Чих яагаад үрэвсдэг вэ?

Дунд чихний үрэвслийг эмчлэхгүй бол идээт үрэвсэл болж хувирна. Үрэвсэлт процессын түвшнээс хамааран сонсголын замаас идээ бээр, салс, цусархаг шүүс гардаг. Чихний үрэвсэл нь сонсгол муутай болгодог гол шалтгааны нэг. Аливаа үрэвсэлт өвчний адил чихний үрэвсэл 30 хоногийн туршид үргэлжилнэ. Эмчилгээ эхлээд хоёр гурван өдрийн дараа чих өвдөхөө болих нь бүрэн эдгэрсэн хэрэг биш. Хамар хоолойн өвчлөл чихний үрэвсэлд нөлөөлдгийг санаарай. Мөн даарч хөрснөөс чих үрэвсэх нь бий. Дунд чихний хурц үрэвслээр хүүхэд илүүтэй өвчилдөг. Ахуйн гэмтэл ч үрэвсэлд хүргэх боломжтой. Чихний үрэвслийг эмчлэх. Үрэвслийн багахан шинж тэмдэг илэрмэгц мэргэжлийн эмчид хандаарай. Цаг тухайд нь арга хэмжээ авбал менингит, мастит, сонсгол муудах зэрэг хүндрэлээс зайлсхийж болно. Хүчтэй өвдөлт, идээт үрэвсэлд судсаар антибиотик хийдэг. Курс эмчилгээ 5-7 хоног үргэлжилнэ. Үүнээс гадна бактерийн эсрэг эм /левомицетин, диоксидин гэх мэт/ хэрэглэнэ. Эмчилгээг үр дүнтэй болгохын тулд:
-Чихний булагаас гарах идээ, салс, шүүсийг цэвэрлэх
-Үүний тулд устөрөгчийн ислийн 3 хувийн уусмал эсвэл 9 хувийн натри хлоридын уусмалд хөвөн, марлийг дүрж чихийг цэвэрлэнэ.
-Чихний өвчинд дулаан жин тавих зэрэг бүлээсгэх эмчилгээ хийдэг. Гэхдээ ийм эмчилгээг үрэвсэлт процесс бий болоогүй үед л хэрэглэдэг.
Чихний үрэвсэлт өвчнөөс урьдчилан сэргийлэх үндсэн арга нь бол амьсгалын замын халдварт өвчин, ханиад томууг тухай бүрт нь гүйцэд эмчлэх явдал юм. Ханиаднаас салах нь сарын туршид чихний үрэвсэлт өвчинг эмчилснээс хавьгүй хялбар шүү дээ. Чихийг харандаа, нэхмэлийн зүү мэтийн хурц үзүүртэй зүйлээр цэвэрлэх гэж бүү оролдоорой. Чихний хэнгэргийг гэмтээх аюултай. Долоо хоногт нэг удаа зааврын дагуу чихээ цэвэрлэхэд хангалттай.