Дархан цаазтай Богд уулын аманд байшин барилга барьсаар байна. Өнөөдөр энэ дархан цаазат уулын ам тэр чигтээ байнгын оршин суугчидтай, суурьшлын бүс болон хувирсан гэж хэлж болно. Байгалийн онгон дагшин байдлыг хадгалан хамгаалах асуудал тэнд байхгүй боллоо. Дархан цаазат газарт аялал жуулчлалын нэрийн дор барилга байгууламж сүндэрлэж, байгалийн онгон дагшин байдлыг алдагдуулж байгаа байдалд яаж хариуцлага тооцох вэ? Хэн энэ дархан цаазат газрыг хэн хамгаалах вэ?
Гадаадын жуулчид болоод монголын иргэд Богд хайрхан руу аялахаар “Богдхан” амралтын газраар дайран өнгөрөхөд тус амралтын газрын эмгэнэлтэй дүр төрх гарын алган дээр дэлгээд тавьсан юм шиг тод харагддаг.
Архиндаа хөлчүүрхсэн, арзайж сэгсийсэн, өрвийсөн, шартсан, бөөлжсөн залуус, байшин гэрүүд нь нурж унах дөхсөн, хөшөө барималууд нь нурж, балгас болсон, амралтын газрыг тойроод хаа сайгүй архи, пивоны шил лааз, гялгар уут, цаасан хайрцаг, элдэв янзын хог хаягдал хөглөрөн байх аж.
Төрийн тусгай хамгаалалттай дархан цаазат газарт үйл ажиллагаа явуулдаг тус амралтын газарт зөвхөн архидан согтуурах, зугаа цэнгэл хөөсөн оюутан, сурагч, залуусын очдог уушийн газар болон хувирсан гэж болно. Харин иргэдийн хувьд энэ амралтын баазыг хааж Цэцэрлэгт хүрээлэн болгоё гэсэн саналыг гаргаж байгаа. Байшин барилга барьж байгалийн онгон дагшин байдлыг алдагдуулж байхаар цэцэрлэгт хүрээлэн болгож, байгалиа аварч үлдэх хэрэгтэй гэж хэлэх хүмүүс цөөнгүй байна.
Богдхан уулын хязгаарлалтын бүсэд зөвшөөрөлгүйгээр барилга барьж байгаа нийт 28 иргэн аж ахуй нэгж байгууллага байна
Богдхан уулын хязгаарлалтын бүсэд зөвшөөрөлгүйгээр барилга барьж байгаа нийт 28 иргэн аж ахуй нэгж байгууллага байгаа аж. Богдхан уулын хязгаарлалтын бүсэд аялал жуулчлалын чиглэлээр үйл ажиллагаа явуулах эрхийг 2004 оноос хойш олгож эхэлжээ. Энэ хугацаанд нийтдээ давхардсан тоогоор 1000 гаруй зөвшөөрөл олгогдсон байдаг. Гол нь тухайн байгууллага байгалийн унаган төрхийг алдагдуулахгүй байх ёстой. Гэтэл аж ахуй нэгж байгууллага, иргэд энэхүү шийдвэрийг зөрчсөн асуудал удаа дараа гарсаар байгаа гэдгийг эх сурвалжууд хэлж байна. Богдхан уулын дархан цаазат газрын хамгаалалтын захиргаанаас зөрчил гаргасан газруудад албан даалгавар хүргүүлж, зөрчилтэй газруудын үйл ажиллагаа явуулах эрхийг нь түтгэлзүүлэхээр болоод байна. Тухайлбал: Хатан Болор ХХК 2.5 га, Ар асгат уул ХХК 4.0 га, Ди Би Си Өү Эн ХХК 1.4 га, Грандлегаси 1.01 га, Дорнын хээр адуу ХХК гэх мэт нийт 28 аж ахуйн нэгж байгаа аж. Эдгээр газруудыг Байгалийн унаган төрхийг алдагдуулж, голын ай савын газрын бургас модыг сүйтгэсэн, зөвшөөрөлгүйгээр үйл ажиллагаа явуулсан, барилга барьсан зэрэг шалтгаанаар газар ашиглах эрхийг цуцалжээ. Харамсалтай нь төрийн байгууллагаас гаргасан шийдвэрийг эсэргүүцсэн олон газар гарч иржээ.
Дархан цаазат газрыг байгалийн хэв шинж, төлөв байдал, хөрс, ус, ургамал, амьтны аймгийн онцлог, хүний үйл ажиллагаанд өртөх байдал зэргийг харгалзан 3 бүсэд хуваадаг. Тодруулбал, онгон бүс, хамгаалалтын, хязгаарлалтын бүс гэж ангилдаг. Хязгаарлалтын бүсэд аялал жуулчлалын чиглэлээр үйл ажиллагаа явуулах эрхийг олгодог ч энэ мэт зөрчил дутагдал гарсаар байна.
…Тиймээс иргэдээс гаргаж буй дээрх санаачлагыг холбогдох төрийнхөн анхааралдаа авч, хэрэгжүүлбэл нийгэмд болон байгаль экологид эерэг нөлөөтэй ажил болох юм.
