УИХ-ын чуулганы нэгдсэн хуралдаанд Монгол Улсын Ерөнхий сайд У.Хүрэлсүхийн “Эрүүл мэндийн тусламж үйлчилгээ-бүх нийтийн хамралт”сэдвээр УИХ-ын чуулганы нэгдсэн хуралдаанд хийсэн мэдээлэлтэй холбогдуулан УИХ дахь АН-ын бүлгээс дараах дүгнэлтийг хийсэн юм. УИХ дахь АН-ын бүлгийн дарга Д.Эрдэнэбат танилцуулсан юм. Тэрээр 2015 онд НҮБ дэлхийн улс орнуудын Мянганы хөгжлийн зорилтын хэрэгжилтийг дүгнэж, Монгол Улс эх нялхасын болон 5 хүртлэх насны хүүхдийн эндэгдлийг бууруулж чадсан дэлхийн есөн орны нэгд багтаж чадсан билээ. Мянганы хөгжлийн зорилтын үргэлжлэл болгон НҮБ-ын Ерөнхий ассамблей 2030 он хүртлэх дэлхий нийтийн тогтвортой хөгжлийн зорилтыг тодорхойлж манай улс энэхүү тунхаглалд нэгдэж, өмнөх парламентаар “Монгол Улсын Тогтвортой хөгжлийн үзэл баримтлал-2030”-ыг баталж, энэ парламент “Эрүүл мэндийн талаар төрөөс баримтлах бодлого”-ыг тус тус баталсан.
Бүх нийтийн эрүүл мэндийн хамралт гэдэг нь эмнэлэгт хийж байгаа төлбөрийн улмаас монгол хүн ядууралд өртөх эрсдэлгүйгээр чанартай,үр дүнтэй эрүүл мэндийн тусламж үйлчилгээнд хамрагдах тухай ойлголт юм. Энэ ойлголт шинэ бодлого, шинэ зорилт биш бөгөөд энэхүү бодлого үе үеийн Засгийн газрын мөрийн хөтөлбөрт тусгагдаж ирсэн. Эрүүл мэндийн салбарт ямарч улс төрийн явцуу эрх ашиг байж болохгүй гэдэг утгаар Ерөнхий сайдын энэхүү мэдээлэл Эрүүл мэндийн салбарын цаашдын зорилтыг тодорхойлоход чухал ач холбогдолтой.
Гэхдээ Ерөнхий сайдын мэдээлэлд өнгөрсөн хоёр жилийн хугацаанд Эрүүл мэндийн талаар МАН-ын мөрийн хөтөлбөрт дэвшүүлсэн зорилт хэрхэн биелэгдэж байгаа талаар үнэлэлт, дүгнэлт дурдагдсангүй. Монголын ард түмэн таны мэдээлэлээс үүнийг хүлээж байсан гэдэгт эргэлзэхгүй байна.
Томоохон эмнэлэгүүдэд нэг цэгийн үйлчилгээ бий болгох, хүнд суртал, чирэгдлийг арилгах, яаралтай түргэн тусламжийн үйлчилгээг төгөлдөржүүлж, хот, хөдөө, орон сууц, гэр хороололд ялгалгүй тусламж үйлчилгээг хүртээмжтэй хүргэх, эмнэлгүүдийн эдийн засаг санхүүгийн бие даасан байдлыг хангаж удирдлага зохион байгуулалтын тогтолцоог боловсронгуй болгох, өрх, сумын эрүүл мэндийн төвийн эмч сувилагчдын чадавхийг сайжруулж, санхүүжилтийг нэмэгдүүлэх, эрүүл мэндийн даатгалын тухай хуулийн хэрэгжилтийг хангаж, төр, хувийн хэвшлийн түншлэлийг хангасанаар төвлөрөл буурч, хүртээмж нэмэгдэн шудрага өрсөлдөөн бий болж, эрүүл мэндийн тусламж үйлчилгээний чанар бүх нийтийн хамралт сайжрана гэж бид үздэг.
Бүх нийтийн эрүүл мэндийн асуудалд намаар талцаж нийтийн эрх ашгийг хохироох эрх та бидэнд байхгүй гэдгийг хэлсэн юм.
