох нь одоогоор тодорхой бус байна. Монголын Үндэсний бөхийн холбооноос допинг хэрэглэсэн гэх бөхчүүдэд ямар хариуцлага ногдуулах талаар албан ёсоор мэдээлээгүй байна.
Бөхчүүдээс допингийн шинжилгээ авахдаа өмнө нь хэрэглэж байсан эмийн нэрсийг бичихийг шаарддаг юм байна
Допингийн эсрэг үндэсний төвөөс допингийн шинжилгээнд бүдэрсэн бөхчүүдийн нэрийг зарласан бөгөөд үүнд аймгийн хурц арслан Б.Номиндалай, сумын заан С.Майнбаяр, улсын начин Э.Даш, улсын гарьд Ө.Бат-Орших нар багтсан. Эдгээр бөхчүүд “А” сорьцын шинжилгээний хариуг хүлээн зөвшөөрсөн бол нэг бөх “В” сорьцын шинжилгээнд хамрагдах хүсэлтээ өгсөн байна. Бөхчүүдээс допингийн шинжилгээ авахдаа өмнө нь хэрэглэж байсан эмийн нэрсийг бичихийг шаарддаг аж. Харин үүнд манай бөхчүүд юу ч бичилгүй цагаан цаас өгдөг нь өөрсдийн хариуцлага, хайнга холбоотой гэж албаны хүн хэлж байна. Энэхүү мэдээллийн дараа ч Улсын гарьд Ө.Бат-Орших, Улсын начин Э.Даш, Аймгийн хурц арслан Б.Номиндалай нар допингийн шинжилгээ илэрсэн асуудлаар байр сууриа илэрхийлсэн юм. Эдгээр бөхчүүд тамоксифен, ‘triamcinolone acetonide acetate’ үе мөчний тарилга болон харшлийн кеналог тариа хийлгэсэн гэдгээ хүлээн зөвшөөрч, бөхчүүдэд хандан бэртэлтэй тамирчид эм, бэлдмэл сонгохдоо болгоомжтой байхыг сануулсан юм.
Үндэсний их баяр наадмын үеэр допинг хэрэглэсэн бөхийн гаргасан амжилтыг хүчингүйд тооцож, цолыг хураах журамтай юм байна
2003 онд анхны допингийн эсрэг хууль гарчээ. Энэхүү хуулийг хэрэгжүүлэх Засгийн газрын тогтоол гарч, улмаар допингийн шинжилгээ авах журам гарсан байна. Үүнээс хойш 15 жил өнгөрөхөд зургаан жилд нь допинг гараагүй аж. Харин сүүлийн жилүүдэд бөхчүүд хориотой эм бэлдмэл хэрэглэх асуудал гараад байгаа аж. Бөхчүүд хувьд хориотой бодисын эм бэлдмэл, хор уршгийн талаар ойлголт сайтай. Мөн ямар нэгэн байдлаар өвдлөө гэхэд эмчээс хамгийн түрүүнд асууж, заавар авах боломжтой аж. Гэтэл яагаад мэдэж байгаа хирнээ хорио эм бэлдмэл хэрэглээд байна вэ? Үндэсний их баяр наадмын үеэр допинг хэрэглэсэн бөхийн гаргасан амжилтыг хүчингүйд тооцож, цолыг хураах журамтай. Харин наадмаас, наадмын хооронд зохиогдсон барилдааны үеэр энэ төрлийн бодис хэрэглэсэн нь шинжилгээгээр тогтоогдсон бөхийн барилдах эрхийг нь хоёр жилээр хасах журамтай. Өөрөөр хэлбэл, Монголын Үндэсний бөхийн холбооны Тэргүүлэгчдийн хурлын шийдвэрээр тухайн бөхөд хариуцлага оногдуулдаг юм байна. Мөн хориотой бодис хэрэглэсэн эсэх нь шинжилгээгээр тогтоогдсон учраас журмын дагуу барилдах эрхээ тодорхой хугацаагаар хасуулдаг гэнэ.
