Хот тохижилтын ажил ид өрнөөд эхэллээ. Хотын үзэмж, тэр тусмаа нийслэлчүүдийн эрүүл мэндийг тэтгэгч ногоон байгууламжийн ажил аль хэдийнэ эхэлсэн. Гэтэл өнөөдөр Анкара гудамж дахь тохижилтын ажил нэлээд асуудал дагууллаа.
Анкара гудамжин дахь улиасуудыг тайрч, оронд нь жижиг, бут сөөгийн төрлийн ургамал тарьж байгааг олон нийт шүүмжиллээ. Харин албаны хүний хэлж байгаагаар 1950-иад оноос эхэлж тарьж ургуулсан 57 ширхэг улиас энэ гудамжинд байсан аж. Тэдгээрээс ургах чадвар нь илт муудаж, үхэжсэн моддыг 2011–2017 оны хооронд цэвэрлэж, хожуул үлдсэн байсныг нь ийнхүү үндсээр нь цэвэрлэж оронд нь гоёлын буйлс тарьж байгаа юм гэнэ.
Чингэлтэй дүүргийн ТҮК-ийн ногоон байгууламж хариуцсан инженер Ц.Энхболд энэ асуудалд “Энэ хавар өмхөрч муудсан хожуулыг цэвэрлэж оронд нь 1200 ширхэг гоёлын буйлс тарих ажлыг хийлээ. Бид зөвхөн хожуул цэвэрлэж, орчныг тохижуулж байгаа гэдгийг онцолж хэлье. Гэтэл зарим хүмүүс ургаж байсан модыг булгалчихлаа гэж буруу ташаа ойлгоод байна. Модны үндсийг хамгаалах, ус чийг шингэх нөхцлийг сайжруулах, гудамжны шороо тоосыг бага ч болов багасгах зорилгоор байгалийн чулуу шигтгэж, зүлэгжүүлсэн юм.” гэсэн хариу өгчээ.
Зарим иргэд ойгоос мод шилжүүлж суулгаж болж байгаа юм бол энэ гудамжны моддыг ч мөн шилжүүлж болохгүй байсан уу, зүгээр байсан модыг огтоллоо гэх мэтээр хэлэлцэж байна. Ямартай ч Анкара гудамжин дахь ногоон байгууламжийн ажил нэлээд шүүмжлэл дагуулаад өнгөрлөө. Үнэхээр мод байсан уу, хожуул байсан уу гэдгийг тодорхой баталж хэлэх хүн албаныхнаас өөр байсангүй. Ямартай ч улиас моддыг тайрсан байна. Гэвч цаг хугацааны хувьд өнөөдөр биш бололтой.
Дашрамд сонирхуулахад, мод хэдэн арваас хэдэн зуун жил насалдаг. Үүнээс улиас нь 20 жил ургаж байж нас бие гүйцдэг байна. Манай хус, улиас зэрэг навчит мод 120-150, бут сөөг 20-40 орчим жил амьдардаг гэдгийг ойн инженер Х.Цэвгээ тайлбарласан байдаг.
