Ирэх даваа гарагт “Хотын нийтийн тээвэр, замын хөдөлгөөний оновчтой шийдлүүд” сэдэвт зөвлөгөөн болно. Улаанбаатар хотын замын хөдөлгөөний хэт ачааллыг бууруулахын тулд нийслэлийн ИТХ-аас уг зөвлөгөөнийг зохион байгуулах юм.
Улаабаатар дэлхийн 415 дахь том хот олон улсын жагсаалтад ороод удаж буй. Автомашиныг улсын дугаараар нь ангилж буй ч өдөрт ойролцоогоор 370 гаруй мянган тээврийн хэрэгсэл нийслэлийн замын хөдөлгөөнд оролцдог гэх статистик бий. Орон нутгаас Улаанбаатарт ирсэн тээврийн хэрэгслийн тоог оролцуулбал уг тоо нэмэгдэнэ. Хэдийгээр жил бүр авто замуудыг өргөтгөж, шинийг тавьж байгаа ч тээврийн хэрэгслийн тоо олширсны улмаас ачаалал нэмэгдээд буй. Тиймээс нийслэлийн ИТХ-ын тэргүүлэгчид замын хөдөлгөөний ачааллыг бууруулахын тулд өнгөрсөн тавдугаар сарын 23-нд 70 дугаар тогтоол баталсан. Тус тогтоолд тусгасан ачаалал ихтэй уулзваруудад шар дөрвөлжин тэмдэглэгээ тавьж, дүрэм зөрчсөн жолоочид хариуцлага тооцох, борлуулалт, түгээлтийн автомашиныг ажлын бус цагаар явуулах, замын автозогсоолын хүртээмжийг нэмэгдүүлэх зэрэг арга хэмжээг ажлын хэсэг судалж, хэрэгжүүлэхэд бэлэн болжээ. Улаанбаатар хотын замын хөдөлгөөний ачааллыг бууруулахад ямар арга хэмжээ авч болох талаар уг зөвлөгөөний үеэр иргэдийн саналыг авах юм.
Монгол Улсад анх удаа зохион байгуулж байгаа эл зөвлөгөөнд УИХ-ын гишүүд, нийслэл, дүүргийн удирдлага, эрдэмтэн судлаачид болон холбогдох бүх албаныхан оролцох аж. Зөвлөгөөнд оролцож буй бүх хүн саналаа хэлэх боломжтой.
Зөвлөгөөний онцлог нь өмнөх жилүүдэд хийсэн ажлаа бус, цаашид хэрэгжүүлэх арга хэмжээнийхээ талаар хэлэлцэхэд оршиж буй. Тухайлбал, хотын замын хөдөлгөөний ачааллыг бууруулахад нийтийн тээврийн хүртээмжийг сайжруулах нь нэн тэргүүний ажил хэмээн албаны хүмүүс үзжээ. Гадаадын хотын цөөн хэдэн баримтыг дурдъя. Японы Токио хотын нийт оршин суугчдын 90 хувь нь метрогоор, зургаан хувь нь автомашинаар зорчдог аж. БНХАУ-ын нийслэл Бээжингийн иргэдийн 34 хувь нь автомашин унадаг гэнэ. Гэвч Улаанбаатарын иргэдийн 70 орчим хувь хувийн автомашинаараа хөдөлгөөнд оролдог гэнэ. Тиймээс нийтийн тээврийн хүртээмжийг нэмэгдүүлж, цэвэр, тухтай автобусаар үйлчлүүлэх боломж бүрдүүлэхийг нийслэлийн ИТХ зорьж байгаа ажээ. Дээрх зөвлөгөөний үеэр нийслэлийн Тээврийн газарт тулгамдаж буй асуудлыг хэлэлцэж, BRT буюу тусгай замын автобус явуулж эхлэх гээд цаашид төлөвлөж буй арга хэмжээгээ танилцуулах гэнэ. Мөн автобусны чиглэл, маршрут зэрэг зөв зохион байгуулалтад хотын иргэдийн саналыг тусгах аж. Улмаар нийслэлийн ИТХ-ын тэргүүлэгчид зөвлөгөөнөөс гарсан шийдвэрийг хэлэлцэж, ажил болгох юм байна.
Шар дөрвөлжин тэмдэглэгээ, цагийн хязгаарлалтын талаар даваа гарагт хэлэлцэнэ
Зарим замын ашиглалтыг сайжруулж, нэг чигийн хөдөлгөөнтэй болгож эхэллээ. Мөн зарим замыг өргөтгөж, нэгдүгээр эгнээг нь зогсоол болгохоор судалж байна. Ирэх сараас ачаалал ихтэй дөрвөн уулзварт “Yellow box junctions” буюу шар дөрвөлжин тэмдэглэгээ тавина. 1980 оноос эхлэн дэлхийн олонх улс уг тэмдэглэгээгээр уулзваруудынаа нэвтрүүлэх чадварыг сайжруулсан байдаг. Түүнчлэн ирэх оноос нийтийн тээврийг хянах алба байгуулж, борлуулалт, түгээлтийн автомашиныг цагийн хязгаарлалтаар хөдөлгөөнд оролцуулна. Түгээлтийн автоамашинууд хөдөлгөөнд оролцож байхдаа ачаалалд нөлөөлдөггүй ч ачаа, бараагаа буулгах үедээ тухайн орчиндоо түгжрэл үүсгэдэг ажэ. Энэ бол нийслэлийн ИТХ-ын Тэргүүлэгчдийн өнгөрсөн тавдугаар сард баталсан 70 тогтоолын дагуу хэрэгжүүлж буй арга хэмжээ.
Улаанбаатар хотын замын хөдөлгөөний хэт ачааллыг бууруулах зорилгоор баталсан уг тогтоолын хүрээнд нийслэлийн ИТХ-аас ирэх даваа гарагт “Хотын нийтийн тээвэр, замын хөдөлгөөний оновчтой шийдлүүд” зөвлөгөөн хийх нь. Зөвлөгөөнд УИХ-ын гишүүд, нийслэл, дүүргийн удирдлага, Тээврийн цагдаагийн алба, эрдэмтэн, судлаачид гээд замтай холбоотой бүх албан тушаалтнууд оролцох юм байна. Өнгөрсөн хугацаанд хэчнээн замыг засаж, өргөтгөсөн, хэдэн автобус нэмж авсан зэрэг асуудлыг зөвлөгөөний үеэр ярилцахгүй, хөдөлгөөний хэт ачааллыг хэрхэн бууруулах вэ гэх хэтийн зорилго, төлөвлөлтөө танилцуулж, хэрэгжүүлж буй арга хэмжээндээ тусгах гэнэ.
Хэт төвлөрөл, нэвтрүүлэх чадвар муутай уулзвар, замууд, хөдөлгөөнд оролцож буй соёлгүй жолоочоос үүдэн Улаанбаатар хотын зам “түгжирдэг” гэж олон хүн ярьдаг. Харин эрдэмтэн судлаачид замын муу сүлжээ, нийтийн тээврийн буруу бодлого, оновчгүй бүсчлэлээс болж ачаалал нэмэгдсэн хэмээн үзэж буй. Тиймээс нийслэлийн замын хөдөлгөөний ачааллыг бууруулахад иргэдийн саналыг тусгахаар Монгол Улсад анх удаагаа ийм зөвлөгөөн зохион байгуулах болжээ.
Жолооч нар өдөрт дунджаар хоёр цаг зам дээр “түгжирч” зогссоныхоо төлөөсөнд ДНБ-ий гурав орчим хувьтай тэнцэх хэмжээний өртөгтэй шатахуун яндангаараа үлээлгэдэг байна. Тиймээс нийтийн тээврийн үйлчилгээг сайжруулж, замын ашиглалтын сайжруулах төлөвлөгөөгөө нийслэлийн ИТХ-ын олон нийтэд танилцуулах юм байна. Тодруулж хэлбэл, нэг чигийн хөдөлгөөнтэй болгох авто замууд, шинээр байгуулах автозогсоолуудын талаарх мэдээлэл өгнө гэсэн үг. Зөвлөгөөний үр дүнд зөвлөмж гаргаж, нийслэлийн ИТХ-ын тэргүүлэгчид түүний дагуу арга хэмжээ хэрэгжүүлэх ажээ.
