Нийтийн тээврийн үйлчилгээнд иргэд сэтгэл дундуур байдаг. Тиймээс иргэдийн дунд энэ төрлийн шүүмжлэл тасардаггүй. Гэвч сүүлийн үед иргэдээс ирэх санал гомдлын тоо өдрөөс өдөрт буурч байгаа гэдгийг Нийслэлийн тээврийн газрын Олон нийттэй харилцах ажилтан Ц.Бямбасүрэн хэлж байна. Ингээд түүнтэй нийтийн тээврийн эргэн тойронд түгээмэл хөндөгддөг асуудлаар ярилцлаа.
-Нийтийн тээвэртэй холбоотой иргэдийн санал гомдлууд их байдаг. Ямар нэг асуудлын талаар утсаар мэдээлэх гэхээр утсаа авдаггүй, мөн мэдээлсэн санал, гомдлын дагуу ямар арга хэмжээ авч шийдвэрлэсэн талаар эргэж мэдээлдэггүй гэх зэргээр хүмүүс ярьж байна. Энэ талаар тайлбар өгөөч.
-Утсаа авахгүй гэх тохиолдол байх учиргүй. Яагаад гэвэл, манай санал, гомдол хүлээн авах утас 24 цагаар ажилладаг. Бид иргэдээс авсан бүх гомдлыг барагдуулах үүднээс шат шатанд нь арга хэмжээ аваад л явж байна. Магадгүй цайны цаг таарсан байж болох юм. Ганц нэг ийм тохиолдлыг ажил хийдэггүй мэтээр харлуулан туйлширч ярьж болохгүй. Хариуцлага тооцсон тухай мэдээллийг ч бид цаг тухайд нь мэдэгдээд явдаг. Дотоод журамд тусгасны дагуу мэдээлэх үүрэг бидэнд бий. Энэ үүргийнхээ дагуу тухайн иргэнээс ирсэн гомдлыг ямар төрөлд хамаарахаар нь ангилаад харицах хүнийг нь, жишээ нь жолоочтой холбоотой бол жолоочийг нь дуудаж ирүүлээд зохих хариуцлагыг нь тооцоод гомдол өгсөн иргэнтэй эргэн холбогдож,” тэдний өдрийн тэр цагт өгсөн таны гомдлын дагуу тийм жолоочид ийм арга хэмжээ авлаа” гэдгээ албан ёсоор мэдэгдэж ажилладаг.
-Огцом тормослосноос болж зорчигч гэмтэх явдал гардаг. Энэ нь нэг талаар жолооч аюулгүй байдлыг хангах үүднээс зайлшгүй зогсолт хийж байгаа үйлдэл гэж харж болох ч нөгөө талаар үүргээ биелүүлээд бариулаас барьж яваа зорчигч бэртэх гэх мэтээр хохирдог. Энэ тохиолдолд хэн хариуцлага хүлээх ёстой юм бэ?
-Зорчигчид шаардлагатай мэдээллийг нийтийн тээвэрт үйлчилж байгаа бүх автобусанд бид хангалттай байршуулсан байгаа. Зорчигчийн үүрэг ч энд бий. Хэрэв бэртэж гэмтвэл цагдаагийн байгууллага шийднэ. Ийм тохиолдол гарлаа гэхэд жолооч тухайн иргэнийг гэмтлийн эмнэлэгт хүргэж өгнө. Тэнд цагдаагийн байгууллага ажиллаж байгаа. Ер нь тухайн жолооч зорчиж явсан жолоочоо буудал дээр буулгаад хаяхгүй нь тодорхой. Харин эмнэлэг орох шаардлагагүй ч гомдолтой, эсвэл эмнэлэгт хүргээгүй, мөн жолоочийн ёс зүйтэй холбоотой асуудал гарвал автобусны хажуугийн дугаар болох томоор бичсэн гараш дугаарыг цаг минуттай нь манай санал, гомдол хүлээн авах дугаарт мэдэгдэж болно. Бид иргэдийн гомдлыг бүрэн барагдуулахаар шат шатанд нь арга хэмжээ авч ажиллаж байгаа.
-Өглөө иргэд ажилдаа явах ид ачааллын цагаар шугамандаа гарсан зарим нийтийн тээвэр эвдэрч, зорчигчдод чирэгдэл учруулах явдал цөөнгүй байна. Шугаманд гарахаас нь өмнө бүрэн бүтэн байдлыг нь шалгаж гаргадаг биз дээ?
-Тухайн автобус паркын инженер, техникийн ажилчид өглөө болгон техникийн бүрэн бүтэн байдал болон жолоочийн эрүүл мэндийн байдлыг үзэж, шалгаад гаргадаг. Үнэхээр насжилтаас шалтгаалсан эвдрэл гэмтэл гарч байна. Энэ бүгдийг бид шууд дор нь шийдвэрлэх эдийн засгийн боломжгүй учраас ийм асуудал үүсч байгааг үгүйсгэхгүй. Мөн цаг агаар болон бусад гадны хүчин зүйлсээс шалтгаалсан гэнэтийн эвдрэл гардаг. Ийм үед зайлшгүй шуурхай арга хэмжээ авч хамгийн ойр явж байгаа чиглэлийн автобусанд зорчигчдыг шилжүүлэн суулгана.
-Тэгэхээр парк шинэчлэл ойрын хугацаанд хийгдэх үү?
-Парк шинэчлэлийг бид байнга хийгээд явж байгаа.
-Саяхан бас нийтийн тээврийн автобус шатлаа. Юунаас болсон юм бол?
-Шатсан автобусны талаар мэдээлэл өгөх боломжгүй. Шинжилгээнийх нь дүгнэлт гараагүй байгаа.
-Үйлчилгээнд гарч байгаа автобусны камерууд 100 хувь ажиллаж байгаа юу?
-Бид 100 хувь ажиллаж байгаа гэж хэлж чадахгүй. Ер нь камер, тоног төхөөрөмжтэй холбоотой асуудлыг “Улаанбаатар смарт карт” компани хариуцаж ажилладаг.
-Картыг нийтийн тээвэрт нэвтрүүлснээс хойш олон талын эерэг үр дүн гарч байгаа. Гэвч бид энэ системд бүрэн шилжиж чадахгүй л байна. Иргэд одоо ч гэсэн бэлэн мөнгөөр зорчиж байх жишээтэй. Үүнийг юутай холбоотой гэж ойлгож байгаа вэ?
-Картаар үйлчлүүлэх үүрэгтэй гэдгээ мэдсээр байж бэлэн мөнгө барьж орж ирж байгаа зорчигчийн өөрийнх нь ухамсаргүй бөгөөд хариуцлагагүй үйлдэл. Жолооч шаардлага тавихаар “би картгүй” гэж хэлээд явж байна. Нөгөө талаар картын төхөөрөмж цөөхөн байгаатай бас холбоотой байх. Бидний зүгээс “Улаанбаатар смарт карт” компанид холбогдох шаардлагуудыг тогтмол хүргэж байгаа.
-Нийтийн тээврийн хаягжилтыг нэг стандарттай болгоно гэж байгаа. Мөн өмнө нь жолооч нар бүгд цагаан цамцаар жигдэрнэ гэж дуулдаж байсан. Энэ асуудлууд ямар шатандаа явж байгаа юм бол?
-Хаягжилтын ажил яригдаж байгаа. Хувцаслалтын тухайд гэвэл аж ахуйн нэгжүүд жолооч нарынхаа ажлын хувцсыг хангаад явдаг. Ингэхдээ энгэр дээрээ таних тэмдэгтэй байна. Харин цагаан цамцаар жигдрэх тухай асуудал яригдаагүй. Энэ нь манай цаг уурын нөхцөл байдалд ч тохирохгүй шүү дээ.
-Дугаарын хязгаарлалтад өөрчлөлт оруулахаар ярьж байна. Үүнтэй холбоотойгоор нийтийн тээврээр зорчигчдын тоо нэмэгдэх байх. Тэгэхээр энэ үеэр автобусны тоог нэмэх үү. Мөн чиглэлд өөрчлөлт оруулах уу?
-Дугаар хязгаарлах асуудал одоогоор судалгааны түвшинд явж байгаа. Тэгэхээр яг одоо бид тодорхой шийдвэр гаргаагүй байна. Харилцагч байгууллагуудтайгаа зарим асуудлаар хэлэлцэж, төлөвлөөд явж байна. Бид тухайн үеийн нөхцөл байдалд тулгуурлан, шаардлагатай гэж үзвэл хэрэгцээ шаардлагыг хангахын тулд нэмэлт автобус гаргана. Харин чиглэлийн замналын тухайд гэвэл өөрчлөлт оруулахаар баталсан даруйдаа цахим хуудсаараа дамжуулан мэдээлэх болно.
-Ярилцсанд баярлалаа.
Бид дараагийн удаад нийтийн тээвэртэй холбоотой иргэдийн санал, гомдлын тухай болон мөн хэрхэн шийдвэрлэдэг талаарх дэлгэрэнгүй ярилцлагыг хүргэх болно.
