Жигжидийн ам бол битүү ногоон модтой, уулын түргэн горхи үргэлж хүржигнэж урсч байдаг, байгалийн даанч үзэсгэлэнтэй нутаг байсан даа. Тахилгатай уулынх нь энгэр дээр, эрхэм дээд ламтан Жигжидийн морилдог хийд байснаар Жигжидийн ам гэж нэрлэгдсэн юм билээ. Хийд нь яг уулынхаа энгэр дээр өмнө нь бас л онгон дагшин мод, баруун дэргэд нь газраас үргэлж ундарч байдаг рашаан булагтай, тун сайхан газар байлаа.
Гэвч одоо мянган хүн ундаалдаг рашаан булгийг нь хааж тал талд нь гүний худаг гаргаснаар өнөөх рашаан булаг тунгалаг гол горхи нь хатаж улаан халцгай болсон. Жигжидийн хийдийн их ламтан Жигжид гэдэг нь архи нэлээн уучихдаг, улаа бутарсан тарган шар хүн байсан юм гэнэ лээ гэж хууччуул ярина. Их номтой хувилгаан хүн байсан гэх. Хийд нь бас л гуч дөчөөд оны үед үгүй болсон аж.
Газрын наймаачид хэдэн жилийн өмнө тэр хавийн газрыг булаалдан авч хашаа хатгасан боловч зарим нь “Их хувилгааны онгон шүтээн байсан газрын дээд тал мань мэтэд хүнддэнэ” гээд орхиод явсан гэх. Заримд нь бас таагүй байдлаар хандсан гэж хүмүүс шивэр авир ярилцана. Нилээд хэдэн айл Жигжид хувилгааны сүм дуганы буйран дээр байшин барилга барьчихсан байгаа. Ойрхон зусдаг байсан хамба лам Х.Гаадан гуайгаас нэг удаа лавлахад “хийд дуган байж ном их хурдаг байсан газарт бол хар муу энерги хурдаггүй, дан эерэг эрчим хуралдсан байдаг учир муу юм ердөө байхгүй. Харин ийм сүм хийдийн ойр орчимд оршуулгын газар заавал байж таарна. Тийм газар, хар муу энерги хичнээн ч cap жилээр хуралдаж байхыг үгүйсгэх аргагүй” хэмээж байжээ.
