Сангийн сайд Ч.Хүрэлбаатар өнөөдөр 2019 оны төсвийн тухай хуулийн төслийг УИХ-ын дарга М.Энхболдод өргөн барьсан. Энэ талаар сэтгүүлчдэд мэдээлэл хийлээ. Тэрээр “2019 оны төсвийн орлогыг 9.7 их наяд, зарлага нь 11.6 их наяд, алдагдал 1.9 их наяд төгрөг байхаар тооцлоо.
Ирэх онд татварын багц хууль хэрэгжиж эхэлнэ. Ингэснээр татварын орчинд эерэг орчин үүснэ гэж харж байна. Тавантолгойн ордын нүүрсний тодорхой хэсгээс алга болсон, нүүрсний чанар буурсан асуудал гарсан. Тиймээс баялгийг хяналттай болгох зорилгоор тодорхой зардал тусгасан. Мөн шатахууны чанарын асуудал ихээр яригдаж байгаа учраас шинжилгээний рентген лаборатори байгуулахаар төсөвт суулгаж өглөө. Мөн гаалийн байгууллагын татварын нэмэгдлийг өсгөхөд анхаарна.
Төсвийн алдагдлын нийт 1.3 их наяд төгрөгийг гадны зээл тусламжаар, үлдсэн 600 тэрбумыг нь дотоодоос өр тавилгүйгээр нөхөхийг зорьж байна. “Ирээдүйн өв сан” 1.8 их наяд төгрөгийн өртэй байсан. Ирэх онд энэ өр бүрэн тэглэгдэж, 553 тэрбум орчим төгрөг хуримтлуулна. Энэ бол ирэх оны төсвийн гол онцлог болж байна. Ер нь “Ирээдүйн өв сан”-г цаашид хуримтлалтай болгох чиглэлд онцгой анхаарч, Монгол Улс анх удаа байгалийн баялгаасаа хуримтлал үүсгэж байгаа хэлбэр юм.
Төсвийн зардлыг тооцохдоо тэгш байдлаар санхүүжүүлэх аргачлал хэрэглэнэ. Нэлээд олон урсгал зардлыг өсгөхгүйгээр барина. Цалин тэтгэвэр, халамж нэмэх чиглэлд 720 тэрбум төгрөг суулгаж байна. Эрүүл мэндийн даатгалын салбарыг шинэчлэх замаар иргэдэд үзүүлэх энэ төрлийн үйлчилгээг сайжруулж, цахим тогтолцоонд шилжүүлнэ. Орон нутгийн хөгжлийн санд нэмж 189 тэрбум төгрөг суулгаснаар аймаг бүрт олгогдох санхүүжилт нэмэгдэж байна. Уул уурхайн лиценз олголтын 50 хувийг энэ санд төвлөрүүлэхээр тооцож байна. Гадаадын зээл тусламжийн хувьд, Төв цэвэрлэх байгууламж болон ундны усны хангамжийг нэмэгдүүлэх чиглэлд 750 сая ам.доллар байна. 2019 онд шинээр 40 сургууль, 60 цэцэрлэг, 22 дотуур байр, 32 эмнэлэг, 27 спорт заалыг шинээр өргөн барьж эхэлнэ” гэв.
2019 онд МСҮТ-ийн суралцагчдад сард 100 мянган төгрөгийн тэтгэмж олгохоор тооцож, 41 тэрбум төгрөг суулгаж өгсөн
Ингээд мэдээлэл хийсний дараа тэрээр сэтгүүлчдийн асуултад хариуллаа.
-Орлогын төсөөллөө хэр сайн тооцсон бэ?
-2019 оны дэлхийн зах зээл дээрх уул уурхайн түүхий эдийн үнэ, ерөнхий өсөлт зэргийг бид маш сайн тооцож үзсэн. Том гүрнүүдийн худалдааны дайн, үл ойлголцол зэргээс ирж болох тодорхой эрсдэлүүдийг тооцсон. Үүний хүрээнд төсвөө нэлээд тооцоолж хийсэн. Төсвийн орлогыг бодиттой байлгах тал дээр нэлээд анхаарч тооцсон. Мөн зэсийн үнийг 6800 ам.доллараар тооцсон. Орлогын төсөөллийг нэлээд чангалсан учраас тэр хэрээр Засгийн газар хичээж ажиллах учиртай.
-Хүүхдийн мөнгөнд ямар нэгэн өөрчилт оров уу?
Хүүхдийн мөнгийг төсөв дээр 80 хувиар нэмээд явж байгаа.
-Цалинг ирэх оны хэдэн сард нэмэх вэ?
-Цалин, тэтгэврийн холбоотой зардалд бид 720 тэрбум нэмж тавьсан. 2019 оны нэгдүгээр сарын 1-нээс цалин нэмэгдээд явна. Улс орон даяар төрийн албан хаагчдын цалингийн нэгдсэн систем бий болгоно.
Ипотекийн зээлээр санхүүжилт хийгдэж байгаа юу?
–Ипотекийн зээлээр Монгол банк дээр хэвээр үргэлжилж байгаа. Ирэх 2019 онд засгийн газар хэрэгжүүлээд явна.
-Утааг бууруулах хэдэн төгрөг төсөвлөж байгаа вэ?
-Утааг бууруулахаар нийтдээ 200 орчим тэрбум төгрөг тавигдсан. Үүнээс 45 тэрбум төгрөг гэр хороолол руу цахилгаан дулааны шугам тавих ажлууд дээр зориулагдахаар тавигдсан.
-Захиргааны зардлыг бууруулах чиглэлд хэрхэн анхаарч ажилласан бэ?
-2019 онд МСҮТ-ийн суралцагчдад сард 100 мянган төгрөгийн тэтгэмж олгохоор тооцож, 41 тэрбум төгрөг суулгаж өгсөн. Эдийн засаг өсөхийн хэрээр мэргэжилтэй ажилтны эрэлт өсөх юм.
