1966 оны зун Улаанбаатар хот их үерт автсан ч Яармагийн дэнж энэ үерт өртөлгүй үлдэж байсныг түүх гэрчилнэ. Гэтэл саяхны өдөр өнжсөн борооны аяыг Яармагийн дэнж даалгүй усанд автаж, сандаргав. Дэнж дээр ус тогтсон гэхээр их л устай бороо оржээ гэж бодогдохоор байгаа биз. Гэвч бороо, усандаа бус харин дарга, сайдын буруу шийдвэр, хяналтын байгууллагын хойрго байдал, хувийн компанийн дур мэдсэн хууль бус үйлдлээс болж үерт автсан болж таарлаа.
Тодруулбал, 2017 онд Байгаль орчин, аялал жуулчлалын сайдын тушаалаар “Талст ширээт” компанид аялал жуулчлалын зориулалтаар Хан-Уул дүүргийн дөрөвдүгээр хорооны нутаг дэвсгэрт 5 га газар ашиглах эрх олгожээ. Өөрөөр хэлбэл Байгаль орчин, аялал жуулчлалын сайд авто замын ус гаргалгааны хоолой дээр газар олгосноос болж их үерт авталгүй үлдэж байсан Яармагийн дэнж нэг борооны ая даалгүй сандарсан нь тэр аж.
Наадамчдын гудамж тэр аяараа усанд автаж, хүүхэд, хөгшид гэрээсээ гарах эрхгүйгээр хөл хоригдож, замын голд тээврийн хэрэгслүүд гэмтэл аван зогсож, олон тэрбумын хөрөнгөөр боссон зам бүтээн байгуулалт эвдрэх болсон шалтгаан нь ердөө л хариуцлагагүй барилгын компани, ажлаа хийдэггүй төрийн байгууллагынхны буруу юм. Мөн үүний цаана бүр том буруутан байгаа нь үерийн даланг хааж барилга барих зөвшөөрөл олгосон сайд. “Талст ширээт” компанид 2017 онд зөвшөөрөл олгожээ. Ядаж байхад Д.Оюунхорол сайдаар ажиллаж байгаад Н.Цэрэнбатад албаа шилжүүлж өгсөн хоёр сайдтай он байж таарлаа. Тэгэхээр буух эзэн, буцах хаяг нь будлиантай л гэсэн үг.
Үер буусан газар дээр ажилласан албаныхны “Талст ширээт” компанид замын урд талаар хийгдсэн борооны ус зайлуулах байгууламжийн ашиглалтын хэвийн ажиллагааг хангаж, зам доогуурх ус гаргалгааны хоолой руу орох шуудууг битүүлсэн хэсгийг цэвэрлэж ус нэвтрүүлэх ажлыг яаралтай хий гэсэн даалгавар өгсөн гэж мэдэгджээ. Харин өөрсдийн буруутай үйлдлийг зөвтгөж “Талст ширээт” компанийн захирал н.Даваадорж “Үерийн далан гаргах зураг төсөл бэлэн болж байгаа. Зам дагуух моддыг өөр газарт шилжүүлж суулгаж өгөөч гэдэг хүсэлт тавихад өнөөдрийг хүртэл шилжүүлээгүй. Үүнээс болж үерийн даланг барих боломжгүй байна” гэсэн тайлбар өгсөн юм.
Түүний энэхүү тайлбар хотын даргыг ундуйцуулж, “Барилга эхлүүлэх, үргэлжлүүлэх зөвшөөрөлгүй байж үерийн усны даланг хааж, барилга барьчихаад одоо усанд автсан энэ зам талбайг хар. Зөвшөөрөлгүй 10-20 давхар барилга барих болохоороо барьж болдог хэрнээ үерийн усны даланг заавал зөвшөөрөлтэй барина гэж болох уу. Улсын төсвийн хөрөнгөөр баригдсан зам дэд бүтцийг эвдэлж сүйтгэсэн, явган хүний замыг шавар шавхайд хутгаж, олон иргэдийг хохироосон хохирлыг танай компани бүрэн төлж барагдуул. Мэргэжлийн хяналт, Авто замын хөгжлийн газар, Геодези зураг зүйн хяналтын газрууд хоорондоо уялдаа холбоогоо нэгтгэж, хяналтаа сайжруул. Энэ компанийн үйл ажиллагааг зогсоо. Үерийн даланг засаж, үерийн усыг зайлуулах ажлыг түргэн шуурхай хий” гэсэн үүрэг даалгавар өглөө.
Төрийн албаны уялдаа холбоогүй байдал, нэг компанийн хариуцлагагүй үйлдэл нийслэлд ямар их хохирол учруулаад байгааг бид нүдээрээ харж байна. Энэ бол нийслэлийн бүтээн байгуулалтад зарцуулж буй хөрөнгийг үнэгүйдүүлж буй явдал юм.
Үерийн далан хааж барьсан барилгаас болж зам бүтээн байгуулалт эвдэрлээ. Гэвч авлигаас болж үерийн далан хааж, барилга барих зөвшөөрөл өгсөн, тэгээд зам эвдэрлээ гэсэн тайлбар туйлын оновчтой биз.Тэгэхээр үерийн далан хааж барилга барих зөвшөөрөл өгсөн сайд та хариуцлагаа хүлээ!
